1 MIANANGANA 10 - MUKANDA USANDU WA ZAMBI 1975

¹ Achi Ahabe te kali ni makumi shimbiali a ana a malunga mu Samaria. Mba Jehu yasoneka mikanda yayituma ku Samaria kuli akwa kuyula Yezerele, e makulwana ni waze afungile ana ja Ahabe, ngwenyi,

² Ha kutambula mukanda uno, se nuli ni ana ja mwata wenu, chikwo nawa nuli ni matemba-a-jita, ni tuvwalu, ni chihunda cha chipanga, ni mazalo a utale,

³ Sakulenu yoze hakachi ka ana ja mwata wenu yoze mupema, unalite kanawa, nukamuse ha ngunja ya mwata wenu nukase jita ha munyachi wa mwata wenu.

⁴ Alioze evwile woma wunji. Yamba ngwo, Mianangana aali kahashile kumana kumeso jenyi, mba yetu kuchi mutuchihasa?

⁵ Mba mukwa kuyula zuwo, ni mukwa kuyula chihunda, ni makulwana nawa, ni akwa kufunga yatuma kuli Jehu ngwo, Tuli tuvumbi twenu; mutulinga cheswacho munututuma. Kutuchi kupwisa niumwe mwanangana; cheswacho chanupemena hilingenu.

⁶ Henaho yasoneka mukanda ukwo wamuchiali kuli ayo ngwenyi, Nyi chamwenemwene nuli sali lia yami mukupanjika ku liji liami, Chizenu mitwe ya malunga aze eswe ana ja mwata wenu, nwize kuli yami mu Yezerele hamene tangwa haze liapwa. Achi ana ja mwanangana, eswe makumi shimbiali, apwile hamwe ni akwa lutwe waze aafungile.

⁷ Alioze muze mukanda waahetele akwachile ana ja mwanangana, yaashiha, eswe makumi shimbiali, yasa mitwe yo mu yisoka yayituma kuli Jehu mu Yezerele.

⁸ Kwejile umwe mukeji yamwambulwila ngwenyi, Haneha mitwe ya ana ja mwanangana. Aye ngwenyi, Ayilumbike milumba yiali ku unjililo wa chikolo ndo hamene.

⁹ Mba ha chimene yatuhuka, yamana nikwamba kuli atu eswe ngwenyi, Nuli akwa ululi ngwami. Yami natwamine punga mwata wami, namushihile. Alioze akwa kushiha wano eswe hi aya?

¹⁰ Kashika nyingikenu haliapwila ngwenu, Nichimwe muchihona cha liji lia Yehova lize ahanjikile ha kutwala ku munyachi wa Ahabe, mumu Yehova halinga chize ambile ku kanwa lia kavumbi kenyi Eliya.

¹¹ Chocho Jehu yashiha waze eswe asalile a ku munyachi wa Ahabe mu Yezerele, ni malunga jenyi alemu, ni masepa jenyi, ni asasendote jenyi; niumwe wasalile wakuhi.

¹² Yakatuka yaya ku Samaria, alioze shi mbu machipalika ku Mbete-ekede ya tufunga,

¹³ Jehu yatakana ni anakwo ja Ahazia, mwanangana wa Yunda. Yamba ngwenyi, Yenu aya? Yakumbulula ngwo, Tuli anakwo ja Ahazia, tunayi kumeneka ana ja mwanangana ni ana ja mwazovu.

¹⁴ Aye yamba ngwenyi, Akwatenu amwono! Yaakwata amwono mba yaashihila ku wina wa Mbete-ekede; makumi awana a malunga ni malunga aali. Kahichikile niumwe.

¹⁵ Ha kukatukako yatakana ni Jehonadabe mwana Rekabe, te kaneza kumupatwiza. Yamumeneka ngwenyi, Mbunge ye yinawaha ngwe mbunge yami yinawaha ni yena? Jehonadabe yakumbulula ngwenyi, Yinawaha. Aye ngwenyi, Nyi yinawaha ngwehe kwoko lie. Yamwaha kwoko lienyi mba yamunyinyisa kuli iye mu temba.

¹⁶ Yamba ngwenyi, Tweya ni yami ukamone chize nakulinga ni mbunge yeswe hali Yehova. Chocho yamwendesa mu temba lienyi.

¹⁷ Ha kuheta ku Samaria yashiha waze eswe a Ahabe asalile ndo yaonwona, nikulita ni liji lia Yehova lize ahanjikile kuli Eliya.

¹⁸ Mba Jehu yakungulula atu eswe yamba kuli ayo ngwenyi, Ahabe walingilile Mbale hakehe, alioze Jehu mamulingila chikolo.

¹⁹ Kashika Sanyikenu kuli yami aprofeta eswe a Mbale, ni akwa kumuwayila eswe, ni asasendote jenyi eswe; niumwe kanda ahonako, mumu mungushiha mulambu unene kuli Mbale. Mweswe mahonako kechi kutwama ni mwono. Alioze Jehu yachilinga ni mana hanga akonwone akwa kuwayila Mbale.

²⁰ Jehu yamba ngwenyi, Selenu chikungulwila chilemu hali Mbale. O yachilakenya.

²¹ Jehu yatuma ndusu mweswe mu Izalele, mba akwa kuwayila Mbale eswe yeza, chipwe lunga umuwika kahonene kusoloka. Yanjila mu zuwo lia Mbale. Zuwo lia Mbale yilizala tò chize ku songo ndo ku songo.

²² Jehu yamba kuli mukwa kufunga mazalo ngwenyi, Nehenu mazalo hali akwa kuwayila Mbale eswe. Aye yaanehena mazalo.

²³ Mba Jehu yanjila mu zuwo lia Mbale hamwe ni Jehonadabe mwana Rekabe. Yamba kuli akwa kuwayila Mbale ngwenyi Fupenu kanawa, niumwe kavumbi ka Yehova kanda apwa hakachi kenu muno, ndo akwa kuwayila Mbale wika.

²⁴ O yanjila kushiha yitapo ni milambu ya kulumba. Achi Jehu halisela makumi nake a malunga haze ngwenyi, Nyi mutu matayiza kuchina yoze hinamukunjikaye, mwono wenyi muusalakana mwono wa yoze machina.

²⁵ Mba muze hamana kulambula mulambu wa kulu-mba, Jehu yamba kuli tulayi ni tupitau ngwenyi, Njilenu nuashihe. Kanda nutayiza niumwe kutuhuka. Yaalamba ni katana, mba tulayi ni tupitau yaambila; yanjila muchima lia zuwo lia Mbale,

²⁶ yachiza tuponya aze apwilemo, yaocha.

²⁷ Yonwona lukaponya lwa Mbale; yonwona zuwo lia Mbale, yalitenga retrete ndo musono.

²⁸ Chocho Jehu yonwona Mbale ku chifuchi cha Izalele.

²⁹ Alioze kechele milonga ya Jeroboame mwana Nebate yize avulumwishine nayo A-Izalele, ana-a-ngombe a oru aze apwile mu Mbetele ni mu Ndane.

³⁰ Mba Yehova yamba kuli Jehu ngwenyi, Mumu hiwalinga kanawa ha kumanununa chize Chinapeme kumeso jami, hiwalinga kuli akwa munyachi wa Ahabe cheswe chapwile mu mbunge yami, kashika ana je a malunga kumakatwama ha ngunja ya Izalele ndo ku chisemuko chamuchiwana.

³¹ Alioze Jehu kanyongene kwenda mu shimbi ja Yehova Zambi ya Izalele ni mbunge yenyi yeswe. Kechele milonga ya Jeroboame yize avulumwishine nayo A-Izalele.

³² Ha matangwa aze Yehova yaputuka kutepulula Izalele. Hazaele yaapupa mu njiza jeswe ja Izalele,

³³ chize ku Yordau ha kuya ku Chivumbuko, chifuchi cheswe cha Ngiliate, ni A-Ngate, ni A-Rupene, ni A-Manase, chize ku Aroere ku chikulo cha Arnone kweswe ku Ngiliate ni Mbashane.

³⁴ Yitanga yikwo ya Jehu ni yize yeswe alingile, ni ndundo jenyi jeswe, hanayisoneka mu mukanda wa sango ja mianangana ja Izalele.

³⁵ Mba Jehu yaya tulo; yaya kuli tulamba twenyi; yamufunda mu Samaria. Mba mwanenyi Jehoahaze yamusalakana mu wanangana.

³⁶ Jehu wayulile A-Izalele mu Samaria makumi aali a miaka ni miaka nake.