1 Petulu 2 - MUKANDA USANDU WA ZAMBI 1975

¹ Kashika, mbilenu uhuka weswe, ni tulimbalimba eswe, ni ulembekese, ni lufwachinda, ni kuhanjika chipi.

² Chizechene ngwe ana-akemba waze anasemuka haliapwila, ivwenu chikolo usona ha yamwa ya uspiritu yize kuyishi kalimbalimba, hanga nukatatuke nayo ndo ku ulamwino,

³ kachi hinunapanjika ngwe Mwene iye mukwa utu.

⁴ Nwakwiza kuli iye, ngwe ku liwe lia mwono, alitunyinelio chamwenemwene kuli atu, aiioze kuli Zambi Hapwa lia kutongola, lilemu.

⁵ Ni yenu nawa, ngwe mawe a mwono, kananutungu kupwa zuwo lia uspiritu, kupwa asasendote asandu, mukulambula yitapo ya uspiritu, ya kupemena chikolo kuli Zambi ku tachi ja Yesu Kristu.

⁶ Mumu chinasonewa mu chisoneko ngwo, Talenu, mungusa mu Zaione liwe lia lutwe lia mbango, lia kutongola, lilemu; yoze mamufuliela kechi kevwa sonyi.

⁷ Kuli yenu kashika, nwakufuliela, iye mulemu: alioze kuli waze keshi kwononoka, liwe lia lutwe lia mbango.

⁸ Chikwo ngwo, liwe lia kuhukanyisa, ni luliwe lwa kutalingisa; mumu kakuhukana ku liji, se keshi kwononoka: ku chize aatongwelele.

⁹ Alioze yenu nuli akwa munyachi wa kutongola, asasendote a ku wanangana, enya chifuchi chisandu, amwe atu a kwapita Zambi mwene, hanga nukambujole che kuhiana cha yoze hananutambika nukakatuke ku milima ndo ku pangu lienyi lia kukomwesa:

¹⁰ Yenu, ha miaka ya kunyima kunwapwile atu aiioze haliapwila nuli atu a Zambi: te kunwawanyine keke, aiioze haliapwila hinunawane keke.

¹¹ Akwetu a zango, ngunaliumbu kuli yenu ngwe ngeji ni njize nukasúle ku usolo wa musunya uze wakwasa jita ni mbunge.

¹² Pwenu ni kwenda chenu ngwe chinate hakachi ka akwa mavungu: hanga chipwe manuhanjika ngwe akwa kulinga yipi, ku yitanga yenu yipema yize akumona, akachichimieke Zambi ha tangwa lia kukala ni lia kwononona.

¹³ Zeyelenu ku yiyulo yeswe ya atu, mumu hali Mwene: chipwe kuli mwanangana ngwe munene Wahiana;

¹⁴ hanji kuli manguvulu, ngwe waze akutumiwa kuli iye, akakale milonga ya akwa kulinga yipi, akahalise akwa kulinga yipema.

¹⁵ Mumu chocho we upale wa Zambi, ha kulinga yipema, nukakolese kwalajala cha yizuzuke.

¹⁶ Ngwe akwa kutusuka, aiioze kanda nutenga kutusuka chenu chifuko cha uhuka, aiioze ngwe ndungo ja Zambi.

¹⁷ Lemesenu atu eswe, zangenu mandumbu, ivwenu woma kuli Zambi, lemesenu mwanangana.

¹⁸ Yenu ngamba, zeyelenu kuli miata jenu ni woma weswe; hi kuli apema ni yimbovu wika ko, aiioze nawa kuli akalu.

¹⁹ Mumu chino chinapemena kachi ha shimbi ya mbunge kuli Zambi, umwe manyongonona mu yinyengo, nikwivwa lamba, hi ha chitela chenyi ko.

²⁰ Mumu hahi manuchichimieka, kachi munuvulumuna, o manumbufula, chipwe munulihumikiza nacho? Alioze kachi ha kulinga yipema munwivwa lamba, munulihumikiza nacho, chino chinapemena kuli Zambi.

²¹ Mumu ku chino hananutambika: mumu Kristu nawa wanuvwilile lamba, nikunuhichikila cheseko, hanga nukakaule mu ngano jenyi.

²² Iye kavulumwineko, chipwe mu kanwa lienyi kawanyinemo kalimbalimba.

²³ Muze amutukile, katukanyine; muze evwile lamba, komishine; aiioze walikunjikile ku moko ja yoze wakupatula ni ululi.

²⁴ Iye mwene wambachile milonga yetu mu mujimba wenyi ha mutondo, hanga yetu se hitunafu ku milonga, tukapwe ni mwono ku ululi; ku mbandu jenyi hinunahinduka.

²⁵ Mumu yenu nwapwile nikupianguka ngwe mapanga, aiioze haliapwila hinunahilukila kuli Kafunga, Kalayi ka mbunge jenu.