1 MIANANGANA 2 - MUKANDA USANDU WA ZAMBI 1975

¹ Mba muze Yehova kanambe kupindumuna Eliya mwilu mu chijimbi, kumanyi Eliya yakatuka ku Ngilingali nikutwala Elisha hamwe nenyi.

² Eliya yamba kuli Elisha ngwenyi, Sala kama kuno mumu Yehova hangutuma ku Mbetele. Alioze Elisha yamba ngwenyi, Ni mwono wa Yehova, ni mwono wa mbunge ye, chichi kulihandununa ni yena. Chocho apalumukine ku Mbetele.

³ Mba ana ja aprofeta waze atwamine ku Mbetele yeza kuli Elisha ngwo, Unanyingika ngwe Yehova matambula mwata we ku mutwe we musono nyi? Aye ngwenyi, E, ngunachinyingika; holenu.

⁴ Eliya yamba kuli iye ngwenyi, Elisha, sala kama kuno, mumu Yehova hangutuma ku Yeriku. Alioze iye ngwenyi, Ni mwono wa Yehova, ni mwono wa mbunge ye, chichi kulihandununa ni yena. Chocho yeza ku Yeriku.

⁵ Mba ana ja aprofeta aze atwamine ku Yeriku yakundama kuli Elisha ngwo, Unanyingika ngwe Yehova matambula mwata we ku mutwe we musono nyi? Aye yakumbulula ngwenyi, E, ngunachinyingika; holenu.

⁶ Eliya yamba kuli iye ngwenyi, Sala kama kuno, mumu Yehova hangutuma ku Yordau. Aye ngwenyi, Ni mwono wa Yehova, ni mwono wa mbunge ye, chichi kulihandununa ni yena. Chocho o aali ayile.

⁷ Mba makumi atano a malunga a kuli ana ja aprofeta yaya, yamana hatalanganyi no alioze kusuku. O aali amanyine ku Yordau.

⁸ Mba Eliya yanda hina lienyi, yalivunga hamuwika, yalamba e meya. Meya yahandunuka sali ni sali, mba o aali yapalika ndusu ha mavu omu.

⁹ Chapwile muze te hapalika, Eliya yamba kuli Elisha ngwenyi, Eta cheswacho unazange ngukulingile shimbu kanda angutambula kuli yena. Elisha ngwenyi, Ngunalembe, yihanda yiali ya Spiritu ye yikatwame hali yami.

¹⁰ Aye ngwenyi, Hiweta chuma chikalu, alioze nyi mukangumona muze mangutambula kuli yena muchikupwa chocho. Nyi kwangumwene kuchichi kupwa chocho.

¹¹ Shimbu machiya kulutwe nikuhanjika—solomoko lume—temba lia kahia ni tuvwalu a kahia ya kwahandununa umwe kuli mukwo, mba Eliya yakanduka mwilu mu chijimbi.

¹² Elisha yachimona, yateta ngwenyi, Tata! Tata! Matemba ja Izalele ni akwa tuvwalu jo! Kamumwene nawa. Yakwata mazalo jenyi, yaapula yihanda yiali.

¹³ Yanda nawa uzalo wa Eliya uze te hiwaholoka kuli iye. Yahiluka, yamana ha mbumbulu ya Yordau.

¹⁴ Yakwata hina lia Eliya lize hiliaholoka kuli iye, yalamba e meya, yamba ngwenyi, Yehova Zambi ya Eliya Ulihiye? Muze te halamba meya o yahandunuka sali ni sali, mba Elisha yapalika.

¹⁵ Ha kumumona ana ja aprofeta waze atwama ku Yeriku hatalanganyi nenyi yamba ngwo, Spiritu ya Eliya hatula hali Elisha. Mba yeza kumupatwiza, yahetamina hashi kumeso jenyi.

¹⁶ Yamba kuli iye ngwo, Yetu tuvumbi twenu tuli ni makumi atano a malunga a tachi. Tunalembe, uatayize kama aye afupe mwata we kuchina hanji Spiritu ya Yehova hamupindumuna hamumbila ha mulundu umwe hanji ha chana. Aye ngwenyi, Kunuchi kutuma.

¹⁷ Alioze muze hamushinjika ndo hevwa sonyi yamba ngwenyi, Tumenu nyi. Kashika yatuma makumi atano a malunga; yafupa matangwa atatu, alioze kamuwanyine.

¹⁸ Yahiluka kuli iye shimbu achili ku Yeriku. Aye yamba kuli ayo ngwenyi, Chanwambile ngwami, Kanda nuya?

¹⁹ Malunga a chihunda yamba kuli Elisha ngwo, Talenu kama ngwe chihela chino cha chihunda chinawaha; unachimóno. Alioze meya kapemene ni mavu haseka.

²⁰ Aye yamba ngwenyi, Ngunehenenu chenga chaha, nuseho mungwa. Yamunehenacho.

²¹ Yatuhuka yaya ku fuji lia meya, yambililamo we mungwa nikwamba ngwenyi, Yehova kanambe ngwenyi, Hinawuka meya ano; kukuchi kupwa nawa kufwa hanji kuseka.

²² Chocho awukile meya ndo musono nikulita ni liji lia Elisha ahanjikile.

²³ Yakatukako yaya ku Mbetele. Shimbu machiya mu jila kwatuhukile mu chihunda amwe akweze nikumulenya ngwo, Kanduka kalwole! Kanduka kalwole!

²⁴ Aye yatala kunyima, yaamona, yaashinga ni jina lia Yehova. Mba kwatuhukile mu musenge ursu aali a yihwo, yapapulula makumi awana a akweze ni akweze aali.

²⁵ Yakatukako, yaya ku mulundu wa Karmela. Yakatukako, yahiluka ku Samaria.