1 Petulu 5 - MUKANDA USANDU WA ZAMBI 1975

¹ Makulwana hakachi kenu, ngunaashinjila, yami nguli mukulwana-ni-mukwo, ni chela cha lamba lia Kristu, yami nawa nguli mukwa kulianyina ha uhenya uze himuusoloka:

² ngwami, Fungenu mbunga ya mapanga a Zambi, yize yili hakachi kenu, pwenu tulayi, hi ha kuzangisa ko aiioze mumu nunazange: chipwe hi mukufumbuka ko ku upite wa sonyi, aiioze mumu ha zango.

³ Kanda nulipwisa ngwe ene hali waze hananukunjika, aiioze nikulipwisa yeseko ya mbunga.

⁴ Mba muze masolola Kafunga mukwa lutwe, kumunukatambula chipangula cha uhenya chize kuchishi kujimuka.

⁵ Chizechene twanuke, zeyelenu kuli makulwana, ewa, yenu eswe lijichikenu ni muya wa kulikehesa, hanga nukalivumbike umwe ni mukwo ni mukwo: mumu Zambi kakulimika ni akwa kulizelula, aiioze kakuhana vumbi kuli akwa kulikehesa.

⁶ Kashika likehesenu kushi lia kwoko lia ndundo lia Zambi, hanga akanunangamise ha mwaka wenyi.

⁷ Mbilenu yipikalo yenu yeswe hali iye, mumu kakunufunga.

⁸ Keyelenu, lenu; mumu mukwa kole yenu ndiapu, ngwe ndumba wa kuhanjika lundunjila kakwendangana nikufupa yoze mahasa kumuumbula.

⁹ Limikenu nenyi, nikujikiza mu Ufulielo, nikunyingika lamba limuwika kulinamanunuka muli mandumbu jenu waze ali hano hashi.

¹⁰ Zambi ya vumbi lieswe, yoze hananutambika kuheta ku uhenya wenyi wa mutolo muli Kristu, muze te hinunevu lamba ha shimbu likepe, iye mwene, kumakanupwisa angunu, makanujikijisa, makanutakamisa.

¹¹ Uhenya ni ndundo yikapwe kuli iye ndo ku miaka yeswe ya mutolo. Amene.

¹² Ku kwoko lia Selevwanu, ndumbu wamwenemwene, chocho ngunamumono, hinasoneka kuli yenu ni maliji akehe, nikushinjila nikushindakenya chikolo ngwami, Lino lie vumbi liamwenemwene lia Zambi: manenumo ngú.

¹³ Yoze hanamutongola hamwe ni yenu mu Babilonia kananumeneka, hamwe ni mwanami Marku.

¹⁴ Limenekenu umwe ni mukwo ni mukwo ni mbeju ya zango. Sambukila yikapwe hamwe ni yenu eswe nuli muli Kristu.