1 MIANANGANA 14 - MUKANDA USANDU WA ZAMBI 1975

¹ Ha mwaka wamuchiali wa Njoashe mwana Jehoahaze mwanangana wa Izalele, Amazia mwana Njoashe mwanangana wa Yunda yaputuka kuyula.

² Ha kuputuka kuyula wapwile ni makumi aali a miaka ni miaka yitano. Wayulile makumi aali a miaka ni miaka livwa mu Yerusaleme. Jina lia naye Jehoadane wa ku Yerusaleme.

³ Walingile chipema kumeso ja Yehova, hindu kalingile ngwe kalamba kenyi David. Walingile ngwe tato Njoashe walingile.

⁴ Chipwe chocho kachijile manangamo; atu ashihile yitapo ha manangamo nikwochelaho insensu.

⁵ Muze wanangana hiwakola mu kwoko lienyi yashiha tuvumbi twenyi aze ashihile tato mwe mwanangana.

⁶ Alioze ana ja waze yingalwe kaashihile, nikulita ni chize chasonewene mu mukanda wa shimbi ja Mose, chize Yehova watumine ngwenyi, Kanda ashiha yisemi mumu hali ana, chipwe kanda ashiha ana mumu hali yisemi. Mutu mweswe mafwila mulonga wenyi mwene.

⁷ Yashiha nawa mu Chikulo cha Mungwa kumi lia tununu twa A-Endome. Yatambula Sela ni jita; yaluka chihunda jina ngwenyi, Yokatele, ndo musono.

⁸ Henaho Amazia yatuma tunganda kuli Njoashe mwana Jehoahaze, mwana Jehu, mwanangana wa Izalele ngwenyi, Tweya tukalitale meso ni meso.

⁹ Alioze Njoashe mwanangana wa Izalele yatuma kuli Amazia mwanangana wa Yunda ngwenyi, Mukalale wa mu Lebano yiutuma kuli sedru ya mu Lebano ngwenyi, Hana mwané wa pwo kuli mwanami wa lunga amumbate. Alioze kwejile umwe ngongo wa mu Lebano yaliachila hashi mukalale.

¹⁰ Chamwenemwene hiwakumba Endome mba mbunge ye hiyalifuza. Ulichichimieke nacho, alioze twama ku mahienu. Kuchi te mukalisupa ukalilemeke ukalimbuke, ni yena ni A-Yunda hamuwika?

¹¹ Alioze Amazia kasolo kwivwa, kashika Njoashe mwanangana wa Izalele yakanduka, mba iye ni Amazia mwanangana wa Yunda yalitala meso ni meso ku Mbete-Shemeshe wa Yunda.

¹² Izalele yakumba A-Yunda, mba A-Yunda yachinyina mutu mweswe ku mbalaka yenyi.

¹³ Njoashe mwanangana wa Izalele yakwata Amazia mwana Njoashe mwana Ahazia mwanangana wa Yunda ku Mbete-Shemeshe. Yeza ku Yerusaleme, yapuzula chipanga-cha-mawe chize ku chikolo cha Eframe ndo ku chikolo cha mbango, kulakaji awana a mbandu.

¹⁴ Yatambula nawa oru yeswe ni prata yeswe, ni yikwachilo yeswe awanyine mu zuwo lia Yehova, ni mu upite wa zuwo lia mwanangana, ni funge nawa akapwe tombo, yaya ku Samaria.

¹⁵ Yitanga yikwo ya Njoashe yize alingile, ni ndundo jenyi, ni chize ashile jita ni Amazia mwanangana wa Yunda, hanayisoneka mu mukanda wa sango ja mianangana ja Izalele.

¹⁶ Njoashe yaya tulo; yaya kuli tulamba twenyi. Yamufunda mu Samaria hamwe ni mianangana ja Izalele, mba mwanenyi Jeroboame yamuswana mu wanangana.

¹⁷ Kulutwe lia kufwa cha Njoashe mwana Jehoahaze mwanangana wa Izalele, Amazia mwana Njoashe mwanangana wa Yunda Watwamine ni mwono kumi lia miaka ni miaka yitano.

¹⁸ Mba yitanga yikwo ya Amazia hanayisoneka mu mukanda wa sango ja mianangana ja Yunda.

¹⁹ Mba yamutwama punga mu Yerusaleme. Aye yachinyina ku Lakishi, alioze yatuma kuli iye mu Lakishi yamushihilako.

²⁰ Yamuneha hali tuvwalu akamufunde mu Yerusaleme hamwe ni tulamba twenyi mu chihunda cha David.

²¹ Atu eswe a Yunda atambwile Azaria nikumupwisa mwanangana kusalakana tato Amazia, te kali ni kumi lia miaka ni miaka yisambano.

²² Aye yatunga Elate nikuchihilwisa kuli A-Yunda, mba kulutwe mwanangana yaya tulo; yaya kuli tulamba twenyi.

²³ Ha mwaka kumi ni wamuchitano wa Amazia mwana Njoashe mwanangana wa Yunda, Jeroboame mwana Njoashe mwanangana wa Izalele yaputuka kuyula mu Samaria. Aye wayulile makumi awana a miaka ni mwaka umuwika.

²⁴ Walingile chipi kumeso ja Yehova; milonga yeswe ya Jeroboame mwana Nebate yize avulumwishine nayo A-Izalele kayechele.

²⁵ Yahilwisa njiza ya Izalele chize ku unjililo wa Hamate ndo ku kalunga-lwiji wa Arapa nikulita ni liji lia Yehova Zambi ya Izalele. Liji lize aliambile kuli kavumbi kenyi Yona mwana Amitai mwe profeta wa ku Ngate-Hefere.

²⁶ Mumu Yehova wamwene luyinda wa Izalele musasu chikolo. Kukwasalile niumwe chipwe wa kukasa chipwe wa kutusula; chipwe chikwashi wakuhi hali Izalele.

²⁷ Yehova kazangile te kujimuna jina lia Izalele hashi. Kashika yaapulula ni kwoko lia Jeroboame mwana Njoashe.

²⁸ Yitanga yikwo ya Jeroboame ni yize yeswe alingile, ni ndundo jenyi, ni chize ashile jita, ni chize wahilwishile kuli Izalele Ndamaseku ni Hamate wa Yunda hanayisoneka mu mukanda wa sango ja mianangana ja Izalele.

²⁹ Mba Jeroboame yaya tulo, yaya kuli tulamba twenyi, te kuli mianangana ja Izalele. Mwanenyi Zekaria yamuswana mu wanangana.