1 MIANANGANA 8 - MUKANDA USANDU WA ZAMBI 1975

¹ Achi Elisha te hahanjika ni pwo yoze wahindwishile mwanenyi wa lunga nikumwaha mwono ngwenyi, Katuka uye ni akwa zuwo lie ukatwame kweswako mutwama, mumu Yehova hatambika kapunga, mba kumeza ha chifuchi miaka shimbiali.

² Pwo yakatuka, yalinga nikulita ni liji lia mutu wa Zambi. Yatwala akwa zuwo lienyi, mba Watwamine mu chifuchi cha A-Filistea miaka shimbiali.

³ Muze miaka shimbiali hiyahwa, pwo yakatuka ku chifuchi cha A-Filistea. Yaya kuteta kuli mwanangana ha kutwala ku zuwo lienyi ni minda yenyi.

⁴ Mwanangana te kanahanjika ni Ngehaze kavumbi ka mutu wa Zambi ngwenyi, Ngulumbunwine kama yitanga yinene yeswe Elisha halinga.

⁵ Mba shimbu Ngehaze machilumbununa chize ahilwishile mwono kuli mufu, kumanyi mwe pwo, mwanenyi hamuhilwisa mwono wenyi, yateta kuli mwanangana ha kutwala ku zuwo lienyi ni minda yenyi. Ngehaze yamba ngwenyi, Mwene wami mwanangana, mwe pwo yono, ni yono mwanenyi Elisha wahilwishile mwono wenyi nawa.

⁶ Mwanangana yahula pwo, mba yamulumbunwina. Chocho mwanangana yamusela umwe kapitau ngwenyi, Hilwisa yuma yeswe yapwile niyenyi, ni mbuto yeswe ya mu minda, chize ku tangwa lize akatukile mu chifuchi ndo haliapwila.

⁷ Elisha yaya ku Ndamaseku. Mbene-Hadade mwanangana wa Seria te kanayiji; mba yamwambulwila ngwo, Mutu wa Zambi haneza.

⁸ Mwanangana yamba kuli Hazaele ngwenyi, Mbata mulambu mu kwoko, uye upatwize mwe mutu wa Zambi, uhule Yehova kuli iye nyi munguhinduka ku kuyiza chino.

⁹ Chocho Hazaele yaya kumupatwiza, yambata mulambu wa ku yuma yeswe yipema mu Ndamaseku, te yiteli ya makumi awana a tumelu. Yeza, yamana kumeso jenyi ngwenyi, Mwanenu Mbene-Hadade mwanangana wa Seria, hangutuma kuli yenu ngwenyi, Munguhinduka ku kuyiza chino nyi?

¹⁰ Elisha yamba kuli iye ngwenyi, Yako ukamwambulwile ngwe, Kumuhinduka; hindu Yehova hangulweza ngwenyi, Kumafwa.

¹¹ Mba yamuhulikila meso nikumutala ndo hevwa sonyi, mba mutu wa Zambi yalila.

¹² Hazaele yamba ngwenyi, Mwene wami, yika nunalilila? Aye yakumbulula ngwenyi, Mumu ngunanyingika yuma yipi yena mulinga kuli A-Izalele. Kumukocha kahia mbonge jo; akweze jo kumukashiha ni katana; kumukapalwola ana jo akemba; kumukahangula tufumba two.

¹³ Hazaele yamba ngwenyi, Ami kuchi munguhasa kulinga chuma chino chinene? Ami kavumbi kenu nguli kawa lume. Elisha yakumbulula ngwenyi, Yehova hangulwezacho; kumukapwa mwanangana wa Seria.

¹⁴ Chocho yakatuka kuli Elisha, yeza kuli mwata wenyi. Aye yamba kuli iye ngwenyi, Elisha yika akwambanga? Yakumbulula ngwenyi, Kangwambulwilanga ngwenyi, Kumahinduka.

¹⁵ Munachiko, aye yanda kanyime, yamuchupika mu meya, yamufuka nenyi ku meso. Chocho yafwa; mba Hazaele yamusalakana mu wanangana.

¹⁶ Ha mwaka wamuchitano wa Jorame mwana Ahabe mwanangana wa Izalele, Yehosofate achili mwanangana wa Yunda, Jorame mwana Yehosofate mwanangana wa Yunda yaputuka kuyula.

¹⁷ Ha kuputuka kuyula, wapwile ni makumi atatu a miaka ni miaka yiali, mba wayulile miaka nake mu Yerusaleme.

¹⁸ Wendele mu ndako ja mianangana ja Izalele, ngwe munyachi wa Ahabe, mumu wambachile mwana wa Ahabe. Walingile chipi kumeso ja Yehova.

¹⁹ Hindu Yehova kazangile kwonwona Yunda ha mukunda wa kavumbi kenyi David, se walilakenyene nenyi kumwaha ndeya hali ana jenyi matangwa eswe.

²⁰ Ha matangwa jenyi A-Endome yakatukila A-Yunda, yatusuka kuli ayo, yalitongwela mwanangana wa ayo ene.

²¹ Henaho Jorame yaya ku Zaire ni matemba jenyi eswe hamuwika. Yakatuka ha ufuku, yala mba A-Endome waze amujingilikile, ni tupitau twa matemba, mba atu yachinyina ku mbalaka jo.

²² Chocho A-Endome hakatuka ku kwoko lia A-Yunda ndo musono. Henaho A-Libna yaakatukila mwaka uze wene.

²³ Yitanga yikwo ya Jorame, ni yize yeswe alingile hanayisoneka mu mukanda wa sango ja mianangana ja Yunda.

²⁴ Jorame yaya tulo, yaya kuli tulamba twenyi. Yamufunda mu chihunda cha David hamwe ni tulamba twenyi, mba mwanenyi Ahazia yamuswana mu wanangana.

²⁵ Ha mwaka kumi ni wamuchiali wa Jorame mwana Ahabe mwanangana wa Izalele, Ahazia mwana Jorame mwanangana wa Yunda yaputuka kuyula.

²⁶ Ha kuputuka kuyula Ahazia wapwile ni makumi aali a miaka ni miaka yiali. Wayulile mwaka umuwika mu Yerusaleme. Jina lia naye Atalia, mwana Omiri, mwanangana wa Izalele.

²⁷ Aye wendele mu ndako ja munyachi wa Ahabe nikulinga chipi kumeso ja Yehova ngwe munyachi wa Ahabe, mumu iye te tato-weno wa munyachi wa Ahabe.

²⁸ Aye yaya ni Jorame mwana Ahabe mukwasa jita ni Hazaele mwanangana wa Seria ku Remote-Ngiliate, mba A-Seria yalemeka Jorame.

²⁹ Mwanangana Jorame yahiluka ku Yezerele akamuwuke mbandu jenyi jize amulemekene A-Seria ku Rama, muze ashile jita ni Hazaele mwanangana wa Seria. Mba Ahazia mwana Jorame mwanangana wa Yunda yaya akatale Jorame mwana Ahabe mu Yezerele mumu ha kuyiza chenyi.