1 MIANANGANA 4 - MUKANDA USANDU WA ZAMBI 1975

¹ Umwe wa kuli mapwo ja ana ja aprofeta yateta kuli Elisha ngwenyi, Kavumbi kenu mukwetu-lunga hanafu, mba nunanyingika kavumbi kenu wevwilile woma Yehova. Haliapwila mukwa mukuli heza kutwala ana jami aali mu undungo.

² Elisha yamba kuli iye ngwenyi, Yika mungukulingila? Chika uli nacho mu zuwo? Aye yamba ngwenyi, Yami kavumbi kenu chishi nichimwe mu zuwo shina mulondo wa maji.

³ Elisha yamba ngwenyi, Yako utambule yikwachilo kuli enyembo je eswe; yikwachilo ya upolongo; tambula yinji.

⁴ Mba munjila ukaliajile hamuwika ni ana je a malunga, ukatehwine mu yikwachilo yeswe. Tumbikila ku lumbu yize yazala.

⁵ Chocho yakatuka kuli iye, yaliajila hamuwika ni ana jenyi a malunga. O amunehenene yikwachilo; aye atehwine.

⁶ Muze yikwachilo hiyazala, pwo yamba kuli mwanenyi ngwenyi, Ngunehene hindu chikwo. Aye yamba kuli naye ngwenyi, Kukushi chikwachilo chikwo. Mba maji yalitwamina.

⁷ Pwo yeza, yambulwila mwe mutu wa Zambi. Aye yamba ngwenyi, Yako ulanjise maji ufwete mukuli we, mba yena ni ana je a malunga nukalitekule ni yize yasala.

⁸ Kwapwile tangwa limwe Elisha kanapalika ku Shuneme kuze kwatwamine umwe pwo mulemu. Mwe pwo washinjikile Elisha atambwileko kulia. Chocho tangwa lieswe apalikileko yanjila atambule kulia.

⁹ Pwo yamba kuli mukwo-lunga ngwenyi, Ngunamono pundu yono wakupalieka kuno matangwa eswe umwe mutu musandu wa Zambi.

¹⁰ Tulinge kama kachipatulo kamwe ha yishimi, tukamuselemo muhela, ni mesa, ni chitwamo, ni chikwachilo cha ndeya, mba muze meza kuli yetu manjilamo.

¹¹ Limwe tangwa yahetako; yanjila mu kachipatulo kenyi, yapomba.

¹² Mba yamba kuli kavumbi kenyi Ngehaze ngwenyi, Yako usanyike yono Ka-Shuneme. Muze hamusanyika yamana kumeso jenyi.

¹³ Aye yamba kuli iye ngwenyi, Amba kuli pwo ngwe, Hiwatuzumbula ni yuma yino yeswe, haliapwila kuchi mutukulingila? Ngukuhanjikile kuli mwanangana, nyi hanji kuli kapitau ka tujita? Pwo yakumbulula ngwenyi, Ngunatwama hakachi ka atu jami.

¹⁴ Aye ngwenyi, Kuchi mutumulingila nyi? Ngehaze ngwenyi, Keshi ni mwana wa lunga, ni mukwo-lunga hapwa mukulwana.

¹⁵ Aye ngwenyi, Musanyike. Muze hamusanyika iye yamana mu chikolo.

¹⁶ Profeta yamba ngwenyi, Ha kakweji yono, muze mwaka waheta nawa, kumukakwata mwana wa lunga. Pwo yamba ngwenyi, Hi chocho ko mwata wami. Ena uli mutu wa Zambi, kanda uhanjika mahuza kuli yami kavumbi ke.

¹⁷ Alioze pwo yaka ufumba, yasema mwana wa lunga ngwe Elisha hamba kuli iye, ha kakweji yoze muze mwaka hiweza.

¹⁸ Muze mwana hakola, limwe tangwa wayile kuli tato kuli akwa kucha.

¹⁹ Yamba kuli tato ngwenyi, Mutwe wamie! Mutwe wamie! Tato yamba kuli ngamba yenyi ngwenyi, Mutwale kuli naye.

²⁰ Muze hamutwala, hamuhetesa kuli naye, yatwama mu kondo yenyi ndo tangwa ha muchima, mba yafwa.

²¹ Aye yakanduka yamupombesa ha muhela wa mutu wa Zambi yamwajililamo, yatuhuka.

²² Yasanyika kuli mukwolunga ngwenyi, Ngutumine kama umwe ngamba, ni umwe chimbulu, nguzomboke kuli mutu wa Zambi ngukeze nawa.

²³ Lunga yamba ngwenyi, Kuchi te muoya kuli iye musono? Kuchapwile kakweji mwaha hanji Sambata. Pwo yamba ngwenyi, E tuhu. Muchiwaha.

²⁴ Yalulika chimbulu, yamba kuli ngamba ngwenyi, Enda! tambuka! kanda ukokolola je fuji shina mungukwambacho.

²⁵ Chocho yenda, yaheta kuli mutu wa Zambi ku mulundu wa Karmela. Mba muze mutu Wa Zambi yamumona kusuku chikolo, yamba kuli kavumbi kenyi Ngehaze ngwenyi, Tala, auze mwe Ka-Shuneme.

²⁶ Zomboka kama umupatwize, wambe kuli iye ngwe, Unahinduka? Ni mukwenu-lunga kanahinduka? Ni mwe mwana kanahinduka? Aye yakumbulula ngwenyi, Tunahinduka.

²⁷ Ha kuheta kuli mutu wa Zambi ku mulundu, yamukwata ku molu. Mba Ngehaze yakundama amukatwiseko. Alioze mutu wa Zambi yamba ngwenyi, Mweche! mumu kupiha anevu mu mbunge, mba Yehova hanguswekelacho, kangulwezele.

²⁸ Henaho pwo yamba ngwenyi, Te nechile mwana wa lunga kuli mwata wami nyi? Chambile ngwami, Kanda ungwonga nyi?

²⁹ Elisha yamba kuli Ngehaze ngwenyi, Lijichike muya we, kwata mulumbu wami mu kwoko uye. Nyi mutakana ni mutu kanda umumeneka. Nyi iye makumeneka, ena kanda umukumbulula. Sako mulumbu wami ha meso ja mwana.

³⁰ Alioze naye ya mwana yamba ngwenyi, Ni mwono wa Yehova, ni mwono wa mbunge ye, chichi kukuhichika. Mba yakatuka, yamukaula.

³¹ Ngehaze yaatetekela, yasa mulumbu ha meso ja mwana. Alioze kukwapwile liji chipwe matwi a kwivwa. Kashika yahiluka, yamupatwiza, yamwambulwila ngwenyi, Mwana kalawile.

³² Muze Elisha haheta ku zuwo mwana hanafu kulu, hanamupombesa ha muhela wenyi.

³³ Kashika yanjila, yajila pito hali ayo aali, yalemba kuli Yehova.

³⁴ Yaya yapomba hali mwana, yasa kanwa lienyi ha kanwa lia mwana, meso jenyi ha meso ja mwana, moko jenyi ha moko ja mwana. Yalitanjilika hali mwana mba musunya wa mwana yiuputuka chivukuminya.

³⁵ Yahiluka yenda mu zuwo aku kamuwika, aku kamuwika, mba yakanduka yalitanjilika hali mwana. Mba mwana yachehula kashimbiali, meso yalaula.

³⁶ Elisha yasanyika Ngehaze ngwenyi, Sanyika mwe Ka-Shuneme. Yamusanyika. Muze aye haheta kuli iye yamba ngwenyi, Tambula mwané.

³⁷ Aye yanjila, yafulamana ku yiliato yenyi, nikuhetamina hashi. Yanda mwanenyi, yatuhuka.

³⁸ Elisha yeza nawa ku Ngilingali alioze kwapwile kapunga mu chifuchi. Ana ja aprofeta atwamine kumeso jenyi. Aye yamba kuli kavumbi kenyi ngwenyi, Alika lundeho utelekele ana ja aprofeta kulia.

³⁹ Umwe yaya mu yambu ahele yilimalima. Yawana lwitwi wa mu yambu; yahela mazungu jaho, hina lienyi lia tò. Yeza, yaatetela mu ndeho ya kulia. Alioze kaanyingikine.

⁴⁰ Chocho yazambwila kulia malunga alie. Shimbu machilia, yateta ngwo, Mutu wa Zambi, muli kufwa mu ndeho. Kahashile kuliamo.

⁴¹ Aye yamba ngwenyi, Nehenu wunga nyi. Yaumbila mu ndeho. Aye yamba ngwenyi, Hanenu kuli e atu alie. Kumwapwile Utoji niumwe mu ndeho.

⁴² Kwakatukile umwe lunga ku Mbale-Shalisha nikuneha kuli mutu wa Zambi mbolo ya mihuko yitangu, makumi aali a mbolo ja sevada, ni njeke ya mbuto ya wisu. Elisha yamba ngwenyi, Hanenu kuli atu, alie.

⁴³ Alioze kavumbi kenyi yamba ngwenyi, Kuchi? Te munguhasa kusa kulia chino kumeso ja kulakaji lia malunga? Alioze yamba ngwenyi, Hanenu kuli atu, alie, mumu Yehova kanambe ngwenyi, Kumalia, kumahichika kulia.

⁴⁴ Chocho yachisa kumeso jo. O yalia, yahichika kulia nikulita ni liji lia Yehova.