1 MIANANGANA 24 - MUKANDA USANDU WA ZAMBI 1975

¹ Ha matangwa jenyi Nabukanezore mwanangana wa Babilonia yeza, mba Jehoakime walumukine mukwa kumwononokena miaka yitatu; mba henaho yalumuka nawa, yamukatukila.

² Yehova yatuma kulimika nenyi mbunga ja A-Kaletea, ni mbunga ja A-Seria, ni mbunga ja A-Moape, ni mbunga ja A-Amone. Yaatuma kulimika ni A-Yunda akaonwone nikulita ni liji lia Yehova lize ahanjikile kuli tuvumbi twenyi aprofeta.

³ Pundu chino yichiza hali A-Yunda mumu Yehova yachituma akaachize kumeso jenyi mumu ha milonga ya Manase nikulita ni yize yeswe alingile,

⁴ ni ha manyinga aze amwangine chitela chakuhi. Mumu wazalishile Yerusaleme ni manyinga keshi chitela, mba Yehova kasolo kuchikonekena.

⁵ Yitanga yikwo ya Jehoakime ni yize yeswe alingile hanayisoneka mu mukanda wa sango ja mianangana ja Yunda.

⁶ Chocho Jehoakime yaya tulo, yaya kuli tulamba twenyi, mba mwanenyi Jehoachine yamuswana mu wanangana.

⁷ Mwanangana wa Engitu kakatukile nawa mu chifuchi chenyi, mumu mwanangana wa Babilonia watambwile cheswe chapwile cha mwanangana wa Engitu, chize ku lwiji wa Engitu ndo ku lwiji Ufrateze.

⁸ Ha kuputuka kuyula Jehoachine wapwile ni kumi lia miaka ni miaka nake. Wayulile mu Yerusaleme tukweji atatu. Jina lia naye Nehushita mwana Elenatane wa ku Yerusaleme.

⁹ Walingile chipi kumeso ja Yehova nikulita ni yize yeswe tato halinga.

¹⁰ Ha mwaka uze atu ja Nabukanezore mwanangana wa Babilonia yeza ku Yerusaleme, yaseleka chihunda.

¹¹ Nabukanezore mwanangana wa Babilonia yeza ku Yerusaleme shimbu atu jenyi machiseleka,

¹² mba Jehoachine mwanangana wa Yunda yatuhuka kuli mwanangana wa Babilonia, ni mwene, ni naye, ni tuvumbi twenyi, ni alemu jenyi, ni tupitau twenyi. Chocho mwanangana wa Babilonia yamukwata ha mwaka wamuchinake wa kuyula chenyi.

¹³ Mba yachizako upite weswe wa zuwo lia Yehova, ni wa zuwo lia mwanangana. Yateta yipinji yikwachilo yeswe ya oru yize Solomone mwanangana wa Izalele walingile mu tembele ya Yehova, nikulita ni liji lia Yehova.

¹⁴ Yambata atu eswe a mu Yerusaleme, ni alemu eswe, ni akwa tachi ni hamu eswe, kumi lia tununu a funge, ni yilangaji ni fuli. Niumwe wasalile shina yiswale wika a mu chifuchi.

¹⁵ Yambata Jehoachine ku Babilonia; ni naye ya mwanangana, ni mapwo ja mwanangana, ni tupitau twenyi, ni akwa lutwe a mu chifuchi, yaachiza ku Yerusaleme yaatwala funge ku Babilonia.

¹⁶ Ni malunga eswe a ndundo tununu shimbiali, ni yilangaji ni fuli kanunu umuwika, eswe akwa tachi, eswe te a kuya ku jita, e aze mwanangana wa Babilonia yatwala ku chifuchi chenyi funge.

¹⁷ Mba mwanangana wa Babilonia yapwisa mwanakwo wa tato, Matania, mwanangana kumusalakana. Aye jina lienyi yalialumuna ngwenyi, Zedekia.

¹⁸ Ha kuputuka kuyula Zedekia wapwile ni makumi aali a miaka ni mwaka umuwika. Wayulile kumi lia miaka ni mwaka umuwika mu Yerusaleme. Jina lia naye Hamutala mwana Jeremia wa ku Libna.

¹⁹ Walingile chipi kumeso ja Yehova nikulita ni yize yeswe Jehoakime walingile.

²⁰ Mumu ha mukunda wa utenu wa Yehova chino cheswe chejile ha Yerusaleme ni hali A-Yunda akaachize kumeso jenyi. Mba Zedekia yakatukila mwanangana wa Babilonia.