1 MIANANGANA 21 - MUKANDA USANDU WA ZAMBI 1975

¹ Ha kuputuka kuyula Manase wapwile ni kumi lia miaka ni miaka yiali, mba wayulile makumi atano a miaka ni miaka yitano mu Yerusaleme. Jina lia naye Hefeziba.

² Walingile chipi kumeso ja Yehova nikulita ni yizelwokeso ya mavungu aze Yehova wahumine kumeso ja A-Izalele.

³ Watungile cheka nawa manangamo aze tato Hezekia wapuzwile. Watungile yilumbilo kuli Mbale; walingile umwe Ashera ngwe Ahabe mwanangana wa Izalele. Wawayilile mbunga yeswe ya mwilu nikwalingila.

⁴ Watungile yilumbilo mwe mu zuwo lia Yehova kuze Yehova te hamba ngwenyi, Mu Yerusaleme mungusa jina liami.

⁵ Watungile yilumbilo ya mbunga yeswe ya mwilu mu maze aali a zuwo lia Yehova.

⁶ Wapalikishile mwanenyi wa lunga mu kahia. Watahile ngombo; walingile umbanda; wayile kuli akwa mahamba ni kuli akwa wanga; walingile yipi yinji kumeso ja Yehova kumwihia atenuke.

⁷ Wamikine kaponya umwe wa kwola wa Ashera mu zuwo lize Yehova wambile kuli David ni kuli mwanenyi Solomone ngwenyi, Mungusa jina liami ndo ku miaka yeswe mu zuwo lino mwe mu Yerusaleme, kuno natongwele hakachi ka mavungu eswe a Izalele.

⁸ Chichi kwendesa molu ja A-Izalele haze lia chifuchi chino nahanyine kuli tulamba two nyi manyonga kulinga yize yeswe naatumine, nikulita nawa ni shimbi jize jeswe kavumbi kami Mose waatumine.

⁹ Alioze kapanjikile, ni Manase yaonga alinge chipi kuhiana mavungu aze Yehova wonwene kumeso ja A-Izalele.

¹⁰ Mba Yehova yahanjika kuli tuvumbi twenyi aprofeta ngwenyi,

¹¹ Mumu Manase mwanangana wa Yunda halinga yizelwokeso yino; halinga ungulungulu kuhiana yize yeswe A-Amore alingile, waze ahangile, havulumwisa nawa A-Yunda ni tuponya twenyi,

¹² kashika Yehova Zambi ya Izalele kanambe ngwenyi, Munguneha hali A-Yerusaleme ni hali A-Yunda yipi yimwe, mba waze machivwa, matwi jo eswe ni aali makevwa chimbangwinya.

¹³ Mungutachika ha Yerusaleme muhipu wa Samaria ni prumo ya munyachi wa Ahabe. Mungukusumuna Yerusaleme ngwe lunga makusumuna chenga nikuchikusumuna nikuchalumuna.

¹⁴ Mungumbila masalila ja chihinga chami nikwakunjika mu moko ja akwa kole jo. Kuli akwa kole jo eswe, kumakapwa ngwe mu yala ya tela; ngwe upite wa kupupa,

¹⁵ mumu halinga chipi kumeso jami, hangwihia ngutenuke chize ku tangwa lize tulamba two akatukile ku Engitu ndo musono.

¹⁶ Helu lia yino yuma Manase wamwangine manyinga anji, chitela chakuhi, ndo Yerusaleme yeswe yazala chize ku songo limwe ndo ku songo likwo. Chino chapwile helu lia mulonga uze wavulumwishine A-Yunda ha kulinga chipi kumeso ja Yehova.

¹⁷ Yitanga yikwo ya Manase, ni yize yeswe alingile, ni mulonga uze avulumwine, hanayisoneka mu mukanda wa sango ja mianangana ja A-Yunda.

¹⁸ Mba Manase yaya tulo; yaya kuli tulamba twenyi. Yamufunda mu yize ya zuwo lienyi mu munda wa Uza, mba mwanenyi Amone yamuswana mu wanangana.

¹⁹ Ha kuputuka kuyula Amone wapwile ni makumi aali a miaka ni miaka yiali. Wayulile miaka yiali mu Yerusaleme. Jina lia naye Mesulemete mwana Haruzu wa ku Jotoba.

²⁰ Aye walingile chipi kumeso ja Yehova ngwe tato Manase.

²¹ Wendele mu ndako jeswe ja tato nikulingila tuponya aze tato walingilile nikwawayila.

²² Wehukile Yehova Zambi ya tulamba twenyi; kendele mu jila ya Yehova.

²³ Tuvumbi twa Amone yamutwama punga; yamushihila mu zuwo lienyi mwene.

²⁴ Alioze akwa chifuchi yashiha waze eswe atwamine punga mwanangana Amone, mba akwa chifuchi asalakanyishine mu wanangana mwanenyi Josia.

²⁵ Yitanga yikwo ya Amone yize alingile hanayisoneka mu mukanda wa sango ja mianangana ja Yunda.

²⁶ Yamufunda mu fuka lienyi mwene mu munda wa Uza mba mwanenyi Josia yamuswana mu wanangana.