1 MIANANGANA 11 - MUKANDA USANDU WA ZAMBI 1975

¹ Muze Atalia naye ya Ahazia hamona mwanenyi hafwa, aye yakatuka, yashiha akwa munyachi wa wanangana.

² Alioze Yehoshiba, mwana wa pwo wa mwanangana Jorame, ndumbu wa Ahazia, yanda Njoashe mwana Ahazia, yamwombola hakachi ka ana ja malunga a mwanangana waze yaashiha. Yamusa hamwe ni ndeji yenyi mu zuwo limwe lia kupomba. Yamusweka kuli Atalia, kashika kamushihile.

³ Mwe mwana wapwile hamwe nenyi, wa kusweka mu zuwo lia Yehova miaka yisambano, alioze Atalia wayulile chifuchi.

⁴ Ha mwaka wamuchishimbiali Jehoiada yatuma kusaka tupitau twa makulakaji ja A-Kare, ni ja tulayi, yaaneha kuli iye mu zuwo lia Yehova. Yakolesa no usendo; yaashingisa mu zuwo lia Yehova, mba yaalweza mwana wa mwanangana.

⁵ Yaamba ngwenyi, Chuma munulinga chino: ha yihanda yitatu ya yenu, chihanda chimuwika waze manjila ha Sambata mapwa tulayi twa zuwo lia mwanangana;

⁶ ni chihanda chimuwika mapwa ku chikolo cha Sura; ni chihanda chimuwika ku chikolo kunyima lia tulayi. Chocho munulayila zuwo; munupwa ngwe chipanga.

⁷ Mbunga jiali ja yenu nwakutuhuka ha Sambata munulayila zuwo lia Yehova kwa kujingilika mwanangana.

⁸ Munujingilika mwanangana kweswe, mutu mweswe ni yitwa ya jita mu kwoko, mba mweswawo manjila hakachi ka mikana akamushihe. Pwenu yenu hamwe ni mwanangana muze matuhuka ni muze manjila.

⁹ Tupitau twa makulakaji alingile nikulita ni shimbi ja sasendote Jehoiada. Mutu mweswe yakungulula atu jenyi, waze te manjila ha Sambata ni waze matuhuka ha Sambata, yeza kuli sasendote Jehoiada.

¹⁰ Mwe sasendote yahana kuli tupitau twa makulakaji makunga ni kepwe ja mu zuwo lia Yehova, jize japwile te ja mwanangana David.

¹¹ Mba tulayi amanyine, mutu mweswe ni yitwa yenyi ya jita mu kwoko, chize ku sali lia zuwo lia chindume ndo ku sali lia ku chimeso kweswe kwa kujingilika chilumbilo, ni zuwo, ni mwe mwanangana.

¹² Mba yatuhwisa mwana wa mwanangana; yamusa chipangula; yamukunjika ye Shindakenyo. Yamupwisa mwanangana; yamuwayisa ni maji, mba yasakwila koshi nikwamba ngwo, Vulie mwanangana!

¹³ Ha kwivwa zungo lia tulayi ni lia atu Atalia yaheta kuli atu mu zuwo lia Yehova.

¹⁴ Yatala, kumanyi mwanangana kanamana ku nguji nikulita ni ndako, ni tupitau ni akwa yitavwi hamwe ni mwanangana. Atu eswe a chifuchi kanalikwiza nikuhumuna yitavwi. Henaho Atalia yasonya mazalo jenyi. Yakalumuka ngwenyi, Utwahe! Utwahe!

¹⁵ Sasendote Jehoiada yatuma tupitau twa makulakaji, waze haasela hali tujita, ngwenyi, Muchizenu haze lia ngango, mba mweswawo mamukaula mushihenu ni katana. Mumu sasendote te hamba ngwenyi, Kanda amushihila mu zuwo lia Yehova.

¹⁶ Chocho yamusela jila; aye yapalika jila ya unjililo wa tuvwalu ku zuwo lia mwanangana. Kwenako amushihilile.

¹⁷ Mba Jehoiada yakolesa usendo hakachi ka Yehova ni mwanangana ni atu, akapwe atu ja Yehova. Yaukolesa hakachi ka mwanangana ni atu nawa.

¹⁸ Mba atu eswe a chifuchi yapalumuka ku zuwo lia Mbale; yalipuzula. Yapalwola yipalupalu yilumbilo ni tuponya; Matane sasendote ya Mbale yamushihila kulutwe lia yilumbilo. Mba mwe sasendote yasela tupitau helu lia zuwo lia Yehova.

¹⁹ Yatwala tupitau twa makulakaji, ni A-Kare, ni tulayi, ni atu eswe a chifuchi; yachiza mwanangana ku zuwo lia Yehova. Yapalika jila ya chikolo cha tulayi ku zuwo lia mwanangana. Aye yatwama ha ngunja ya mianangana.

²⁰ Chocho atu eswe a chifuchi yalikwiza. Chihunda yichihwima mumu hashiha Atalia ni katana ku zuwo lia mwanangana.

²¹ Ha kuputuka kuyula Njoashe wapwile ni miaka shimbiali.