1 MIANANGANA 15 - MUKANDA USANDU WA ZAMBI 1975

¹ Ha mwaka makumi aali ni wamuchishimbiali wa Jeroboame mwanangana wa Izalele, Azaria mwana Amazia mwanangana wa A-Yunda yaputuka kuyula.

² Ha kuputuka kuyula wapwile ni kumi lia miaka ni miaka yisambano. Wayulile makumi atano a miaka ni miaka yiali mu Yerusaleme. Jina lia naye Jekolia wa ku Yerusaleme.

³ Walingile chipema kumeso ja Yehova nikulita ni cheswe tato Amazia walingile.

⁴ Alioze manangamo kaachijile; atu ashihilileho yitapo hindu, nikwochelaho insensu.

⁵ Yehova yalamba Azaria, wapwile mukwa mbumba ndo tangwa lia kufwa chenyi nikutwama mu zuwo lia kumukwasa. Yotame mwana wa mwanangana wapwile helu lia zuwo nikuyula akwa chifuchi.

⁶ Yitanga yikwo ya Azaria ni yize yeswe alingile hanayisoneka mu mukanda wa sango ja mianangana ja A-Yunda.

⁷ Azaria yaya tulo, yaya kuli tulamba twenyi. Yamufunda hamwe ni tulamba twenyi mu chihunda cha David, mba mwanenyi Yotame yamuswana mu wanangana.

⁸ Ha mwaka makumi atatu ni wamuchinake wa Azaria mwanangana wa Yunda, Zekaria mwana Jeroboame wayulile A-Izalele mu Samaria tukweji asambano.

⁹ Walingile chipi kumeso ja Yehova chizechene ngwe tulamba twenyi. Kechele milonga ya Jeroboame mwana Nebate yize avulumwishine nayo A-Izalele.

¹⁰ Shalume mwana Njabeshe yamutwama punga; yamulamba kumeso ja atu eswe nikumushiha; mba yamusalakana mu wanangana.

¹¹ Yitanga yikwo ya Zekaria hanayisoneka mu mukanda wa sango ja mianangana ja Izalele.

¹² Lie liji alie te lia Yehova kuli Jehu ngwenyi, Ana je kumakatwama ha ngunja ya Izalele ndo ku chisemuko chamuchiwana. Chocho chapwile.

¹³ Shalume mwana Njabeshe yaputuka kuyula ha mwaka makumi atatu ni wamuchilivwa wa Uzia mwanangana wa Yunda. Aye wayulile ha shimbu lia kakweji umuwika mu Samaria.

¹⁴ Mba Menaheme mwana Ngati yakatuka ku Tiriza; yeza ku Samaria; yalamba Shalume mwana Njabeshe mu Samaria; yamushiha, mba yamusalakana mu wanangana.

¹⁵ Yitanga yikwo ya Shalume ni punga yenyi hanayisoneka mu mukanda wa sango ja mianangana ja Izalele.

¹⁶ Mba Menaheme yapupa Tifesahe nikushiha waze eswe atwaminemo ni mu njiza jako chize ku Tiriza. Yachipupa mumu te kasolo kumwazulwila. Mapwo eswe tufumba yaahangula lume.

¹⁷ Ha mwaka makumi atatu ni wamuchilivwa wa Azaria mwanangana wa Yunda, Menaheme mwana Ngati yaputuka kuyula A-Izalele. Wayulile kumi lia miaka mu Samaria.

¹⁸ Walingile chipi kumeso ja Yehova. Matangwa jenyi eswe kechele milonga ya Jeroboame mwana Nebate yize avulumwishine nayo A-Izalele.

¹⁹ Pule mwanangana wa Asuria yeza kulimika ni chifuchi, mba Menaheme yahana kuli Pule kanunu ka *talentu ja prata hanga akamukolese mu wanangana.

²⁰ Menaheme yafwetesa A-Izalele mbongo jacho, te kuli pichi eswe, mutu ni mutu yafweta makumi atano a shekele ja prata akahane kuli mwanangana wa Asuria. Chocho mwanangana wa Asuria yahiluka; katwamine mu chifuchi.

²¹ Yitanga yikwo ya Menaheme ni yize yeswe alingile hanayisoneka mu mukanda wa sango ja mianangana ja Izalele.

²² Menaheme yaya tulo, yaya kuli tulamba twenyi, mba mwanenyi Pekahia yamuswana mu wanangana.

²³ Ha mwaka makumi atano wa Azaria mwanangana wa Yunda, Pekahia mwana Menaheme yaputuka kuyula A-Izalele mu Samaria. Yayulile miaka yiali.

²⁴ Walingile chipi kumeso ja Yehova. Kechele milonga ya Jeroboame mwana Nebate yize avulumwishine nayo A-Izalele.

²⁵ Peka mwana Remalia kapitau kenyi yamutwama punga; yamulamba mu Samaria, mu mbonge ya zuwo lia mwanangana, hamwe ni Argobe ni Ariehe. Wapwile ni makumi atano a malunga A-Ngiliate, mba yamushiha, yamusalakana mu wanangana.

²⁶ Yitanga yikwo ya Pekahia ni yize yeswe alingile hanayisoneka mu mukanda wa sango ja mianangana ja Izalele.

²⁷ Ha mwaka makumi atano ni wamuchiali wa Azaria mwanangana wa Yunda, Peka mwana Remalia yaputuka kuyula A-Izalele mu Samaria. Wayulile makumi aali a miaka.

²⁸ Walingile chipi kumeso ja Yehova. Kechele milonga ya Jeroboame mwana Nebate yize avulumwishine nayo A-Izalele.

²⁹ Ha matangwa a Peka mwanangana wa Izalele, Tigelate-Pilesere mwanangana wa Asuria yeza. Yatambula Ijone, ni Abele-Mbete-Maka, ni Janoa, ni Kendeshe, ni Hazore, ni Ngiliate, ni Ngalileya, te chifuchi cheswe cha Napatali. E atu yaambata funge ku Asuria.

³⁰ Hoshia mwana Ela yatwama punga Peka mwana Remalia. Yamulamba nikumushiha, mba yamusalakana mu wanangana ha mwaka makumi aali wa Yotame mwana Uzia.

³¹ Yitanga yikwo ya Peka ni yize yeswe alingile, hanayisoneka mu mukanda wa sango ja mianangana ja Izalele.

³² Ha mwaka wamuchiali wa Peka mwana Remalia mwanangana wa Izalele, Yotame mwana Uzia mwanangana wa Yunda yaputuka kuyula.

³³ Ha kuputuka kuyula wapwile ni makumi aali a miaka ni miaka yitano, mba wayulile mu Yerusaleme kumi lia miaka ni miaka yisambano. Jina lia naye Jerusha mwana Zadoke.

³⁴ Aye walingile chipemakumeso ja Yehova. Walingile nikulita ni yize yeswe tato Uzia walingile.

³⁵ Alioze manangamo kaachijile; atu hindu ashihilile yitapo ha manangamo nikwochelaho insensu. Aye yatunga chikolo cha zuwo lia Yehova cha ku tunda.

³⁶ Yitanga yikwo ya Yotame ni yize yeswe alingile hanayisoneka mu mukanda wa sango ja mianangana ja Yunda.

³⁷ Ha matangwa aze Yehova yaputuka kutuma Rezine mwanangana wa Seria, ni Peka mwana Remalia akalimike ni Yunda.

³⁸ Yotame yaya tulo, yaya kuli tulamba twenyi. Yamufunda hamwe ni tulamba twenyi mu chihunda cha kalamba kenyi David. Mwanenyi Ahaze yamuswana mu wanangana.