1 MIANANGANA 9 - MUKANDA USANDU WA ZAMBI 1975

¹ Profeta Elisha yasanyika umwe mwana wa aprofeta, yamba kuli iye ngwenyi, Ulijichike muya, tambula kasaji kano ka maji mu kwoko uye ku Ramote-Ngiliate.

² Ha kuhetako fupa Jehu mwana Yehosofate mwana Nimishi. Mba munjila ukamukatwise hakachi ka akwo, ukamutwale mu chipatulo cha muchima.

³ Mba mutambula kasaji ka maji ukaazujile ha mutwe weny ukambe ngwe, Yehova kanambe ngwenyi, Hinakuwayisa mwanangana wa Izalele. Hiazulula pito uchine. Kanda ulalukako.

⁴ Chocho mwe mukweze, ngwami, mukweze profeta, yaya ku Ramote-Ngiliate.

⁵ Ha kuhetako tupitau eswe a tujita kanatwama. Aye yamba ngwenyi, Kapitau, liji nguli nalio kuli yena. Jehu yamba ngwenyi, Kuli iya hakachi ka yetu eswe? Aye ngwenyi, Kuli yena mwene kapitau.

⁶ Yakatuka, yanjila muchima, mba profeta yazujila maji ha mutwe wenyi ngwenyi, Yehova Zambi ya Izalele kanambe ngwenyi, Hinakuwayisa mwana-ngana wa atu ja Yehova, e A-Izalele.

⁷ Kumulamba munyachi wa Ahabe mwata we hanga ngukakalile hali Jezebele manyinga ja tuvumbi twami aprofeta, ni manyinga ja tuvumbi twa Yehova eswe.

⁸ Mumu munyachi weswe wa Ahabe muukajimuka. Mungukateta kuli Ahabe lunga mweswe muli Izalele; wa kukasa ni wa kutusula.

⁹ Mungupwisa munyachi wa Ahabe ngwe munyachi wa Jeroboame mwana Nebate; ngwe munyachi wa Mbasha mwana Ahija nawa.

¹⁰ Tuwa kumalia Jezebele mu chihela cha Yezerele. Mukwa kumufunda kechi kusoloka. Mba yazulula pito, yachina.

¹¹ Aho Jehu yatuhuka, yeza kuli tuvumbi twa mwata wenyi. Umwe yamuhula ngwenyi, Cheswe chinawaha nyi? Au chizaluke yika anakukawila? Aye yamba kuli ayo ngwenyi, Te kunwamunyingikine ni yihanjika yenyi?

¹² O ngwo, Mahuza! Utwambulwile pundu. Aye ngwenyi, Chinganji ni Chinganji angwamba ngwenyi, Yehova kanambe ngwenyi, Hinakuwayisa mwanangana wa Izalele.

¹³ Mba fuji-fuji yatambula mutu mweswe hina lienyi lia ngungu, yalialila mushi lia Jehu helu lia ukandukilo wa mawe, yahumuna chitavwi ngwo, Vulie! mwanangana Jehu!

¹⁴ Chocho Jehu mwana Yehosofate mwana Nimishi yatwama punga Jorame. (Achi Jorame wafungile Ramote-Ngiliate hamuwika ni A-Izalele eswe, mumu hali Hazaele mwanangana wa Seria;

¹⁵ alioze mwanangana Jorame te hanahiluka ku Yezerele amuwuke mbandu jenyi jize amutwile kuli A-Seria muze iye ashile jita ni Hazaele mwanangana wa Seria.) Mba Jehu yamba ngwenyi, Nyi mbunge jenu japwa chocho kanda nutayiza niumwe kutuhuka mu chihunda aye achambulwile mu Yezerele.

¹⁶ Chocho Jehu yaya ku Yezerele mu temba mumu Jorame te kwenako anapombo. Ni Ahazia mwanangana wa Yunda te heza kutala Jorame.

¹⁷ Mwe kalayi kanamana ha kaposhi mu Yezerele, yamona Jehu ni atu jenyi shimbu machiza. Yamba ngwenyi, Ngunamono mbunga. Jorame yamba ngwenyi, Sakula mukwa kavwalu umutume kwapatwiza, aahule ngwenyi, Sambukila nyi?

¹⁸ Chocho umwe yaya ha kavwalu amupatwize. Yamba ngwenyi, Mwanangana ngwenyi, Sambukila nyi? Jehu yakumbulula ngwenyi, Sambukila te uli nayo? Njila kunyima yami. Kalayi yalumbununa ngwenyi, Mukeji haheta kuli ayo alioze kejile nawa.

¹⁹ Mba yatuma mukwo wamuchiali ha kavwalu. Aye yaheta kuli ayo, yamba ngwenyi, Mwanangana ngwenyi, Sambukila nyi? Jehu yakumbulula ngwenyi, Sambukila te uli nayo? Njila kunyima yami.

²⁰ Mba kalayi yalumbu nuna ngwenyi, Haheta kwe kuli ayo alioze kejile nawa. Kwendesa chapwa ngwe kwendesa cha Jehu mwana Nimishi mumu kanendesa fuji-fuji.

²¹ Jorame yamba ngwenyi, Lulikenu temba. Yalulika temba lienyi. Mba Jorame mwanangana wa Izalele ni Ahazia mwanangana wa Yunda yatuhuka kupatwiza Jehu, au mu temba lienyi, au mu temba lienyi. Yatakana nenyi mu chihinga cha Ka-Yezerele Nabote.

²² Muze Jorame hamona Jehu yamba ngwenyi, Jehu, sambukila nyi? Aye yakumbulula ngwenyi, Keke ya kulihi, shimbu utanji ni umbanda wa noko Jezebele woka Chichize?

²³ Jorame yapindumuka, yachina nikwamba kuli Ahazia ngwenyi, Ahazia! Utwahe uliko.

²⁴ Jehu yanana uta ni tachi jenyi jeswe yása Jorame hakachi ka yipaya. Mwivu yiupalika ndusu mu mbunge, aye yalezumuka mu temba lienyi.

²⁵ Mba Jehu yamba kuli kapitau kenyi Mbidikari ngwenyi, Zundula umumbile mu munda wa Ka-Yezerele Nabote. Iwuluka muze yena ni yami twendele hamwe ni tato Ahabe, Yehova wamutwikile chuma chino ngwenyi,

²⁶ Pundu zau ngunakamona manyinga a Nabote, ni manyinga ja ana jenyi, Yehova kanachambe, kashika mungukuhilwisacho muno mu munda uno. Chocho kanambe Yehova. Kashika umwande umumbile mu munda nikulita ni liji lia Yehova.

²⁷ Muze Ahazia mwanangana wa Yunda hamona chino yachinyina jila ya Mbete-Hagana. Jehu yamuhanga nikutambika ngwenyi, Neye mushihilenu mwe mu temba. Yamwasa ha kukandukila ku Nguru hakamwihi ni Ibliame. Aye yachinyina ku Megidu, yafwilako.

²⁸ Tuvumbi twenyi yamutwala mu temba ku Yerusaleme, mba yamufunda mu fuka lienyi hamwe ni tulamba twenyi mu chihunda cha David.

²⁹ Mu mwaka kumi ni kashi wa Jorame mwana Ahabe, Ahazia yaputuka kuyula A-Yunda.

³⁰ Muze Jehu haheta ku Yezerele Jezebele yachivwa. Kashika yalipintala ku meso, yalulika mutwe wenyi yatalila ku njanela.

³¹ Ha kunjila Jehu ku chikolo pwo yamba ngwenyi, Sambukila nyi? Ena Zimiri mukwa kushiha mwata we.

³² Jehu yahetuka, yatala ku njanela ngwenyi, Iya uli hamwe ni yami? Iya? Amwe aali hanji atatu ja aunuku yatala kuli iye.

³³ Aye yamba ngwenyi, Munyasenu! Yamunyasa. Mba amwe manyinga jenyi asapukilile ha yishimi, ni hali tuvwalu; mba yamuliata.

³⁴ Muze hanjila, yalia, yanwa, mba yamba ngwenyi, Andenu yono pwo wa shingo haliapwila numufunde mumu mwana wa mwanangana.

³⁵ Yaya kumufunda, alioze kamuwanyine shina kola, ni yiliato, ni mbandamoko.

³⁶ Kashika yahiluka, yamwambulwila. Aye yamba ngwenyi, Achi lie liji lia Yehova lize ambile ku kanwa lia kavumbi kenyi Eliya Ka-Tishibe ngwenyi, Mu chihela cha Yezerele tuwa kumakalia musunya wa Jezebele,

³⁷ mba mujimba wa Jezebele kumuukapwa ngwe pinga mu munda wa Yezerele, chocho kechi kuhasa kwamba ngwo, Au Jezebele.