1 MIANANGANA 17 - MUKANDA USANDU WA ZAMBI 1975

¹ Ha mwaka kumi ni wamuchiali wa Ahaze mwanangana wa Yunda, Hoshia mwana Ela yaputuka kuyula A-Izalele mu Samaria. Wayulile miaka livwa.

² Walingile chipi kumeso ja Yehova, hindu kalingile ngwe mianangana akwo ja Izalele waze apwile kushi.

³ Shalamanezere mwanangana wa Asuria yeza kulimika nenyi, mba Hoshia yalumuka kavumbi kenyi nikumulambula.

⁴ Mba mwanangana wa Asuria yawana utwahe muli Hoshia mumu te hatuma tunganda kuli So mwanangana wa Engitu. Chikwo nawa katumine milambu kuli mwanangana wa Asuria ngwe halinga mwaka ha mwaka. Kashika mwanangana wa Asuria wamuyikilile ni kumukashila mu zuwo lia ususu.

⁵ Henaho mwanangana wa Asuria yakanduka ndusu chifuchi cheswe ndo ku Samaria, mba yachiseleka miaka yitatu.

⁶ Ha mwaka wamuchilivwa wa Hoshia, mwe mwanangana wa Asuria yatambula Samaria. Yambata A-Izalele funge ku Asuria, yaasa mu Hala, ni mu Habore ha lwiji Ngozane ni mu yihunda ya A-Media.

⁷ Chapwile chocho mumu A-Izalele hanavulumuna Yehova Zambi yo, yoze waachijile ku kwoko lia Falau mwanangana wa Engitu ni ku chifuchi chenyi. Hindu o havwila woma mazambi akwo,

⁸ henda mu shimbi ja mavungu aze Yehova hahuma kumeso ja A-Izalele. Henda nawa mu shimbi jize mianangana ja Izalele akolesele.

⁹ A-Izalele alingile nawa ku tenga yuma ya uhenge ya kulimika ni Yehova Zambi yo. Yalitungila manangamo mu yihunda yo yeswe, chize ku kaposhi ka tulayi ndo ku limbo lia chipanga-cha-mawe.

¹⁰ Yalimikina tuponya ni Ashera ha mulundu weswe usuku ni mushi lia mutondo weswe wa wisu.

¹¹ Henaho ochelele insensu ha manangamo eswe ngwe mavungu alingile aze Yehova wachijile kumeso jo. Alingile yuma ya ungulungulu akehie Yehova atenuke.

¹² Alingilile tuponya aze Yehova hanambe ngwenyi, Kanda nulinga chuma chino.

¹³ Alioze Yehova washindakenyene kuli A-Izalele ni kuli A-Yunda kuli profeta mweswe ni kuli mukwa kumona mweswe ngwenyi, Alumukenu ku ndako jenu jipi nukafunge shimbi jami ni yiyulo yami nikulita ni shimbi jami jeswe jize natuminyine tulamba twenu, te jize nanutumine kuli tuvumbi twami aprofeta.

¹⁴ Hindu kasolo kwivwa. Akwachile pami ngwe tulamba two alingile, waze kafulielele Yehova Zambi yo.

¹⁵ Yalituna yiyulo yenyi, ni usendo wenyi uze akolesele ni tulamba two, ni Shindakenyo yenyi yize waashindakenyene. Akawile yuma yamokomoko mba alumukine atu amokomoko. Embulwile mavungu aze aajingilikile waze te Yehova waambile ngwenyi, Kanda nukaembulula.

¹⁶ Ehukile shimbi jeswe ja Yehova Zambi yo nikulilingila tuponya twa kuzuzulula, te ana-a-ngombe aali. Alingile Ashera nawa, nikuwayila mbunga yeswe ya mwilu, nikuvumbika Mbale.

¹⁷ Apalikishile mu kahia ana jo a malunga ni a mapwo. Atahile ngombo ni kukwata ku yuma ya umbanda. Alilanjishile kulinga chipi kumeso ja Yehova akamwihie atenuke.

¹⁸ Kashika Yehova watenukine chikolo ni A-Izalele yaachiza kumeso jenyi. Kahichikile niamwe shina munyachi wa Yunda wika.

¹⁹ Ni A-Yunda nawa kafungile shimbi ja Yehova Zambi yo alioze endele mu yiyulo ya Izalele yize alingile.

²⁰ Kashika Yehova yalituna munyachi weswe wa Izalele. Yaapinjisa, nikwakunjika mu moko ja akwa kwapupa, ndo haachiza kumeso jenyi.

²¹ Mumu wapulile Izalele ku munyachi wa David; o yasa ku wanangana Jeroboame mwana Nebate, mba Jeroboame yashinjika A-Izalele alitwamine kukaula Yehova. Iye waavulumwishine mulonga unene.

²² Mba A-Izalele endele mu milonga yeswe ya Jeroboame yize avulumwine, kayechele;

²³ ndo Yehova wachijile Izalele kumeso jenyi, ngwe wambile kuli tuvumbi twenyi aprofeta eswe. Chocho yachiza A-Izalele ku chifuchi cho, yaatwala ku Asuria, ndo musono.

²⁴ Mba mwanangana wa Asuria yachiza atu ku Babilonia, ni ku Kuta, ni ku Ava, ni ku Hamate, ni ku Sefavaime; yaasa mu yihunda ya Samaria kusalakana A-Izalele. O yazuka Samaria; yatwama mu yihunda yako.

²⁵ Chapwile ha kuputuka kutwamako kevwilile woma Yehova, kashika Yehova yatuma ndumba hakachi ko; yashiha amwe.

²⁶ Kashika yahanjika ni mwanangana wa Asuria ngwo, Mavungu aze hinwatwala nikwasa mu yihunda ya Samaria kanyingikine ndako ja Zambi ya chifuchi. Kashika iye hatuma ndumba hakachi ko nikwashiha, mumu kanyingikine ndako ja Zambi ya chifuchi.

²⁷ Henaho mwanangana wa Asuria yatuma liji ngwenyi, Twalako umwe sasendote nwachijileko akaye, akatwameko, akaalongese ndako ja Zambi ya chifuchi.

²⁸ Chocho umwe sasendote te hanamuchiza hatangu ku Samaria yeza, yatunga ku Mbetele, yaalongesa chize chaatamba kuvwila woma Yehova.

²⁹ Hindu akwa vungu lieswe alingile mazambi jo ene; yaasa mu mazuwo ja manangamo aze A-Samaria te halinga, akwa vungu lieswe mu yihunda kuze atwamine.

³⁰ Atu ja Babilonia alingile Sukote-Mbenote; atu ja Kuta alingile Neregale; atu ja Hamate alingile Ashima;

³¹ A-Avime alingile Nibahaze ni Tarataka. A-Sefavaime ochele ana jo mu kahia kuli Adramaleke ni Anamaleke mazambi ja A-Sefavaime.

³² Chocho evwilile woma, Yehova akalilingile hakachi ko asasendote ja manangamo, waze aashihilile yitapo mu mazuwo ja ha manangamo.

³³ Kanda evwilile woma Yehova, kanda alingilile mazambi jo ene nikulita ni ndako ja mavungu kuze aachijile.

³⁴ Ndo tangwa lia musono analingi nikulita ni ndako jo jikulu. Kavwilile woma Yehova; kalingile nikulita ni yiyulo yo, hanji maliji jo a shimbi, hanji je shimbi, hanji maliji aze Yehova watumine ana ja Yakomba yoze te amulukile Izalele.

³⁵ Yehova wakolesele no usendo nikwashingisa ngwenyi, Kunuchi kuvwila woma mazambi akwo, chipwe kuhetamina kuli ayo, chipwe kwalingila, chipwe kwashihila yitapo,

³⁶ alioze Yehova yoze wanuchijile ku chifuchi cha Engitu ni ndundo jinji ni kwoko lia kwolola, mwenawo munuvwila woma, kuli iye munuhetamina, kuli iye munushihila yitapo.

³⁷ Ni yiyulo yenyi, ni maliji jenyi a shimbi, ni je shimbi, ni maliji, yize anusonekenene munukayifunga, nikuyilinga ndo ku miaka ya mutolo. Kanda nuvwila woma mazambi akwo.

³⁸ Chikwo nawa kanda nuvulama usendo uze nakolesele ni yenu; kanda nuvwila woma mazambi akwo.

³⁹ Alioze Yehova Zambi yenu muvwilenu woma, mba iye kumanupulula ku moko ja akwa kole jenu eswe.

⁴⁰ Hindu kapanjikile alioze alingile nikulita ni ndako jo jikulu.

⁴¹ Chocho mavungu ano kanda evwilile woma Yehova kanda alingilile tuponya two twa kwola. Ni ana jo ni ajikulu jo alingile chizechene ngwe tulamba two, ndo tangwa lia musono.