1 MIANANGANA 23 - MUKANDA USANDU WA ZAMBI 1975

¹ Mwanangana yatuma mba yakungulula kuli iye makulwana eswe a Yunda ni Yerusaleme.

² Mwanangana yaya ku zuwo lia Yehova ni malunga eswe a Yunda ni A-Yerusaleme eswe hamwe nenyi, ni asasendote, ni aprofeta, ni atu eswe akepe ni anene. Aye yatanga mu matwi jo maliji eswe a mukanda wa usendo uze awanyine mu zuwo lia Yehova.

³ Mba mwanangana yamana ku nguji, yakolesa usendo kumeso ja Yehova kukaula Yehova, kufunga shimbi jenyi ni Shindakenyo jenyi ni yiyulo yenyi ni mbunge yenyi yeswe, ni mwono wenyi weswe, nikukolesa maliji a usendo uno asonewene mu mukanda. Atu eswe atayijile usendo.

⁴ Mwanangana yatuma Hilekia sasendote mukwa lutwe, ni asasendote a ngango yamuchiali, ni akwa kufunga mapito, akachize mu tembele ya Yehova yikwachilo yeswe halingila Mbale ni Ashera ni mbunga yeswe ya mwilu. Yayocha haze lia Yerusaleme mu yambu ku Kendrone, mba yatwala uto wayo ku Mbetele.

⁵ Yamanununa asasendote ja mahamba, waze mianangana ja Yunda hatongola kwocha insensu ha manangamo mu yihunda ya Yunda, ni mu yihela ya kujingilika Yerusaleme; ni waze nawa ochelele insensu Mbale, ni tangwa, ni kakweji, ni matongonoshi anene ni mbunga yeswe ya mwilu.

⁶ Yachiza Ashera mu zuwo lia Yehova haze lia Yerusaleme ku chitwetwe Kendrone, mba yamwocha kwe ku chitwetwe Kendrone; yamufwenya wungawunga, mba yalakumwina wunga uze ha mafuka ja atu amokomoko.

⁷ Yapuzula mazuwo ja tutumwa waze apwile mu zuwo lia Yehova kuze mapwo aselekele mahina ja Ashera.

⁸ Yachiza asasendote eswe ku yihunda ya Yunda; yachisa manangamo haze asasendote ochelele insensu, chize ku Ngeba ndo ku Mbia-shipa. Yapuzula manangamo a yikolo, aze apwile ku unjililo wa chikolo cha Yoshua mukwa kuyula chihunda, aze te apwile ha sali lia chimeso ku chikolo cha chihunda.

⁹ Hindu asasendote a manangamo kakundamine ku chilumbilo cha Yehova mu Yerusaleme, alioze alile mbolo kuyishi futunwiso hakachi ka akwo.

¹⁰ Yachisa nawa Tofete yize yapwile mu chikulo cha A-Hinome hanga niumwe mapalikisa mwanenyi wa lunga hanji wa pwo mu kahia kuli Moleke.

¹¹ Yachiza nawa tuvwalu aze mianangana ja Yunda hahana kuli tangwa ha unjililo wa zuwo lia Yehova, ku zuwo lia Natane-Meleke, iye mukwa kufunga zuwo, katwama muchima. Yocha nawa matemba a tangwa.

¹² Yilumbilo yize yapwile ha fulumba ya zuwo lia Ahaze lia kwilu, yize te mianangana ja A-Yunda halinga, ni yilumbilo yize Manase halinga mu maze aali a zuwo lia Yehova, mwanangana yayinungwinako, yayifwenya nikumbila we wunga wayo mu chitwetwe cha Kendrone.

¹³ Manangamo aze apwile kulutwe lia Yerusaleme, aze apwile ha sali lia chindume lia mulundu wa luchisa, te Solomone mwanangana wa Izalele waatungile hali Asatarote chizelwokeso cha A-Sendone, ni hali Chemoshe chizelwokeso cha A-Moape, ni hali Milikome chizelwokeso cha A-Amone, o nawa mwanangana yachisa.

¹⁴ Yapalwola tuponya; yateta Ashera nikusalakanyisako yifwaha ya afu.

¹⁵ Chikwo nawa chilumbilo chize chapwile ku Mbetele, ni lie nangamo Jeroboame mwana Nebate watungile, yoze wavulumwishine A-Izalele, chipwe chilumbilo chize ni nangamo yapuzula. Yocha lie nangamo, yalifwenya wunga; yocha mwe Ashera.

¹⁶ Ha kutewulukako, Josia yamona mafuka aze apwile mu mulundu. Yatuma kuchiza yifwaha mu mafuka, yayocha ha chilumbilo akachichise nikulita ni liji lia Yehova lize mutu wa Zambi wambile ha kutwala ku yino yuma.

¹⁷ Mba yamba ngwenyi, Chinyingi chize ngunamono chika? Akwa chihunda ngwo, Fuka lia mutu wa Zambi yoze wakatukile ku Yunda nikwambulula yino yuma yena walinga ku chilumbilo cha Mbetele.

¹⁸ Aye yamba ngwenyi, Mweche. Niumwe akwate ku yifwaha yenyi. Kashika echele yifwaha yenyi hamwe ni yifwaha ya profeta yoze wakatukile ku Samaria.

¹⁹ Mazuwo eswe a manangamo apwile mu yihunda ya Samaria, aze mianangana ja Izalele atungile mukwihia Yehova atenuke, Josia yaachiza nawa. Yaalinga chizechene ngwe halinga ku Mbetele.

²⁰ Yashiha ha yilumbilo asasendote eswe a manangamo awanyineko, nikwochelaho yifwaha ya afu. Mba yahiluka ku Yerusaleme.

²¹ Mwanangana yatuma atu eswe ngwenyi, Fungenu Chizomboka cha Yehova Zambi yenu ngwe chinasonewa mu mukanda wa usendo.

²² Pundu kukwapwile Chizomboka chipwa haha chize ku matangwa a Akwa Kuyula waze ayulile Izalele, chipwe ha matangwa eswe a mianangana ja Izalele, chipwe a mianangana ja Yunda.

²³ Alioze ha mwaka kumi ni nake wa mwanangana Josia afungile Chizomboka chino kuli Yehova mu Yerusaleme.

²⁴ Chikwo nawa waze eswe apwile ni mahamba, ni akwa umbanda, ni terafimi, ni tuponya, ni yizelwokeso yize yeswe awanyine mu chifuchi cha Yunda ni mu Yerusaleme, Josia yayichiza akalite ni maliji a shimbi aze a kusoneka mu mukanda sasendote Hilekia wawanyine mu zuwo lia Yehova.

²⁵ Kukwapwile umwe mwanangana kushi kulifwa nenyi. Yatewulukila kuli Yehova ni mbunge yenyi yeswe, ni mwono wenyi weswe, ni ndundo jenyi jeswe nikulita ni shimbi jeswe ja Mose. Chipwe kulutwe lienyi niumwe wasolokele wa kulifwa nenyi.

²⁶ Chipwe chocho Yehova kambilile kusasaminya cha ufwatulo wenyi unene uze wakasumukine ni utenu hali A-Yunda mumu ha milonga yize Manase wamwihile nayo.

²⁷ Yehova yamba ngwenyi, Munguchiza Yunda kumeso jami ngwe nachijile Izalele. Mungumbila chihunda chino cha kutongola, ngwami, Yerusaleme, ni zuwo lino, nambile ngwami, Jina liami kumulikapwako.

²⁸ Yitanga yikwo ya Josia ni yize yeswe alingile hanayisoneka mu mukanda wa sango ja mianangana ja Yunda.

²⁹ Ha matangwa jenyi Falau-Neko, mwanangana wa Engitu wayile ku lwiji Ufrateze mukwasa jita ni mwanangana wa Asuria. Mba mwanangana Josia wayile kulimika nenyi. Alioze ha kulitala meso, mwanangana wa Engitu yashiha Josia ku Megidu.

³⁰ Tuvumbi twenyi yamumbata mufu mu temba chize ku Megidu ndo ku Yerusaleme. Yamufunda mu fuka lienyi mwene. Akwa chifuchi atambwile Jehoahaze mwana Josia; yamuwayisa ni maji nikumupwisa mwanangana kusalakana tato.

³¹ Ha kuputuka kuyula Jehoahaze wapwile ni makumi aali a miaka ni miaka yitatu. Wayulile tukweji atatu mu Yerusaleme. Jina lia naye Hamutala mwana Jeremia wa ku Libna.

³² Walingile chipi kumeso ja Yehova nikulita ni yize yeswe tulamba twenyi halinga.

³³ Falau-Neko yamukashila mu Ribila mu chifuchi cha Hamate kumuchinda kuyula mu Yerusaleme; yafwetesa nawa che chifuchi milambu ya kulakaji lia *talentu ja prata ni *talentu yimuwika ya oru.

³⁴ Falau-Neko yasalakanyisa Eliakimi mwana Josia mu wanangana wa tato Josia. Yalumuna jina lienyi ngwenyi, Jehoakime, alioze yachiza Jehoahaze; yamutwala ku Engitu, kwenako yafwila.

³⁵ Jehoakime yahana prata ni oru kuli Falau, alioze yafwetesa akwa chifuchi akahane je mbongo nikulita ni shimbi ja Falau. Yachiza prata ni oru kuli akwa chifuchi, mutu mweswe nikulita ni lijimu lia kusoneka, akajihane kuli Falau-Neko.

³⁶ Ha kuputuka kuyula Jehoakime wapwile ni makumi aali a miaka ni miaka yitano. Wayulile kumi lia miaka ni mwaka umuwika mu Yerusaleme. Jina lia naye Zebuda mwana Pedaia wa ku Ruma.

³⁷ Walingile chipi kumeso ja Yehova nikulita ni yize yeswe tulamba twenyi halinga.