1 MIANANGANA 6 - MUKANDA USANDU WA ZAMBI 1975

¹ Ana ja aprofeta yamba kuli Elisha ngwo, Chihela chino twatwama kumeso jenu chatukehela naye.

² Tuyenu kama ku Yordau, mutu mweswe akachizeko mukambo umwe, tukalitungileko zuwo lia kutwamamo. Aye yakumbulula ngwenyi, Yénu.

³ Umwe yamba ngwenyi, Tayiza kama, uye hamwe ni yetu tuvumbi twe. Aye yakumbulula ngwenyi, Munguya.

⁴ Chocho yaya hamwe no mba ha kuheta ku Yordau yapakula mitondo.

⁵ Shimbu umwe machiteta mukambo njimbu yenyi yiyisokoka, yiyiholokela mu meya. Aye yateta ngwenyi, Mama yami mwata, njimbu ya mbala.

⁶ Mutu wa Zambi yamba ngwenyi, Kuli yaholokela? Yamulwezaho. Aye yateta mutondo, yaumbilamo, yiukoka chikungo chimane ha meya.

⁷ Aye yamba ngwenyi, Utambule. Chocho yazoza kwoko lienyi yayitambula.

⁸ Achi mwanangana wa Seria te kanase jita ni A-Izalele. Yatwama punga ni tuvumbi twenyi ngwenyi, Ku nganji mungusa chilombo chami.

⁹ Mutu wa Zambi yatuma kuli mwanangana wa Izalele ngwenyi, Keyelenu, kanda nupalika ku nganji, mumu kwenako A-Seria mapalumukina.

¹⁰ Mba mwanangana wa Izalele yatuma kuma kuze mutu wa Zambi yamulweza nikumukeyesa. Yalilamwinako yisuho yinji.

¹¹ Mwanangana wa Seria yalifwita chikolo mu mbunge ha chuma chino. Yasanyika tuvumbi twenyi ngwenyi, Kunuchi kungulweza yoze hakachi ketu uli ha sali lia mwanangana wa Izalele?

¹² Umwe kavumbi kenyi yamba ngwenyi, Hi chocho ko, mwene wami mwanangana. Elisha, mwe profeta yoze uli mu Izalele, iye kakwambulwila mwanangana wa Izalele chipwe maliji aze munuhanjika mu zuwo lia kupomba.

¹³ Mwanangana yamba ngwenyi, Yénu nutale kuze atwama hanga ngutume kumusaka. Yamwambulwila ngwo, Mu Ndotane ali.

¹⁴ Kashika aye yatumako tuvwalu, ni matemba, ni mbunga yinene ya maswalale. Yeza ha ufuku, yaseleka chihunda.

¹⁵ Muze kavumbi ka mutu wa Zambi hahinduka chimene hatuhuka, kumanyi mbunga ya maswalale, ni tuvwalu, ni matemba haseleka chihunda. Kavumbi kenyi yamba kuli iye ngwenyi, Mama yami mwata! Kuchi mutulinga?

¹⁶ Aye yamba ngwenyi, Kanda wivwa woma, mumu waze tuli no anji, o akepe ali no.

¹⁷ Mba Elisha yalemba ngwenyi, Yehova, ngunalembe, lawisa meso jenyi hanga amone. Yehova yalawisa meso ja mukweze; yamona; kumanyi mulundu wazalile tò ni tuvwalu ni matemba a kahia kweswe kwa kujingilika Elisha.

¹⁸ Muze atu aze hakundama, Elisha yalemba kuli Yehova ngwenyi, Ngunalembe, lamba wano atu apwe tupuputa. Yaalamba ni upuputa nikulita ni liji lia Elisha.

¹⁹ Elisha yamba kuli ayo ngwenyi, Jila hi yino ko, chipwe chihunda hi chino ko. Ngukaulenu, mba mungunutwala kuli lunga yoze nunafupu. Yaasongwela ku Samaria.

²⁰ Muze hanjila mu Samaria Elisha yamba ngwenyi, Yehova, lawisa meso ja wano atu amone. Yehova yalawisa meso jo, yamona, kuma mwe muchima lia Samaria ali.

²¹ Mba muze mwanangana wa Izalele haamona yamba kuli Elisha ngwenyi, Ngualambe tata? Ngualambe nyi?

²² Aye yakumbulula ngwenyi, Kuchi kwalamba. Te mulamba waze wakwata ufunge ni katana ke ni uta we nyi? Ahenu kulia ni meya akalie, akanwe, akaye kuli mwata wo.

²³ Yalulika kulia chinji hali ayo, mba muze halia, hanwa, yaecha, yaya kuli mwata wo. Chocho yendo ya A-Seria kejile nawa mu chifuchi cha Izalele.

²⁴ Alioze kulutwe lia yino yuma Mbene-Hadade, mwanangana wa Seria, wakungulwile tujita twenyi eswe, yeza yaseleka Samaria.

²⁵ Mba kwapwile kapunga munene mu Samaria. Yaaseleka ndo ndando ya mutwe wa chimbulu yapwile ya makumi nake a mbongo ja prata; ni chihanda cha ha muchima cha njongo ya pinga ja membe ndando yajo mbongo jitano ja prata.

²⁶ Shimbu mwanangana wa Izalele machipalika ha chipanga-cha-mawe umwe pwo yateta kuli iye ngwenyi, Ngukwasenu kama mwene wami mwanangana.

²⁷ Aye ngwenyi, Nyi Yehova kakukwashile, ami neka mungukukwasa? Shina ku chizungwilo, nyi ku ukamino wa uva?

²⁸ Mwanangana yamba kuli iye ngwenyi, Yika unevu? Pwo yakumbulula ngwenyi, Yono pwo wambile ngwenyi, Hana mwané wa lunga tukamulie musono, mba mutulia niwami hamene.

²⁹ Chocho twatelekele mwanami wa lunga twamulile. Muze hikwacha ami nambile ngwami, Hineha mwané wa lunga tumulie, alioze aye hasweka mwanenyi wa lunga.

³⁰ Ha kwivwa maliji ja pwo mwanangana yasonya mazalo jenyi. Iye te kanapalika ha chipanga-cha-mawe, mba muze atu hamutala kumanyi muchima ha mujimba wenyi kanazala chikeleyi.

³¹ Henaho mwanangana yamba ngwenyi, Nyi mutwe wa Elisha mwana Sefate mapwa nawo musono, Zambi achilinge kuli yami nikuwezaho nawa.

³² Elisha te kanatwama mu zuwo lienyi ni makulwana hamwe nenyi; mba mwanangana yatuma umwe mutu unamana kumeso jenyi. Shimbu mwe mukeji kanda achiheta, Elisha yamba kuli makulwana ngwenyi, Talenu chize yono mwana wa chingalwe hatuma kunguchiza mutwe wami. Muze mukeji maheta ajilenu pito nukamuyikilelio mbe. Te shimbo ja kako kujamukawile?

³³ Shimbu machihanjika no kumanyi mwe mukeji yamuheta. Aye yamba ngwenyi, Chipi chino kuli Yehova chinakatuka. Kuchi mungutwaminyina nawa Yehova?