1 Petulu 1 - MUKANDA USANDU WA ZAMBI 1975

¹ Yami Petulu, postolo wa Yesu Kristu, Kuli njize waze anamwangashana mu yifuchi ya Ponto, Ngalashia, Kapatoshia, Eshia, ni Mbitiniya;

² waze hanaatongola nikulita ni chinyingi cha kulutwe cha Zambi Tata, nikulita ni tachi ja Spiritu, ha kutusela ku usandu hanga twononoke, atusapwile ni manyinga a Yesu Kristu: Vumbi kuli yenu ni sambukila yikalumbame.

³ Zambi kanda Tato ya Mwene wetu Yesu Kristu afumane, yoze nikulita ni keke yenyi yinji hanatuseme chaha, tukapwe ni kutalatala cha mwono, ku Uhindukilo wa Yesu Kristu hakachi ka afu,

⁴ tukapwe ni chihinga chingunu, kuchishi luchisa, ni chize kuchishi kujimuka, kanachifungu mu malilu hali yenu.

⁵ Yenu kananufungu ni tachi ja Zambi ku Ufulielo, ha ulamwino, himausolola ha mwaka wa kusula.

⁶ Mu uze nwakulikwiza, chipwe haliapwila ha shimbu likepe, kachi chinatambe, hananuvwisa chinyengo ni yeseko yeka ni yeka,

⁷ hanga kweseka cha Ufulielo wenu, ulemu wahiana chikolo oru yize ya kutoka, chipwe mayeseka ni kahia, akauwane wa uhaliso ni uhenya ni ulemu ha usolwelo wa Yesu Kristu:

⁸ yoze chipwe kunwamumwene, hindu nwakumuzanga; chipwe haliapwila kunushi kumumona, hindu se nunamufuliela, nwakulikwiza ni uwahililo uze keshi kuhasa kuuhanjika, wa tò ni uhenya.

⁹ Nunatambula songo lia Ufulielo wenu, we ulamwino wa mwono wenu.

¹⁰ Ha kutwala ku ulamwino uno aprofeta afupile nikuhengula chikolo, waze aprofetezele ha kutwala ku vumbi lize muliza kuli yenu;

¹¹ nikuhengula ha chize, hanji mwaka uze, Spiritu ya Kristu, yoze wapwile muli ayo wenyikine, muze ashindakenyene Shimbu-kanda ha lamba lia Kristu, ni uhenya uze muukapwa kulutwe.

¹² Aalwezele ngwe, hi kuli ayo ko, aiioze kuli yetu atuvumbikile ni yino yuma, yize haliapwila hananwambulwilayo ku makanwa ja akwa kwambujola, muli Spiritu Musandu kanatumiwa mwilu; yuma yize angelo kakwivwa usona kuhengulamo.

¹³ Kashika, jichikenu miya mu zalilo ja kunyonga chenu, keyelenu, nukataletale ndo ku songo ha vumbi lize makalineha kuli yenu ha usolwelo wa Yesu Kristu.

¹⁴ Chizechene ngwe akwa kwononoka, kanda nulitesa ni usolo wenu wa kunyima mu kwalajala chenu:

¹⁵ aiioze chizechene ngwe yoze wanutambikile kapwa musandu, ni yenwene nawa pwenu asandu ha kwenda chenu cheswe.

¹⁶ Mumu chinasonewa ngwo, Pwenu asandu, mumu yami nguli musandu.

¹⁷ Nyi kachi nwakumutongola ngwenu, tata yoze keshi katonde, kakupatula nikulita ni chitanga cha mutu ni mutu, endenu ni woma, wenyi wenu weswe:

¹⁸ se nunanyingika hananukula, hi ni yuma ya kupola ko, ngwe prata hanji oru, ku kwenda chenu chamokomoko, chize anukunjikilecho tulamba twenu;

¹⁹ aiioze ni manyinga alemu a Kristu, ngwe a mwanapanga keshi kapalia, keshi chipeka.

²⁰ Amunyingikine chamwenemwene shimbu kanda asela fundamentu ya hashi, aiioze hanamusolola ha kusula songo lia miaka mumu hali yenu.

²¹ Yenu, kuli iye nwakufuliela Zambi, yoze wamuhindwishile hakachi ka afu, wamuhele uhenya; hanga Ufulielo wenu ni kutalatala chenu chikapwe muli Zambi.

²² Se hinunatomesa mbunge jenu ha kwononoka chenu ku umwenemwene, hanga nukafwile mandumbu ni kufwila chize kuchishi ulembekese, lizangenu umwe mukwo ni mukwo ku mbunge yipema ni mbunge yeswe.

²³ Se hinunasemuka chaha, hi ku mbuto ya kupola ko, aiioze ku yize kuyishi kuhasa kupola, lie liji lia Zambi, lize lia mwono, kuliakulinduluka ndo ku miaka ya mutolo.

²⁴ Mumu musunya weswe unapu ngwe mwambu, ni uhenya wawo weswe ngwe chitemo cha mwambu; mwambu muulela, ni chitemo chawo muchiholoka,

²⁵ aiioze liji lia Mwene kuliakulinduluka ndo ku miaka ya mutolo. Lino lie liji lize hananwambulwilalio mu sango lipema.