1 Samuel 1 - MUKANDA USANDU WA ZAMBI 1975

¹ Kwapwile umwe lunga wa Ramataime-Zofime mu chifuchi cha Eframe ku milundu, jina lienyi Elekana, mwana wa Jerohame, mwana wa Elihu, mwana wa Tohu, mwana wa Zufu, Ka-Eframe.

² Te kali ni mapwo aali. Jina lia umwe Hana; jina lia mukwo Penina. Penina wasemene ana alioze Hana kasemene.

³ Mwe lunga mwaka ha mwaka wakatukile ku chihunda chenyi nikuya mukuwayila Yehova-wa-Tujita nikumulambula yitapo ku Shilo kuze kwatwamine e ana aali a Eli, Hofni ni Finehase, asasendote ja Yehova.

⁴ Ha tangwa lia kulambula Elekana wapangilile yawana kuli pwo lienyi Penina ni anenyi eswe a malunga ni a mapwo.

⁵ Alioze kuli Hana wahanyine chihanda chipema mumu wamuzangile, hindu Yehova hamujika ngoji yenyi.

⁶ Mba chihalika chenyi wamwihile chikolo nikumuvundula mumu Yehova hamujika ngoji yenyi.

⁷ Chocho chapwile mwaka ha mwaka, jila yeswe ayile ku zuwo lia Yehova iye wamwihile. Kashika Hana walilile, kasolo kulia.

⁸ Mba lunga lienyi Elekana wambile kuli iye ngwenyi, Hana, yika unalilila? Kuchi te kwalile? Kuchi te uli ni chinyengo mu mbunge? Te yami chahianyine kumi lia ana a malunga kuli yena nyi?

⁹ Mba muze halia, hanwa ku Shilo Hana wakatukile. Mwe sasendote Eli te kanatwama ha chitwamo ku chikuli cha chikolo cha tembele ya Yehova.

¹⁰ Mwe pwo te kanalifwichi nikulemba kuli Yehova nikulila chikolo.

¹¹ Yalakenya chilakenyo ngwenyi, Yehova-wa-Tujita nyi chamwenemwene mutala luyinda wa yami kavumbi ke, uka-ngwiwuluke, kanda unguvulama yami kavumbi ke alioze ukangwehe mwana wa lunga, mungumuhana kuli Yehova ha matangwa eswe a mwono wenyi, kechi kasa tewula ku mutwe wenyi.

¹² Mba shimbu machinyongonona nikulemba kumeso ja Yehova Eli wamwene kanwa lienyi.

¹³ Hana te kanahanjika mu mbunge yenyi; mivumbo yenyi yinalivwevweta alioze liji lienyi kalivwile. Kashika Eli yanyonga ngwenyi, Kanazengewa.

¹⁴ Mba Eli yamba kuli iye ngwenyi, Mwiji muka mulitwamina kuzengewa? Mbila vinyu ye.

¹⁵ Hana yakumbulula ngwenyi, Ka mwata. Nguli pwo wa chinyengo. Chanwine vinyu, chipwe kunwa chikwo chisasu, alioze hinazukwila mbunge yami kumeso ja Yehova.

¹⁶ Kanda ungumona ngwe nguli mwana wamokomoko. Mumu ha kulumbama cha chinyengo chami nikungwihia hingunahanjika ndo haliapwila.

¹⁷ Mba Eli yamukumbulula ngwenyi, Uye kanawa, mwe Zambi ya Izalele akwehe chize wamwita.

¹⁸ Pwo yamba ngwenyi, Yami kavumbi ke ngukawane vumbi kumeso je. Chocho pwo yaya kwenyi, yalia, mba kapwile nawa ni chinyengo ku meso.

¹⁹ O eswe yalimeneka, yawayila kumeso ja Yehova, yahiluka ku zuwo lio mu Rama. Elekana yalimona ni mukwo-pwo mba Yehova yamwiwuluka.

²⁰ Chocho ha mwaka wacho wakile ufumba, yasema mwana wa lunga, yamuluka jina lienyi Samuel mumu, ngwenyi, Namwichile kuli Yehova.

²¹ Mwe lunga Elekana ni akwa zuwo lienyi eswe ayile kulambula kuli Yehova mulambu wa mwaka ha mwaka hamuwika ni chilakenyo chenyi.

²² Alioze Hana kayile mumu yamba kuli mukwo-lunga ngwenyi, Ndo hinasumuna mwana mba mungumutwala akasoloke kumeso ja Yehova akatwameko miaka yeswe.

²³ Elekana yamba ngwenyi, Linga cheswacho chakupemena. Twama ndo hiwamusumuna. Chino wika, Yehova akakolese liji lienyi. Chocho mwe pwo Watwamine nikwamwisa mwanenyi ndo hamusumuna.

²⁴ Mba muze hamusumuna wamutwalile, ni kuji a ngombe atatu, ni* efa yimuwika ya wunga, ni tuku yimuwika ya vinyu. Yamutwala ku zuwo lia Yehova ku Shilo, achili te mwana.

²⁵ Yashiha kuji ya ngombe, yatwala mwe mwana kuli Eli.

²⁶ Pwo yamba ngwenyi, Mwata, ni mwono we mwata, yami mwe pwo yoze wamanyine kuno kwene ni yena, nikulemba kuli Yehova.

²⁷ Yono mwana nechile, mba Yehova hangwaha chize namwichile.

²⁸ Kashika ni yami nawa hinamuhana kuli Yehova. Ha matangwa eswe a mwono wenyi hinamuhana kuli Yehova. Mwe mwana wawayililileko Yehova.