1 MIANANGANA 3 - MUKANDA USANDU WA ZAMBI 1975

¹ Jorame mwana Ahabe yaputuka kuyula A-Izalele mu Samaria ha mwaka kumi ni wamuchinake wa Yehosofate mwanangana wa Yunda. Wayulile kumi lia miaka ni miaka yiali.

² Walingile chipi kumeso ja Yehova. Hindu kapwile ngwe tato hanji naye, mumu yachiza kaponya ka Mbale yoze tato walingile.

³ Alioze walalaminyine ku milonga ya Jeroboame mwana Nebate, yize avulumwishine nayo A-Izalele. Kayechele.

⁴ Mesha mwanangana wa Moape aye te mukwa mapanga. Walambwile kuli mwanangana wa Izalele wona wa kulakaji lia tununu twa ana-mapanga, ni wa kulakaji lia tununu twa kuji a mapanga.

⁵ Alioze muze Ahabe hafwa, mwanangana wa Moape wakatukilile mwanangana wa Izalele.

⁶ Kashika mwanangana Jorame yakatuka ku Samaria ha matangwa aze, yakungulula A-Izalele eswe.

⁷ Yatuma kuli Yehosofate mwanangana wa Yunda ngwenyi, Mwanangana wa Moape hangukatukila. Muoya ni yami tukase jita ni A-Moape nyi? Aye ngwenyi, Munguya. Ami napwa chimuwika ni yena; atu jami ngwe atu je; tuvwalu twami ngwe tuvwalu twe.

⁸ Aye ngwenyi, Jila yika mutuyila? Yakumbulula ngwenyi, Jila ya puya ya Endome.

⁹ Chocho mwanangana wa Izalele yaya, ni mwanangana wa Yunda, ni mwanangana wa Endome; yakondoloka wenyi wa matangwa shimbiali; kukwapwile meya a kunwa hali tujita chipwe hali yimuna aze aakawile.

¹⁰ Mwanangana wa Izalele yamba ngwenyi, Mama yami! Yehova hakungulula wano mianangana atatu hamuwika hanga aakunjike mu moko ja A-Moape.

¹¹ Alioze Yehosofate yamba ngwenyi, Kukushi umwe profeta wa Yehova tukahule Yehova kuli iye? Umwe kavumbi ka mwanangana wa Izalele yakumbulula ngwenyi, Elisha mwana Sefate kwali, yoze watehwine meya ha moko ja Eliya.

¹² Yehosofate ngwenyi, Liji lia Yehova kali nalio. Chocho mwanangana wa Izalele, ni Yehosofate, ni mwanangana wa Endome yaya kuli iye.

¹³ Elisha yamba kuli mwanangana wa Izalele ngwenyi, Chika nguli nacho ni yena? Yako kuli aprofeta ja tatenu ni aprofeta ja noko. Mwanangana wa Izalele yamba kuli iye ngwenyi, Hi chocho ko, mumu Yehova hakungulula wano mianangana atatu hamuwika akaakunjike mu moko ja A-Moape.

¹⁴ Elisha yamba ngwenyi, Ni mwono wa Yehova-wa-Tujita, kumeso jenyi nakumana, pundu ngwami, nyi chalemesene yono Yehosofate, mwanangana wa Yunda, kachi kuli yena chipwe meso kachi chaatalikishile, chipwe kukumona.

¹⁵ Alioze haliapwila ngunehenenu umwe njimba. Mba shimbu njimba machimba chisaji kwoko lia Yehova yiliza hali iye.

¹⁶ Yamba ngwenyi, Yehova kanambe ngwenyi, Takanyisenu chana chino cheswe ni tupila.

¹⁷ Mumu Yehova kanambe ngwenyi, Kunuchi kumona fuji, chipwe vula, hindu chana chino muchikazala ni meya. Kumunukanwa, ni yenu, ni yimuna jenu, ni tushitu twenu.

¹⁸ Chuma chino chilelu kumeso ja Yehova; kumakakunjika A-Moape mu moko jenu nawa.

¹⁹ Kumunukapupa chihunda cheswe cha chipanga, ni chihunda cheswe chipema, munupakula mutondo weswe upema, nikushikila mafuji eswe a meya, minda yeswe yipema munuyilumbula ni mawe.

²⁰ Kumanyi, ha chimenemene, ngwe ha ola ya kulambula mulambu wa tangwa ha tangwa, kwejilile meya sali lia Endome, mba chifuchi cheswe chazalile ni meya.

²¹ Muze A-Moape eswe hevwa ngwo, Mianangana heza kwasa jita ni yetu, Yalikungulula hamuwika, waze eswe te anahase kuzala mazalo a utale, ni makulwana, yamanyina ku njiza.

²² Yahinduka chimenemene, mba mwalwa unatemukina ha meya, mba A-Moape yamona meya mu sali kuchila ngwe manyinga.

²³ O yamba ngwo, Manyinga! Mianangana halionwona, halilamba mutu ni mukwo. Kashika, enu A-Moape, tatuyenu ku upite!

²⁴ Alioze ha kuheta ku chilombo cha Izalele, A-Izalele yakatuka yalamba A-Moape chocho yachina kulutwe lio. A-Izalele yasenya mu chifuchi nikulamba A-Moape.

²⁵ Yapuzula yihunda; mutu mweswe yambilamo liwe lienyi mu minda yipema ndo hiyalumbuka, yashikila mafuji eswe a meya; yapakula mitondo yeswe yipema. Ku Kiri-Haresete wika yahichika mawe jacho, hindu akwa kukonga achiselekele nikuchipupa.

²⁶ Muze mwanangana wa Moape hamona ngwenyi, Jita yino yangukalila naye, yakungulula kulakaji shimbiali a malunga akwa katana akapule ndo kuli mwanangana wa Endome. Alioze kahashile.

²⁷ Henaho yatambula mwanenyi wa mukulwana, mwe swana, yamutenga mulambu wa kulumba ha chipanga-cha-mawe. Kwapwile ufwatulo wunji hali A-Izalele. Chocho yamwecha yahiluka ku chifuchi cho ene.