1 MIANANGANA 25 - MUKANDA USANDU WA ZAMBI 1975

¹ Ha mwaka wamuchilivwa wa kuyula chenyi ha kakweji wamuchikumi ni tangwa liamuchikumi lia kakweji Nabukanezore mwanangana wa Babilonia yeza ni tujita twenyi eswe kulimika ni Yerusaleme. Yasa chilombo chenyi kulimika nacho; yatunga mbonge kweswe kwa kujingilika.

² Chocho aselekele chihunda ndo mwaka kumi ni kashi wa mwanangana Zedekia.

³ Ha tangwa liamuchilivwa lia kakweji wamuchiwana zala yapwile yinji mu chihunda; kukwapwile mbolo hali akwa chifuchi.

⁴ Henaho yalokola chipanga cha chihunda, mba tujita eswe yachina ha ufuku jila ya chikolo cha hakachi ka yipanga yiali kwe ku munda wa mwanangana. (A-Kaletea o analimika ni chihunda kweswe kwa kujingilika), mba mwanangana yayila jila ya ku Arapa.

⁵ Alioze tujita twa A-Kaletea yahanga mwanangana; yamuwana mu yana ya Yeriku, mba tujita twenyi eswe amumwanganyine mwamwa.

⁶ Yakwata mwanangana, yamutwala kuli mwanangana wa Babilonia ku Ribila. Kwenako amusopeselele.

⁷ Yashiha ana ja Zedekia a malunga kumeso jenyi, mba yamulokola meso jenyi. Yamukashila mu malenge; yamutwala ku Babilonia.

⁸ Ha kakweji wamuchitano ha tangwa liamuchishimbiali lia kakweji (mwaka kumi ni wamuchilivwa wa Nabukanezore mwanangana wa Babilonia) kwejile Nabuzaradane kapitau ka tulayi, kavumbi ka mwanangana wa Babilonia ku Yerusaleme.

⁹ Yocha zuwo lia Yehova, ni zuwo lia mwanangana. Mazuwo eswe a mu Yerusaleme, e mazuwo eswe anene yaocha ni kahia.

¹⁰ Mba maswalale aze eswe ja A-Kaletea waze ejile ni kapitau ka tulayi apuzwile yipanga-ya-mawe ya Yerusaleme kwa kujingilika.

¹¹ Atu aze asalile mu chihunda, ni waze alikunjikile kuli mwanangana wa Babilonia, masalila a mbunga, Nabuzaradane kapitau ka tulayi yaambata funge.

¹² Alioze mwe kapitau ka tulayi yahichika yiswale a chifuchi apwe akwa kululika mitondo ya uva ni akwa kulima.

¹³ Ni manguji a unengu a mu zuwo lia Yehova ni yimanyino ni lutanke lwa unengu ya mu zuwo lia Yehova, A-Kaletea yayipalwola nikumbata unengu wayo ku Babilonia.

¹⁴ Ni ndeho, ni mapá, ni mana, ni nguto, ni yikwachilo yeswe ya unengu ya uvumbiko, yayimbata.

¹⁵ Ni yikombelo, ni mbasia, ni yeswe yapwile ya oru, ni yeswe yapwile ya prata, kapitau ka tulayi yayimbata.

¹⁶ Manguji aali, ni lutanke umuwika, ni yimanyino Solomone walingilile zuwo lia Yehova; unengu wa yino yuma yeswe kahashile kuyipezalisa.

¹⁷ Chizundamo cha nguji limuwika kumi lia mbandu ni mbandu nake, ni chipangula cha unengu helu. Usuhe wa chipangula mbandu jitatu. Chapwile ni milimo ya kuseleka ni mihuko ya romana ha chipangula kweswe kwa kujingilika, yeswe ya unengu. Ni nguji liamuchiali chimuwika liapwile ni ye milimo ya kuseleka.

¹⁸ Kapitau ka tulayi yakwata Seraia sasendote mukwa lutwe, ni Zefania sasendote wamuchiali, ni atatu akwa kufunga mapito.

¹⁹ Ku chihunda yakwata umwe kapitau helu lia akwa jita; ni malunga atano a waze amwene meso ja mwanangana waze yaawana mu chihunda; ni mukwa kusonyeka, te kapitau ka tujita yoze wasanyikine atu a chifuchi; ni makumi asambano a malunga akwa chifuchi yaawana mu chihunda.

²⁰ Nabuzaradane kapitau ka tulayi yaatwala kuli mwanangana wa Babilonia mu Ribila.

²¹ Mwanangana wa Babilonia yaalamba, yaashiha mu Ribila mu chifuchi cha Hamate. Chocho yachiza Yunda mu chifuchi chenyi nikumutwala funge.

²² Ha kutwala kuli atu aze asalile mu chifuchi cha Yunda, waze te Nabukanezore mwanangana wa Babilonia hanahichika, hali ayo wasele Gedalia mwana Ahikame mwana Shafane akapwe mukwa kwayula.

²³ Muze tupitau twa tujita ni atu jo hevwa ngwo, Mwanangana wa Babilonia hasela Gedalia kuyula, yeza kuli Gedalia ku Mizepa; Ishemali mwana Netania, ni Johanane mwana Karea, ni Seraia mwana Tanumete Ka-Netofate, ni Jazania mwana wa mwe Ka-Maka, o eswe ni atu jo.

²⁴ Gedalia yalishinga kuli ayo ni kuli atu jo ngwenyi, Kanda nuvwila woma atu ja A-Kaletea. Twamenu mu chifuchi nukalingile mwanangana wa Babilonia, mba yuma yeswe muyipwa kanawa kuli yenu.

²⁵ Ahoze ha kakweji wamuchishimbiali Ishemali mwana Netania mwana Elisama wa munyachi wa wanangana yeza ni kumi lia malunga; yalamba Gedalia mba iye yafwa hamwe ni A-Yunda ni A-Kaletea aze apwile no ku Mizepa.

²⁶ Mba atu eswe, akepe ni anene, ni tupitau twa tujita yakatuka, yachinyina ku Engitu mumu evwile woma wa A-Kaletea.

²⁷ Ha mwaka makumi atatu ni wamuchishimbiali wa ufunge wa Jehoachine mwanangana wa Yunda, ni ha kakweji kumi ni wamuchiali, ni ha tangwa makumi aali ni liamuchishimbiali lia kakweji, mwe Evile-Merodake mwanangana wa Babilonia, ha mwaka yaputuka kuyula, wachijile Jehoachine mwanangana wa Yunda mu zuwo lia ususu.

²⁸ Yahanjika nenyi ni vumbi; yasa ngunja yenyi helu lia ngunja ja mianangana akwo aze apwile nenyi mu Babilonia.

²⁹ Yazula mazalo jenyi ja zuwo lia ususu. Matangwa eswe a mwono wenyi walile ku mesa ya mwanangana.

³⁰ Mba ha mbongo amuselele mbongo ja tangwa ha tangwa ja kuli mwanangana, tangwa ha tangwa, mbongo matangwa eswe a mwono wenyi.