1 MIANANGANA 13 - MUKANDA USANDU WA ZAMBI 1975

¹ Ha mwaka makumi aali ni wamuchitatu wa Njoashe mwana Ahazia mwanangana wa Yunda, Jehoahaze mwana Jehu yaputuka kuyula A-Izalele mu Samaria. Wayulile kumi lia miaka ni miaka shimbiali.

² Walingile chipi kumeso ja Yehova; yakaula milonga ya Jeroboame mwana Nebate yize avulumwishine nayo A-Izalele. Kayechele.

³ Utenu wa Yehova wasasaminyine kulimika ni A-Izalele, mba yaahanahana matangwa eswe ku kwoko lia Hazaele mwanangana wa Seria, ni ku kwoko lia Mbene-Hadade mwana Hazaele.

⁴ Alioze Jehoahaze yalemba kuli Yehova mba Yehova yapanjika kuli iye mumu ha kumona luyinda wa A-Izalele chize mwanangana wa Seria waayindamishine.

⁵ (Kashika Yehova yahana kuli A-Izalele umwe chilamwina, chocho yatusuka kuli A-Seria. A-Izalele atwamine mu mbalaka jo ngwe alingile kushi.

⁶ Hindu kechele milonga ya munyachi wa Jeroboame yize avulumwishine nayo A-Izalele. O endelelemo, ni e Ashera asalile mu Samaria nawa.)

⁷ Mwanangana wa Seria te hahichika kuli Jehoahaze makumi atano a akwa tuvwalu wika, ni kumi lia matemba-a-jita, ni kumi lia tununu twa maswalale a kwenda hashi. Mumu mwanangana wa Seria waonwene, waapwishile ngwe yizungu ya ha chizungwilo.

⁸ Yitanga yikwo ya Jehoahaze ni yize yeswe alingile, ni ndundo jenyi, hanayisoneka mu mukanda wa sango ja mianangana ja Izalele.

⁹ Mba Jehoahaze yaya tulo; yaya kuli tulamba twenyi; yamufunda mu Samaria, mba mwanenyi Njoashe yamuswana mu wanangana.

¹⁰ Ha mwaka makumi atatu ni wamuchishimbiali wa Njoashe mwanangana wa Yunda, Njoashe mwana Jehoahaze yaputuka kuyula A-Izalele mu Samaria. Wayulile kumi lia miaka ni miaka yisambano.

¹¹ Walingile chipi kumeso ja Yehova. Kechele milonga yeswe ya Jeroboame mwana Nebate yize avulumwishine nayo A-Izalele. Aye wendelelemo.

¹² Yitanga yikwo ya Njoashe, ni yize yeswe alingile, ni ndundo jize ashile najo jita ni Amazia mwanangana wa Yunda, hanayisoneka mu mukanda wa sango ja mianangana ja Izalele.

¹³ Mba Njoashe yaya tulo, yaya kuli tulamba twenyi. Jeroboame yatambula ngunja yenyi, mba Njoashe yamufunda mu Samaria hamwe ni mianangana ja Izalele.

¹⁴ Achi Elisha te kanayiji ni musongo uze wafwile nawo, mba Njoashe mwanangana wa Izalele yeza kuli iye, yalila hali iye, yamba ngwenyi, Tata! Tata! Matemba ja Izalele ni akwa tuvwalu jo!

¹⁵ Elisha yamba kuli iye ngwenyi, Anda uta ni mivu. Aye yanda uta ni mivu.

¹⁶ Yamba kuli mwanangana wa Izalele ngwenyi, Kwata uta. Aye yaukwata; mba Elisha yasa moko jenyi ha moko ja mwanangana.

¹⁷ Yamba ngwenyi, Azulula njanela yatalikisa ku Chivumbuko. Aye yayazulula. Elisha ngwenyi, Konga! Aye yakonga. Elisha yamba ngwenyi, Awo mwivu wa kukumba cha Yehova; mwivu wa kukumba A-Seria. Mumu kumukalamba A-Seria ku Afeke ndo hiwaonwona.

¹⁸ Elisha yamba ngwenyi, Anda mivu. Aye yanda. Yamba kuli mwanangana wa Izalele ngwenyi, Lamba hashi. Aye yalamba katatu, kunahu.

¹⁹ Mba mutu wa Zambi watenukine nenyi ngwenyi, Chakutamba kachi kulamba katano hanji kasambano, mumu nyi chocho kachi hiwalamba A-Seria ndo hiwaonwona. Alioze haliapwila mualamba katatu wika.

²⁰ Elisha yafwa, yamufunda. Achi ha kuputuka mwaka mbunga ja A-Moape anjilile mu chifuchi,

²¹ mba shimbu machifunda umwe lunga, yamona mbunga ya A-Moape. Kashika yambila mwe mufu mu fuka lia Elisha. Muze mufu haholoka ha yifwaha ya Elisha yahuzuluka, yamana ha molu jenyi.

²² Hazaele mwanangana wa Seria yapinjisa A-Izalele matangwa eswe a Jehoahaze.

²³ Alioze Yehova yaavwila vumbi ni keke; yaanyonga mumu ha usendo wenyi ni Apalahama, ni Izake, ni Yakomba. Kasolo kwaonwona, kanda achiambila kumeso jenyi.

²⁴ Hazaele mwanangana wa Seria yafwa, mba mwanenyi Mbene-Hadade yamuswana mu wanangana.

²⁵ Mba Njoashe mwana Jehoahaze yatambula nawa kuli Mbene-Hadade mwana Hazaele yihunda yize iye te hatambula kuli tato Jehoahaze mu jita. Yisuho yitatu Njoashe yamulamba nikuzuka nawa yihunda ya Izalele.