1 MIANANGANA 1 - MUKANDA USANDU WA ZAMBI 1975

¹ Ha Kufwa Ahabe A-Moape akatukilile A-Izalele.

² Ahazia te haholokela ku njanela ya chipatulo cha kwilu mu Samaria; kanayiji. Mba yatuma mikeji ngwenyi, Yénu nuhule kuli Mbale-Zepupe, Zambi ya Ekrone, nyi munguhinduka nyi ka.

³ Alioze mungelo wa Yehova yamba kuli Eliya Ka-Tishibe ngwenyi, Katuka upatwize mikeji ja mwanangana wa Samaria wambe kuli ayo ngwe, Nunayi kuli Mbale-Zepupe, zambi ya Ekrone, mumu mwe Zambi wakuhi mu Izalele, nyi kuchi?

⁴ Kashika Yehova kanambe ngwenyi, Kuchi kukatuka ha muhela haze unapombo; pundu kumuofwa. Eliya yaya.

⁵ Mikeji yahiluka kuli mwanangana mba iye yaahula ngwenyi, Kuchi te nunahiluka?

⁶ O yamba kuli iye ngwo, Yeza umwe lunga kutupatwiza ngwenyi, Hilukenu kuli mwanangana yoze wanutumine nukambe kuli iye ngwenu, Unatumu kuhula kuli Mbale-Zepupe, zambi ya Ekrone, mumu mwe Zambi wakuhi mu Izalele, nyi kuchi? Kashika kuchi kukatuka ha muhela haze unapombo; pundu kumuofwa.

⁷ Aye yamba kuli ayo ngwenyi, Lunga yoze wejile kunupatwiza nikunwaha maliji ano, kuchi apwa?

⁸ Yamukumbulula ngwo, Mukwa wonawona. Kanalijichika muya wa lambu mu zalilo. Aye ngwenyi, Mwe Eliya Ka-Tishibe.

⁹ Henaho mwanangana yatuma kuli iye kapitau ka makumi atano ni makumi jenyi atano. Yaya kuli iye, yamuwana hatwama ha mulundu. Yamba kuli iye ngwenyi, Ena mutu wa Zambi, mwanangana ngwenyi, Palumukako.

¹⁰ Eliya yakumbulula kuli kapitau ka makumi atano ngwenyi, Nyi nguli mutu wa Zambi kahia kahulumuke mwilu kakwonwone yena ni makumi je atano. Kwahulumukine kahia mwilu nikumwonwona ni makumi jenyi atano.

¹¹ Cheka nawa yatuma kuli iye kapitau mukwo wa makumi atano, ni makumi jenyi atano. Aye yamba ngwenyi, Ena mutu wa Zambi, mwanangana ngwenyi, Palumuka nikawashi.

¹² Eliya yamba kuli ayo ngwenyi, Nyi nguli mutu wa Zambi kahia kahulumuke mwilu kakwonwone yena ni makumi je atano. Mba kahia ka Zambi kahulumukine mwilu nikumwonwona ni makumi jenyi atano.

¹³ Cheka nawa yatuma kapitau kamuchitatu ka makumi atano ni makumi jenyi atano. Mba kapitau kamuchitatu ka makumi atano yaya, yakundama, yazondama ha makungunwa jenyi kumeso ja Eliya nikumulembelela ngwenyi, Mutu wa Zambi, ngunalembe, mwono wami ni mwono wa wano makumi atano a tuvumbi twe upwe ulemu kumeso je.

¹⁴ Ngwami, kwahulumukine kahia mwilu nikwonwona tupitau atangu a makumi atano ni atu jo. Alioze haliapwila mwono wami upwe ulemu kumeso je.

¹⁵ Mungelo wa Yehova yamba kuli Eliya ngwenyi, Palumuka nenyi. Kanda umuvwila woma. Aye yakatuka, yapalumuka hamwe nenyi kuli mwanangana.

¹⁶ Yamba kuli iye ngwenyi, Yehova kanambe ngwenyi, Mumu mwe Zambi wakuhi mu Izalele yoze muhasa kumuhula, kashika hiwatuma kuhula kuli Mbale-Zepupe, zambi ya Ekrone, nyi kuchi? Kashika kuchi kukatuka ha muhela haze unapombo; pundu kumuofwa.

¹⁷ Chocho yafwa nikulita ni liji lia Yehova ahanjikile kuli Eliya. Jorame yamusalakana, yaputuka kuyula mu mwaka wamuchiali wa Jorame mwana wa Yehosofate mwanangana wa Yunda; mumu te keshi mwana.

¹⁸ Yitanga yikwo ya Ahazia yize alingile hanayisoneka mu mukanda wa Sango ja mianangana ja Izalele.