1 MIANANGANA 18 - MUKANDA USANDU WA ZAMBI 1975

¹ Mu mwaka wamuchitatu wa Hoshia mwana Ela mwanangana wa Izalele, Hezekia mwana Ahaze mwanangana wa Yunda yaputuka kuyula.

² Ha kuputuka kuyula wapwile ni makumi aali a miaka ni miaka yitano, mba wayulile makumi aali a miaka ni miaka livwa mu Yerusaleme. Jina lia naye Abi mwana Zekaria.

³ Walingile chipema kumeso ja Yehova, nikulita ni yeswe alingile kalamba kenyi David.

⁴ Wachijile manangamo; wapalwile tuponya; watetele Ashera; wafwenyene kapela wa unengu yoze Mose alingile; mumu ndo matangwa aze A-Izalele amwochelele insensu. Aye wamulukile jina ngwenyi, Nehushitana.

⁵ Wafulielele Yehova Zambi ya Izalele, chocho hakachi ka mianangana ja Yunda kukwapwile niumwe walifwa nenyi, chipwe kulutwe lienyi chipwe kunyima.

⁶ Mumu walalaminyine kuli Yehova; kalitwaminyine kumukaula; yafunga shimbi jenyi jize Yehova watumine kuli Mose.

⁷ Kashika Yehova wapwile hamwe nenyi. Kweswako atalikishile wayile kulutwe. Aye wakatukilile mwanangana wa Asuria; kamulingilile.

⁸ Walambile A-Filistea ndo ku Ngeza ni njiza jako, chize ku kaposhi ka tulayi ndo ku limbo lia chipanga-cha-mawe.

⁹ Ha mwaka wamuchiwana wa mwanangana Hezekia (wamuchishimbiali wa Hoshia mwana Ela mwanangana wa Izalele) Shalamanezere mwanangana wa Asuria yeza ku Samaria ni kuchiseleka.

¹⁰ Kulutwe lia miaka yitatu yachitambula, mwe mu mwaka wamuchisambano wa Hezekia, wamuchilivwa wa Hoshia mwanangana wa Izalele, yatambula Samaria.

¹¹ Mwanangana wa Asuria yatwala A-Izalele ku Asuria; yaasa mu Hala, ni mu Habore ha lwiji Ngozane, ni mu yihunda ya A-Media,

¹² mumu kononokene ku liji lia Yehova Zambi yo; atangwile usendo; yuma yize yeswe Mose kavumbi ka Yehova watumine, kasolo kuyipanjika chipwe kuyilinga.

¹³ Ha mwaka kumi ni wamuchiwana wa mwanangana Hezekia, Senakeribe mwanangana wa Asuria yeza kulimika ni yihunda yeswe ya yipanga mu Yunda; yayitambula.

¹⁴ Alioze Hezekia mwanangana wa Yunda yatuma kuli mwanangana wa Asuria mu Lakishi ngwenyi, Hinavulumuna; katukenu kuli yami, mba cheswacho munungutwika mungulikoleza. Mba mwanangana wa Asuria yasela kuli Hezekia mwanangana wa Yunda kulakaji atatu a *talentu ja prata, ni makumi atatu a *talentu ja oru.

¹⁵ Hezekia yamwaha prata yeswe awanyine mu zuwo lia Yehova ni mu upite wa zuwo lia mwanangana.

¹⁶ Ha mwaka uze Hezekia yateta oru ku mapito a tembele ya Yehova, ni ku manguji aze Hezekia mwanangana wa Yunda waalamikine nayo. Yayihana kuli mwanangana wa Asuria.

¹⁷ Mba ku Lakishi mwanangana wa Asuria yatuma Tartana ni kaliamanga wa lutwe ni Rabeshaka kuli mwanangana Hezekia ku Yerusaleme, ni tujita anji. O yakanduka, yeza ku Yerusaleme. Ha kuheta, yeza, yamanyina ku kapila wa Chitende cha ku tunda chize chatwama ha tapalo lia ku munda wa mukwa kutomesa mahina.

¹⁸ Yasanyika mwanangana, mba kwatuhukile kuli ayo Eliakimi mwana Hilekia, mukwa kuyula zuwo, ni Shepena mukwa kusonyeka, ni Joa mwana Asafwe mukwa kusoneka sango.

¹⁹ Rabeshaka yamba kuli ayo ngwenyi, Ambulwilenu Hezekia ngwenu, Mwanangana munene, mwanangana wa Asuria kanambe ngwenyi, Ufulielo uno unajikijila kuchi wapwa?

²⁰ Unamono ngwe maliji amokomoko mapwa malinjekela ni tachi ja jita. Iya unajikijila ungukatukile yami?

²¹ Unajikijila hali A-Engitu, mulumbu wa lumbungu wa kumakuna. Nyi mutu mashindakenyaho muumutuwa kwoko. Falau mwanangana wa Engitu chocho apwa kuli waze eswe mamujikijila.

²² Alioze nyi munwamba kuli yami ngwenu, Tunajikijila hali Yehova Zambi yetu, ngwami, Mwenawo Hezekia hachiza manangamo jenyi ni yilumbilo yenyi, mba hamba kuli A-Yunda ni A-Yerusaleme ngwenyi, Chanutamba kuwayila ku chilumbilo chino mu Yerusaleme.

²³ Kashika hanenu yifungo kuli mwata wami mwe mwanangana wa Asuria, mba yami mungunwaha tununu aali a tuvwalu nyi yenu munuhasa kusaho akwa kwaendesa.

²⁴ Ngwe kuchi munuhasa kukumba kapitau umuwika mulelu hakachi ka ngamba ja mwata wami shimbu nunafuliela A-Engitu anwehe matemba ni akwa tuvwalu?

²⁵ Te chejile ni Yehova kulimika ni chifuchi chino ni kuchonwona? Yehova hangwamba ngwenyi, Yako ulimike ni chifuchi chino uchonwone.

²⁶ Henaho Eliakimi mwana Hilekia ni Shepena ni Joa yamba kuli Rabeshaka ngwo, Hanjikenu kama kuli yetu tuvumbi twenu mu limi lia Asuria se liatulumbunuka. Kanda nuhanjika mu limi lia A-Yunda, mwe mu matwi ja atu eswe ali ha chipanga-cha-mawe.

²⁷ Alioze Rabeshaka yamba kuli ayo ngwenyi, Te mwata wami hangutuma kuhanjika maliji ano kuli yenu ni mwata wenu? Te kangutumine kuli malunga wano atwama ha chipanga-cha-mawe, se o nawa hamuwika ni yenu hanafunjikacho kulia tuji jo ni kunwa masuso jo nyi?

²⁸ Mba Rabeshaka yamana nikukokoloka ni liji linene mu limi lia A-Yunda ngwenyi, Ivwenu liji lia mwanangana munene, mwanangana wa Asuria.

²⁹ Mwanangana kanambe ngwenyi, Kanda nutayiza Hezekia kunwonga, mumu kechi kuhasa kunupulula mu kwoko liami.

³⁰ Kanda nutayiza Hezekia ha kwamba ngwenyi, Fulielenu Yehova; Yehova matupulula, mba chihunda chino kechi kuchihana kuli mwanangana wa Asuria.

³¹ Kanda nupanjika kuli Hezekia mumu mwanangana wa Asuria kanambe ngwenyi, Litesenu ni yami nutuhuke kuli yami; mba munulia mutu mweswe ku mutondo wenyi wa uva, ni mutondo wenyi wa makuyu, ni mweswe manwa ku meya a mu shima lienyi;

³² ndo mungwiza kunutwala ku chifuchi chimwe chalifwa ni chifuchi chenu chifuchi cha mbuto ni vinyu; chifuchi cha mbolo ni mitondo ya uva; chifuchi cha azeite ni wuchi, hanga nukatwame ni mwono, ni kufwa ka. Kanda nupanjika kuli Hezekia muze manulembejeka ngwenyi, Yehova matupulula.

³³ Te umwe zambi wa mavungu hapulula atu jenyi ku kwoko lia mwanangana wa Asuria?

³⁴ Mazambi a Hamate ni Arpade kulihi ali? Mazambi Sefavaime, ni Hena, ni Iva, kulihi ali? Hapulula Samaria ku kwoko liami nyi?

³⁵ Zambi muka hakachi ka mazambi a yifuchi yeswe hapulula chifuchi chenyi ku kwoko liami, mba nunyonge ngwenu, Yehova mapulula Yerusaleme ku kwoko lienyi?

³⁶ Alioze atu aholele kúlú. Kakumbulwile liji nilimwe. Mumu mwanangana hahana shimbi ngwenyi, Kanda numukumbulula.

³⁷ Henaho Eliakimi mwana Hilekia mukwa kuyula zuwo, ni Shepena mukwa kusonyeka, ni Joa mwana Asafwe mukwa kusoneka sango, yeza kuli Hezekia ni mazalo jo a kusonya. Yamwambulwila maliji a Rabeshaka.