1 Petulu 3 - MUKANDA USANDU WA ZAMBI 1975

¹ Chizechene, yenu mapwo, zeyelenu kuli akwenu-malunga; hanga chipwe kachi amwe keshi kwononoka ku lie liji, akaazuke ni lie liji liakuhi ku kwenda cha akwo-mapwo,

² ha kutala kwenda chenu cha kulinanga hamwe ni woma.

³ Uhenya wenu kanda upwa uze wa haze, wa kuyinda cha kambu, ni wa kujinga cha oru, hanji wa kuzala cha mahina apema, ka;

⁴ aiioze ukapwe mutu wa kuswama wa mbunge, ni kuzala chingunu cha Spiritu ya kushimbika ni ya kuhola, yize kumeso ja Zambi ya ndando yinene chikolo.

⁵ Mumu chizechene ha miaka ya kunyima mapwo asandu nawa, waze ataliletalile kuli Zambi, alihenyesene, nikuzeyela kuli akwo-malunga.

⁶ Chizechene ngwe Sara wononokene kuli Apalahama, nikumutongola ngwenyi, Mwene: haliapwila nuli anenyi, nyi munulinga yipema, kunushi kwivwa woma ku mwongo niumwe.

⁷ Chizechene yenu malunga, twamenu hamwe no nikulita ni chinyingi, nikusela ulemu kuli pwo ngwe kuli chikwachilo chilelu, ngwe nuli maswana-ni-akwo ja vumbi lia mwono; hanga yilemba yenu kuyichi kalinjiwa.

⁸ Ha kusula, pwenu eswe ni kunyonga chimuwika, nikulivwila vumbi umwe ni mukwo ni mukwo, akwa kulizanga ngwe mandumbu, akwa mbunge ja vumbi, akwa mbunge ja kulikehesa.

⁹ Kanda nufwetesa yipi ni yipi, hanji kutukana ni kutukana, aiioze Shinaho ni uwape; mumu ha chino hananutambika, hanga nukahinge uwape.

¹⁰ Mumu yoze mazanga mwono, mazanga kumona matangwa apema, akafunge limi lienyi ku yipi, ni mivumbo yenyi hanga kuyichi kahanjika kalimbalimba.

¹¹ Akachine yipi, akalinge yipema; akafupe sambukila, akayikaule.

¹² Mumu meso ja Mwene hwali hali akwa ululi, ni matwi jenyi kakupanjika ku kuliumba cho; alioze meso ja Mwene kakulimika ni waze akulinga yipi.

¹³ Iya manulinga chipi nyi munulisela ni mbunge yeswe ku yuma yipema?

¹⁴ Alioze chipwe kachi munukevwa lamba mumu ha ululi, kunwawaha: kanda nukevwa woma ku woma wo, chipwe kanda nulipikala;

¹⁵ aiioze Selenu Kristu ngwe mwe Mwene mu mbunge jenu: nukalulike matangwa eswe mukuhana kumbululo kuli mweswe manwita chikuma cha kutalatala chize chili muli yenu, hindu ni kushimbika ni woma.

¹⁶ Pwenu ni mbunge yipema: hanga ha chize manwamba chipi ngwe akwa kulinga yipi, akevwe sonyi, waze akusaula kwenda chenu chipema muli Kristu.

¹⁷ Mumu chipema, kachi upale wa Zambi, nukevwe lamba ha kulinga yipema, hi ha kulinga yipi ko.

¹⁸ Mumu Kristu nawa hanevu lamba kamuwika ha milonga, mukwa ululi hali yihenge, hanga akatunehe kuli Zambi; se amushihile mu musunya, aiioze amupwishile ni mwono muli Spiritu.

¹⁹ Muli iye nawa, wayile nikwambujola sango kuli maspiritu mu zuwo lia ususu;

²⁰ waze ha shakulu kononokeneko, muze uhomboloji wa Zambi washimbwile ha matangwa ja Noe, shimbu machilulika ulungu, amuze akepe, te atu nake, aalamwinyine ku meya.

²¹ Chenacho nawa ni Chizulie cha kulita haliapwila chinanulamwina, te upapachiso, hi kusano ko majilo a musunya akatuke, aiioze kutá cha mbunge yipema kuli Zambi, ku Uhindukilo wa Yesu Kristu;

²² yoze kwali ku kwoko lia chindume lia Zambi, se hanayi mwilu; angelo ni akwa kuyula ni tachi nikuzeyela kuli iye.