1 MIANANGANA 22 - MUKANDA USANDU WA ZAMBI 1975

¹ Ha kuputuka kuyula Josia wapwile ni miaka nake, mba wayulile makumi atatu a miaka ni mwaka umuwika mu Yerusaleme. Jina lia naye Jedida mwana Adaia wa ku Bozekata.

² Aye walingile chipema kumeso ja Yehova. Wendele mu ndako jeswe ja kalamba kenyi David, kahambulukile chipwe ku chindume chipwe ku chimeso.

³ Ha mwaka kumi ni wamuchinake wa mwanangana Josia iye yatuma mukwa kusonyeka Shafane mwana Azalia mwana Meshulame ku zuwo lia Yehova ngwenyi,

⁴ Yako kuli sasendote mukwa lutwe Hilekia akafutule mbongo jize akuneha ku zuwo lia Yehova, akwa kufunga mapito kakutambula kuli atu.

⁵ Ajihane kuli akwa milimo waze akulayila zuwo lia Yehova kululika yituwa yize yili mu zuwo.

⁶ Ajihane kuli akarpinteru, ni akwa kutunga, ni apedreru; ni ha kulanda mitondo ni mawe a kupula kululika zuwo.

⁷ Alioze kalingile no konta ja mbongo jize aahele mumu alingile ni mbunge ja ululi.

⁸ Sasendote mukwa lutwe Hilekia yamba kuli Shafane mukwa kusonyeka ngwenyi, Hinawana mukanda wa shimbi mu zuwo lia Yehova. Hilekia yakunjika mukanda kuli Shafane, mba yautanga.

⁹ Mukwa kusonyeka Shafane yaneha liji kuli mwanangana nawa ngwenyi, Tuvumbi twenu hachiza mbongo jize awanyine mu zuwo, hajihana kuli akwa milimo waze akulayila zuwo lia Yehova.

¹⁰ Mba Shafane mwe mukwa kusonyeka yambulwila mwanangana ngwenyi, Sasendote Hilekia hangwaha mukanda. Shafane yautanga kumeso ja mwanangana.

¹¹ Muze mwanangana hevwa maliji a mu mukanda wa shimbi wasonyene mazalo jenyi.

¹² Mba mwanangana yatuma sasendote Hilekia, ni Ahikame mwana Shafane, ni Akopore mwana Mikaia, ni mukwa kusonyeka Shafane, ni Asaia kavumbi ka mwanangana, ngwenyi,

¹³ Yénu nukanguhulile Yehova hali yami, ni hali e atu, ni hali A-Yunda eswe ha kutwala ku maliji a mukanda uno hauwana. Mumu ufwatulo wa Yehova uze unakasumukina hali yetu wapwa unene, mumu atata kapanjikile maliji a mukanda uno akalinge yize yeswe yasonewenamo hali yetu.

¹⁴ Chocho Hilekia mwe sasendote, ni Ahikame, ni Akopore, ni Shafane, ni Asaia yaya kuli mwe profeta Huleda pwo lia Shalume mwana Tikiva mwana Harahasa mukwa kufunga uzalo; (aye yatwama mu Yerusaleme mu chihanda chamuchiali) mba o yahanjika nenyi.

¹⁵ Huleda yamba kuli ayo ngwenyi, Yehova Zambi ya Izalele kanambe ngwenyi, Ambulwilenu lunga yoze wanutumanga kuli yami ngwenu,

¹⁶ Yehova kanambe ngwenyi, Munguneha chipi homa hano, ni hali atu jaho, chipwe maliji eswe a mu mukanda mwanangana wa Yunda hatanga.

¹⁷ Mumu hanangwehuka; hanochela insensu kuli mazambi akwo eka, akangwihie ngutenuke ni yitanga yeswe ya moko jo. Kashika utenu wami muukasumukina homa hano, mba kuuchikahola.

¹⁸ Alioze kuli mwanangana wa Yunda, yoze wanutumanga kuhula Yehova, ambenu kuli iye ngwenu, Yehova Zambi ya Izalele kanambe ngwenyi, Ha kutwala ku maliji wano hiwevwa,

¹⁹ mumu mbunge ye yapwa yovu, hiwalikehesa kumeso ja Yehova ha kwivwa chize hinamba cha kulimika ni homa hano, ni atu jaho eswe, ngwami, muhapwa chihela cha hululu, muhapwa nawa shingo; hiwasonya mazalo je, hiwalila kumeso jami; ni yami nawa hinakupanjika, ngwenyi Yehova.

²⁰ Kashika mungukutwala kuli tulamba twe. Kumuoya ku fuka lie ni sambukila. Chipwe meso je kechi kamona chipi chize munguneha homa hano. Yanehena mwanangana liji.