1 MIANANGANA 12 - MUKANDA USANDU WA ZAMBI 1975

¹ Ha mwaka wamuchishimbiali wa Jehu, Njoashe yaputuka kuyula. Wayulile makumi awana a miaka mu Yerusaleme. Jina lia naye Zibia wa ku Mbia-shipa.

² Njoashe walingile chipema kumeso ja Yehova miaka yenyi yeswe shimbu mwe sasendote Jehoiada wamulongesele.

³ Alioze manangamo kaachijile; atu machishihila yitapo ni kwochela insensu ha manangamo.

⁴ Njoashe yamba kuli asasendote ngwenyi, Mbongo jeswe ja yuma yisandu maneha mu zuwo lia Yehova, jipwe mbongo ja waze malula mutu ha mutu, jipwe mbongo jize matesa hali mutu ni mutu, jipwe mbongo ja mulambu wa mbunge mutu maneha mu zuwo lia Yehova,

⁵ asasendote majitambula, mutu mweswe kuli mukwo, mba malulika najo yituwa ya mu zuwo kweswako mawana hiliapulika.

⁶ Alioze ndo ku mwaka makumi aali ni mwaka wamuchitatu wa mwanangana Njoashe asasendote kanda achilulika yituwa ya mu zuwo.

⁷ Henaho mwanangana Njoashe yasanyika sasendote Jehoiada ni asasendote akwo. Yamba kuli ayo ngwenyi, Kuchi te kunwalulikile yituwa ya mu zuwo? Kashika kanda nutambula nawa mbongo kuli akwenu alioze nujikunjike ha yituwa ya mu zuwo.

⁸ Asasendote yatayiza kanda atambula mbongo kuli atu ni kanda alulika yituwa ya mu zuwo.

⁹ Alioze sasendote Jehoiada yanda umwe mushete; yalokola chituwa mu chifuko chawo; yausa ku lumbu lia chilumbilo ha sali lia chindume muze mutu manjila mu zuwo lia Yehova. Mba asasendote akwa kufunga pito aselemo mbongo jeswe atu anehene mu zuwo lia Yehova.

¹⁰ Muze hamona mbongo hijoka mu mushete, mukwa kusonyeka wa mwanangana ni sasendote mukwa lutwe yeza, yalula mbongo jize awanyine mu zuwo lia Yehova, yajisa mu njeke.

¹¹ Mba mbongo jize hapezalisa yajihana kuli akwa kulinga, milimo, waze te apwile ni ulayi ha zuwo lia Yehova; o yajifweta kuli akarpinteru ni akwa kutunga waze alingile mu zuwo lia Yehova,

¹² ni kuli apedreru ni akwa kupula mawe, ni ha kulanda mitondo, ni mawe a kululika a kujika no yituwa mu zuwo lia Yehova, ni ha yuma yize yeswe aselele kululika lie zuwo.

¹³ Alioze ku mbongo jize anehene mu zuwo lia Yehova kalingilile zuwo lia Yehova misenge ya prata, ni mana, ni mbasia, ni yitavwi, hanji yikwachilo ya oru, hanji ya prata,

¹⁴ mumu hajihana kuli akwa milimo akalulike najo lie zuwo lia Yehova.

¹⁵ Chikwo nawa ha kuhana mbongo kuli waze afwetele akwa milimo kasonekene konta, mumu alingile ni mbunge ja ululi.

¹⁶ Mbongo ja milambu ya uhie ni milambu ha shili ajo kajinehene mu zuwo lia Yehova—ja mbala ja asasendote.

¹⁷ Mba Hazaele mwanangana wa Seria yakanduka, yasa jita ni Ngata; yatambula chihunda. Chocho Hazaele yasa meso jenyi kuya ku Yerusaleme.

¹⁸ Mba Njoashe mwanangana wa Yunda yatambula yuma yeswe yisandu yize tulamba twenyi Yehosofate, ni Jorame, ni Ahazia mianangana ja Yunda te hayitumbikila kuli Yehova, hamwe ni yuma yize iye mwene hasela ku usandu, ni oru yeswe yize awanyine mu upite wa mu zuwo lia Yehova, ni wa mu zuwo lia mwanangana. Yayituma kuli Hazaele, mwanangana wa Seria; aye yakatuka ku Yerusaleme yaya.

¹⁹ Mba yitanga yikwo ya Njoashe ni yize yeswe alingile hanayisoneka mu mukanda wa sango ja mianangana ja Yunda.

²⁰ Alioze tuvumbi twenyi yamukatukila, yamutwama punga, yalamba Njoashe ku zuwo lia Milo mu jila ya kupalumukina ku Sila.

²¹ Mumu Yozakari mwana Shimeate, ni Yehozabade mwana Shomere, tuvumbi twenyi te, yamulamba, yamushiha. Yamufunda ni tulamba twenyi mu chihunda cha David, mba mwanenyi Amazia yamuswana mu wanangana.