1 MIANANGANA 20 - MUKANDA USANDU WA ZAMBI 1975

¹ Ha matangwa aze Hezekia Wayijile, wapwile hakamwihi ni kufwa. Mba profeta Izaia mwana Amoze yeza kuli iye nikwamba ngwenyi, Yehova kanambe ngwenyi, Lulika zuwo lie, mumu kumuofwa, kuchi kumona mwono.

² Henaho aye yatalikisa meso jenyi ku yishimi nikulemba kuli Yehova ngwenyi,

³ Ngunalembe, Yehova, iwuluka kama chize hinenda kumeso je ni umwenemwene ni mbunge yingunu, nikulinga chipema kumeso je. Mba Hezekia yalila chikolo.

⁴ Mba shimbu Izaia kanda achituhuka mu chihanda cha hakachi ka chihunda, liji lia Yehova yiliza kuli iye ngwo,

⁵ Hiluka nawa ukambe kuli Hezekia mukwa kuyula atu jami ngwe, Yehova kanambe, mwe Zambi ya kalamba ke David ngwenyi, Hinevwa kulemba che, hinamona masoji je, mungukuwuka. Ha tangwa liamuchitatu kumuoya ku zuwo iia Yehova.

⁶ Munguweza ku matangwa je kumi lia miaka ni miaka yitano; kumungukupulula, ni yena ni chihunda chino, ku kwoko lia mwanangana wa Asuria; kumungukafunga chihunda chino ha mukunda wa yami mwene, ni wa kavumbi kami David.

⁷ Mba Izaia yamba ngwenyi, Anda makuyu a kusohola. O yaanda, yaasa ha hute mba yahinduka.

⁸ Hezekia yamba kuli Izaia ngwenyi, Chilayi cha kuhinduka chami ni kuya ku zuwo lia Yehova ha tangwa liamuchitatu chika?

⁹ Izaia ngwenyi, Chino muchipwa chilayi cha kuli Yehova kuli yena cha kwamba ngwo, Yehova kumalinga chuma chino hamba: Chizulie chikaye kulutwe kumi lia shimbo, nyi chikahiluke kunyima kumi lia shimbo?

¹⁰ Hezekia yakumbulula ngwenyi, Chuma chashi chizulie kusenya kulutwe kumi lia shimbo. Alioze chizulie chikahiluke kunyima kumi lia shimbo.

¹¹ Mba profeta Izaia yateta kuli Yehova, mba iye yaneha chizulie kunyima kumi lia shimbo kuze hichasenya kulutwe ha relojio ya Ahaze.

¹² Ha mwaka uze Berodake-Baladane mwana Baladane mwanangana wa Babilonia yatuma mikanda ni yawana kuli Hezekia, mumu te hevwa ngwo, Hezekia Wayijile.

¹³ Hezekia aye yapanjika kuli ayo; yaalweza zuwo lieswe lia yuma yenyi yilemu, prata, ni oru, ni tumbuto twa lupembo mupema, ni maji alemu, ni zuwo lia mazalo a yikungo, ni yize yeswe yapwile mu upite wenyi. Nichimwe chuma chasalile mu zuwo lienyi hanji mu chifuchi chenyi Hezekia kaalwezele.

¹⁴ Henaho profeta Izaia yeza kuli mwanangana Hezekia ngwenyi, Wano malunga yika ambile? Kulihi akatukile heza kuli yena? Hezekia yamba ngwenyi, Akatukile ku chifuchi kusuku, ku Babilonia.

¹⁵ Aye ngwenyi, Yika amona mu zuwo lie? Hezekia yamba ngwenyi, Hamona yeswe yili mu zuwo liami. Kukwasalile nichimwe hakachi ka upite wami chaalwezele.

¹⁶ Izaia yamba kuli Hezekia ngwenyi, Ivwa liji lia Yehova nyi.

¹⁷ Matangwa aneza muze yize yeswe yili mu zuwo lie, ni yize yeswe tulamba twe aswekele ndo musono, mayimbata ku Babilonia. Nichimwe muchisala, chocho kanambe Yehova.

¹⁸ Ni amwe a kuli ana je a malunga waze matuhuka muli yena, yena muasema, kumakaatwala. Kumakapwa aunuku mu zuwo lia mwanangana wa Babilonia.

¹⁹ Hezekia yamba kuli Izaia ngwenyi, Liji lia Yehova hiwamba Unapeme. Yaweza nawa ngwenyi, Hi chocho ko nyi? Kachi mukupwa sambukila ni umwenemwene ha matangwa jami?

²⁰ Yitanga yikwo ya Hezekia ni ndundo jenyi jeswe, ni chize alingile Chitende, ni kapila wa kuneha meya mwe mu chihunda, hanayisoneka mu mukanda wa sango ja mianangana ja Yunda.

²¹ Hezekia yaya tulo; yaya kuli tulamba twenyi; mba mwanenyi Manase yamuswana mu wanangana.