1 MIANANGANA 16 - MUKANDA USANDU WA ZAMBI 1975

¹ Ha mwaka kumi ni wamuchishimbiali wa Peka mwana Remalia, Ahaze mwana Yotame mwanangana wa Yunda yaputuka kuyula.

² Ha kuputuka kuyula Ahaze wapwile ni makumi aali a miaka; wayulile kumi lia miaka ni miaka yisambano mu Yerusaleme. Alioze kalingile chipema kumeso ja Yehova Zambi yenyi ngwe kalamba kenyi David walingile.

³ Wendele mu ndako ja mianangana ja Izalele, chipwe mwanenyi wa lunga wamupalikishile mu kahia nikulita ni yizelwokeso ya mavungu aze Yehova wakatwishile kumeso ja A-Izalele.

⁴ Washihile yitapo nikwocha insensu ha manangamo, ni ha milundu, ni mushi lia mutondo weswe wa wisu.

⁵ Mba Rezine mwanangana wa Seria ni Peka mwana Remalia mwanangana wa Izalele ejile ku Yerusaleme ni jita. Yaseleka Ahaze alioze kahashile kumukumba.

⁶ Ha mwaka uze Rezine mwanangana wa Seria yahuma A-Yunda ku Elate; A-Seria yatambula nawa Elate mba ejile atwamineko ndo musono.

⁷ Chocho Ahaze yatuma tunganda kuli Tigelate-Pilesere mwanangana wa Asuria ngwenyi, Nguli kavumbi kenu kanda mwanenu. Tweyenu nungulamwine ku kwoko lia mwanangana wa Seria, ni ku kwoko lia mwanangana wa Izalele mumu hanangukatukila.

⁸ Mba Ahaze yanda prata ni oru ayiwanyine mu zuwo lia Yehova ni mu upite wa zuwo lia mwanangana; yayituma chawana kuli mwanangana wa Asuria.

⁹ Mwanangana wa Asuria yamwivwa; yakanduka kulimika ni Ndamaseku; yachitambula; yambata atu jamo ku Kiri funge; yashiha Rezine.

¹⁰ Mwanangana Ahaze yaya ku Ndamaseku kutakana ni Tigelate-Pilesere mwanangana wa Asuria. Yamona chilumbilo chize chapwileko. Mba mwanangana Ahaze yatuma kuli sasendote Urija kulifwa cha chilumbilo, ni cheseko chacho, nikulita ni utotombo wacho weswe.

¹¹ Mba sasendote Urija yatunga chilumbilo nikulita ni cheseko chize cheswe mwanangana Ahaze hatuma, chocho sasendote Urija yachilinga hanga mwanangana Ahaze achiwane ha kukatuka ku Ndamaseku.

¹² Ha kukatuka ku Ndamaseku mwanangana yamona chilumbilo, mba mwanangana yakundama ku chilumbilo Ukalambwileho.

¹³ Ha chilumbilo yalumbila mulambu wenyi wa kulumba, ni mulambu wenyi wa wunga, yazujila mulambu wenyi wa kunwa, yasapwila manyinga ja milambu yenyi ya sambukila.

¹⁴ Chikwo nawa chilumbilo cha unengu chize chapwile kumeso ja Yehova yachichiza kwe kulutwe lia zuwo hakachi ka chilumbilo chenyi ni zuwo lia Yehova, yachisa ha sali lia chilumbilo chenyi ku Norte.

¹⁵ Mba mwanangana Ahaze yatuma sasendote Urija ngwenyi, Ha chilumbilo chinene muwochela mulambu wa kulumba wa chimene, ni mulambu wa ngoloshi wa wunga, ni mulambu wa kulumba wa mwanangana, ni mulambu wenyi wa wunga, ni mulambu wa kulumba wa atu eswe a chifuchi, ni mulambu wo wa wunga, ni milambu yo ya kunwa. Musapwilaho manyinga eswe a mulambu wa kulumba, ni manyinga eswe a chitapo, alioze chilumbilo cha unengu muchipwa cha yami ngupwe nikuhulilako.

¹⁶ Chocho sasendote Urija yalinga nikulita ni shimbi jeswe mwanangana Ahaze yamwaha.

¹⁷ Mwanangana Ahaze yateta almofada ha yimanyino, yachizaho lumbasia. Yachiza nawa lutanke hali ngombe a unengu aze alukolesele; yalusa ha chitamba cha mawe.

¹⁸ Ni jila ya kufuka yize atungile ha zuwo ha milimo ya Sambata, ni unjililo wa mwanangana, yayalumwina ku zuwo lia Yehova mumu ha mukunda wa mwanangana wa Asuria.

¹⁹ Yitanga yikwo ya Ahaze yize alingile hanayisoneka mu mukanda wa sango ja mianangana ja Yunda.

²⁰ Mba Ahaze yaya tulo; yaya kuli tulamba twenyi. Yamufunda ni tulamba twenyi mu chihunda cha David, mba mwanenyi Hezekia yamuswana mu wanangana.