1 MIANANGANA 7 - MUKANDA USANDU WA ZAMBI 1975

¹ Mba Elisha yamba ngwenyi, Ivwenu liji lia Yehova. Yehova kanambe ngwenyi, Hamene ha ola yino njongo ya wunga wafufunuka mayilanjisa ha shekele yimuwika, ni njongo jiali ja sevada ha shekele yimuwika mu chikolo cha Samaria.

² Henaho kapitau yoze mwanangana wajaminyine ha kwoko lienyi yakumbulula kuli mutu wa Zambi ngwenyi, Chipwe Yehova masa manjanela mwilu muchihasa kupwa chocho? Elisha ngwenyi, Kumukachimona ni meso je, alioze kuchi kalia.

³ Achi kwapwile malunga awana akwa mbumba mwe mu unjililo wa chikolo; o aliambile umwe kuli mukwo ni mukwo ngwo, Kuchi te tunatwama kuno ndo mutufwa?

⁴ Nyi mutwamba ngwetu, Tunjilenu mu chihunda—kapunga uli mu chihunda; mutufwilamo. Nyi mututwama kuno chizechene, mutufwa nawa. Kashika tuyenu tukalimbilile kuli tujita twa A-Seria. Nyi matulamwina ni mwono, mutumona mwono; nyi matushiha, mutufwa tuhu.

⁵ Yakatuka ha kajimba-usoko akaye ku chilombo cha A-Seria. Alioze ha kuheta ku songo lia chilombo cha A-Seria kumanyi niumwe mutu keshiko.

⁶ Mumu Mwene havwisa tujita twa A-Seria ngwe chinumo cha matemba-a-jita, ni chinumo cha tuvwalu, ngwe chinumo cha chizavu chinene. O yaliamba umwe kuli mukwo ni mukwo ngwo, Mwanangana wa Izalele hafweta kuli mianangana ja A-Hete ni mianangana ja A-Engitu eze akase jita ni yetu.

⁷ Kashika yakatuka nikuchina ha kajimba-usoko. Yahichika mbalaka jo ni tuvwalu two, ni yimbulu jo; chilombo cheswe chizechene lume, yachina akalamwine mwono wo.

⁸ E akwa mbumba ha kuheta ku songo lia chilombo yanjila mu mbalaka yimwe, yalia, yanwa, yatutamo prata ni oru ni mazalo, yaya yayisweka; mba yahiluka, yanjila mu mbalaka yikwo, yatutamo nawa, yaya yayisweka.

⁹ Henaho yaliamba umwe kuli mukwo ni mukwo ngwo, Kutwalingile kanawa. Tangwa lino tangwa lia sango lipema, alioze yetu tunaholo. Nyi mutushimbula ndo chimene nawa, chuma chipi muchituwana. Kashika tuyenu haliapwila twambulwile akwa zuwo lia mwanangana.

¹⁰ Chocho yeza yasanyika kalayi ka chihunda; yamwambulwila ngwo, Twayanga ku chilombo cha A-Seria, kumanyi niumwe mutu keshiko, chipwe liji lia mutu, alioze tuvwalu a kukasa, ni yimbulu a kukasa, ni mbalaka chizechene.

¹¹ Aye yasanyika tulayi, o yambulwila akwa zuwo lia mwanangana muchima.

¹² Mwanangana yahinduka ha ufuku, yamba kuli tuvumbi twenyi ngwenyi, Mungunulweza chize A-Seria anatulingi. Kananyingika zala yetu, kashika hakatuka ku chilombo haya mukuswama mu yambu ngwo, Muze A-Izalele matuhuka mu chihunda mutwakwata amwono, mba mutunjila mu chihunda.

¹³ Umwe kavumbi kenyi yamukumbulula ngwenyi, Ngunalembe, amwe atambule tuvwalu atano waze anasala mu chihunda (kumapwa ngwe mbunga yeswe ya A-Izalele waze asala, hanji mapwa ngwe mbunga ya A-Izalele waze hanafu) tutumenu tuchitale.

¹⁴ Kashika yatambula matemba aali ni tuvwalu; mba mwanangana yatuma kunyima ya tujita twa A-Seria ngwenyi, Yénu nutale.

¹⁵ Yaakaula ndo ku Yordau, yawana jila yeswe ya tò ni mazalo ni yikwachilo yize A-Seria hambila ha kulipupwisa. Mikeji yahiluka, yambulwila mwanangana.

¹⁶ Kashika atu yatuhuka, yapupa chilombo cha A-Seria. Chocho yalanjisa njongo ya wunga wafufunuka ha ndando ya shekele yimuwika, ni njongo jiali ja sevada ha shekele yimuwika, nikulita ni liji lia Yehova.

¹⁷ Mwanangana wasele kapitau yoze iye wajaminyine ha kwoko lienyi akafunge chikolo. Alioze atu amuliachilile mwe mu chikolo, yafwa, ngwe mutu wa Zambi wambile yoze wahanjikile muze mwanangana wapalumukine kuli iye.

¹⁸ Mba chapwile ngwe mutu wa Zambi wambile kuli mwanangana ngwenyi, Njongo jiali ja sevada ha shekele yimuwika, ni njongo yimuwika ya wunga wafufunuka ha shekele yimuwika, muchipwa ha ola yino hamene mu chikolo cha Samaria.

¹⁹ Mba mwe kapitau wakumbulwile kuli mutu wa Zambi ngwenyi, Chipwe Yehova masa manjanela mwilu, te chuma chino muchipwa? Aye yamba ngwenyi, Kumukachimona ni meso je, alioze kuchi kalia.

²⁰ Chocho chapwile kuli iye, mumu atu amuliachilile mu chikolo, yafwa lume.