1 Petulu 4 - MUKANDA USANDU WA ZAMBI 1975

¹ Kashika chizechene ngwe Kristu hanevu lamba mu musunya, lipakatenu nawa ni kunyonga chimuwika; mumu yoze hanevu lamba mu musunya hanalitwamina ku shili;

² hanga kunuchi katwama nawa mu musunya ha miaka yenu yize yinasala, mukulinga usolo wa atu, aiioze mukulinga upale wa Zambi.

³ Mumu kunahu hali yenu miaka yize yapalika kulinga upale wa akwa mavungu, nikwenda mu ujila, ni usolo, ni kunwa vinyu, ni chimbangwinya, ni kunwanwa walwa, ni kukombelela cha kuzelwokesa.

⁴ Chinaashimi ngwe kunushi kuzomboka hamwe no mu muhwiji umuwika wa kuhungumuka ni yipi, kashika anahanjika yipi hali yenu.

⁵ Wano kumakalumbununa kuli yoze himapatwila a mwono ni afu.

⁶ Mumu ha chino ambujolele sango lipema chipwe kuli waze hanafu, hanga chamwenemwene ukaapatwile nikulita ni atu mu musunya, aiioze akapwe ni mwono nikulita ni Zambi mu Spiritu.

⁷ Alioze songo lia yuma yeswe hilinakundama: pwenu ni mana kashika, keyelenu, nukalitumbikile ku kulemba.

⁸ Kuhiana yuma yeswe pwenu nikulizanga umwe ni mukwo ni mukwo ni mbunge yeswe: mumu zango kuliakufuka milonga yinji:

⁹ nikulizumbula umwe ni mukwo, ni kulinyenyeta chakuhi.

¹⁰ Mweswe nikulita ngwe hanatambula chawana cha vumbi, alinge nacho umwe kuli mukwo ni mukwo, ngwe tuselo apema a vumbi lieka ni lieka lia Zambi.

¹¹ Kachi umwe mahanjika ahanjike ngwe iye liji lia Zambi; kachi umwe mavumbika, avumbike ngwe ku ngolo jize akumwaha Zambi: hanga mu yuma yeswe achichimieke Zambi ku tachi ja Yesu Kristu, yoze uhenya ni ndundo niyenyi ndo ku miaka yeswe ya mutolo. Amene.

¹² Akwetu a zango, kanda nukomoka ha kutwala ku cheseko cha kahia hakachi kenu, chize chineza hali yenu mukunweseka, ngwe chuma chimwe cha kukomwesa chinanuwane.

¹³ Alioze se nuli akwa kuhangana ni lamba lia Kristu, wahililenu; hanga ha usolwelo wa uhenya wenyi nawa nukawahilile nikulikwiza.

¹⁴ Kachi manuchoka mumu ha jina lia Kristu, kunwawaha; mumu Spiritu ya uhenya, kanda ya Zambi, kanatwama hali yenu; ha kutwala kuli ayo kanamushililika, aiioze ha kutwala kuli yenu, kanamuchichimieka.

¹⁵ Alioze niumwe wa kuli yenu, kanda akamona lamba ha mulonga wa ungalwe, hanji mwiji, hanji mukwa kulinga yipi, hanji mukwa kusunga ku yuma ya mbala.

¹⁶ Alioze kachi umwe mamona lamba ha kupwa mukwa Kristu, kanda akevwa sonyi; aiioze akachichimieke Zambi mumu ha jina lino.

¹⁷ Mumu mwaka hiuneza hanga upatwilo uputuke ku zuwo lia Zambi: nyi kachi muuputuka hatangu kuli yetu, songo lika mulikapwa lia waze keshi kwononoka ku sango lipema lia Zambi?

¹⁸ Nyi kachi muchikapwa chikalu hali mukwa ululi kulilamwina, kulihi chitanganyanyi ni chivulumunyi makasoloka?

¹⁹ Kashika nawa, waze akwivwa lamba nikulita ni upale wa Zambi akalikunjike ha kulinga yipema kuli Tangi wamwenemwene.