1 MIANANGANA 5 - MUKANDA USANDU WA ZAMBI 1975

¹ Achi Naamane, kapitau ka tujita twa mwanangana wa Seria, iye mutu munene kumeso ja mwata wenyi, ni mulemu nawa, mumu kuli iye Yehova te hanakumbisa A-Seria; iye chitakame, mukwa hamu nawa, alioze mukwa mbumba.

² A-Seria te hatukuka aku mbunga, aku mbunga, hachiza ku chifuchi cha Izalele umwe mwana-pwo funge, mba iye walingilile pwo lia Naamane.

³ Aye yamba kuli kako ngwenyi, Nyi kachi mwene wami wapwa kuli profeta yoze uli mu Samaria mamuwuka mbumba yenyi.

⁴ Umwe yaya, yambulwila mwene wenyi ngwenyi, Mwana-pwo wa ku chifuchi cha Izalele kanambe Chikachi ni Chinganji.

⁵ Mwanangana wa Seria yamba ngwenyi, Yako nyi, mba mungutuma mukanda kuli mwanangana wa Izalele. Naamane yakatuka nikumbata kumi lia *talentu ja prata, ni tununu asambano a mbongo ja oru, ni kumi lia uzalo.

⁶ Yaneha mukanda kuli mwanangana wa Izalele wa kwamba ngwo, Ha kutambula mukanda uno munyingika ngwe ngunatumu kavumbi kami Naamane kuli yena ukamuwuke mbumba yenyi.

⁷ Muze mwanangana wa Izalele hatanga mukanda yasonya mazalo jenyi ngwenyi, Te nguli Zambi, wakushiha ni kupwisa ni mwono, kashika yono hatuma kuli yami ngukawuke mutu mbumba yenyi. Achi talenu chize kanafupu kuvundula ndombo ni yami.

⁸ Muze Elisha mwe mutu wa Zambi hevwa chize mwanangana wa Izalele hasonya mazalo jenyi, yatuma kuli mwanangana ngwenyi, Kuchi te hiwasonya mazalo je? Eze kuli yami mba manyingika ngwenyi, Kuma profeta mwali mu Izalele.

⁹ Chocho Naamane yeza ni tuvwalu ni matemba, yamana ku chikolo cha zuwo lia Elisha.

¹⁰ Elisha yatuma kanganda kuli iye ngwenyi, Yako usane mu Yordau yisuho shimbiali mba musunya we muwalumuka kuli yena, kumupema.

¹¹ Alioze Naamane yatenuka, yaya lume. Ngwenyi, Ami nanyonga ngwami, matuhuka kuli yami, mamana nikuvuluka jina lia Yehova Zambi yenyi, nikuhungisa kwoko lienyi homa ha musongo, nikuwuka ye mbumba.

¹² Te Abana ni Farpara, njiji ja Ndamaseku, kujapemene kuhiana meya eswe a mu Izalele? Te chichi kuhasa kusanyinamo ngukapeme nyi? Chocho yatewuluka yaya lume ni ufwatulo.

¹³ Alioze tuvumbi twenyi yakundama, yamba kuli iye ngwo, Tate! Nyi profeta hanutuma kulinga chimwe chuma chikalu, te kunuchi kuchilinga? Shinaho chikolo, muze hamba ngwenyi, Sana upeme.

¹⁴ Henaho yapalumuka, yalichupika kashimbiali mu Yordau nikulita ni liji lia mutu wa Zambi, mba musunya wenyi yiwalumuka ngwe musunya wa mwana mukepe, yapema.

¹⁵ Aye yahiluka kuli mutu wa Zambi hamuwika ni atu jenyi eswe; yeza, yamana kumeso jenyi ngwenyi, Haliapwila ngunanyingika ngwami, Kuheshi niumwe Zambi hashi heswe shina mu Izalele. Kashika ngunalembe utambule kama mulambu kuli yami kavumbi ke.

¹⁶ Alioze Elisha yamba ngwenyi, Ni mwono wa Yehova yoze nakumana kumeso jenyi, chichi kutambula nichimwe. Naamane yamushinjika alioze aye kasolo.

¹⁷ Mba Naamane yamba ngwenyi, Nyi chocho ngunalembe ungwehe yami kavumbi ke yiteli yiali ya mula ya mavu, mumu yami kavumbi ke, chize ku musono, chichi kulambula mulambu niumwe wa kulumba chipwe chitapo kuli mazambi eka, ndo kuli Yehova wika.

¹⁸ Alioze ha chuma chino chimuwika Yehova angukonekene kama yami kavumbi ke, ngwami, muze mwata wami maya ku zuwo lia Rimone kuwayila, neye majamina ha kwoko liami ni yami munguhetamina mu zuwo lia Rimone, Yehova angukonekene yami kavumbi ke ha chuma chino.

¹⁹ Aye yamukumbulula ngwenyi, Yako ni sambukila. Chocho yamuhichika hakehe,

²⁰ alioze Ngehaze, kavumbi ka Elisha mutu wa Zambi, yamba ngwenyi, Mwata havwila naye vumbi yono Ka-Seria Naamane se katambwile ku kwoko lienyi chize anehanga! Ni mwono wa Yehova mungumukaula fuji ngutambule chimwe chuma kuli iye.

²¹ Chocho Ngehaze yakaula Naamane mba muze Naamane hamona umwe nikuzomboka kunyima yenyi yasunuka ku temba lienyi amupatwize ngwenyi, Cheswe chinawaha nyi?

²² Aye ngwenyi, Chinawaha. Mwata hangutuma ngwenyi, Haliapwila lume hikweza kuli yami amwe akweze aali, ana ja aprofeta a ku chifuchi cha Eframe ku milundu. Kashika ngunalembe ukaahe *talentu yimwe ya prata ni uzalo uali.

²³ Naamane yamba ngwenyi, Nyi mutá, tambula *talentu jiali. Yamushinjika, yavunga talentu jiali ja prata mu njeke jiali hamwe ni uzalo uali, yayitwika hali ngamba jenyi aali akayitwale kulutwe lienyi.

²⁴ Ha kuheta ku mulundu yayichiza ku moko jo yayitwala mu zuwo, yecha malunga, o yaya.

²⁵ Aye yanjila yamana kumeso ja mwata wenyi. Elisha yamba kuli iye ngwenyi, Ngehaze, kulihi unakatuka? Aye yakumbulula ngwenyi, Ami kavumbi kenu chayile nikumwe.

²⁶ Aye yamba kuli iye ngwenyi, Te mbunge yami kuyayile hamwe ni yena muze lunga akatukanga mu temba lienyi kukupatwiza? Te lino liapwa tangwa lipema kuzuka mbongo, nikuzuka uzalo, ni minda ya olevwe, ni minda ya uva, ni mapanga, ni ngombe, ni ndungo ja malunga ni ja mapwo nyi?

²⁷ Kashika mbumba ya Naamane yikalalaminye kuli yena ni kuli akwa munyachi we ndo ku miaka yeswe. Yatuhuka kumeso ja Elisha mukwa mbumba ngwe neve.