1 Korintu 9 - MUKANDA USANDU WA ZAMBI 1975

¹ Yami hi nguli postolo ko, nyi? Hi nguli mukwa kutusuka ko, nyi? Chamwene Yesu Mwene wetu, nyi? Yenu hi nuli chitanga chami muli Mwene ko, nyi?

² Kachi kuli akwo hi nguli postolo ko, hindu nguli chocho kuli yenu; mumu yenu nuli muli Mwene, nuli Chijikilo cha upostolo wami.

³ Kulisambisa chami kuli waze akungusopesa, chino ngwami,

⁴ Yetu kutushi chiyulo cha kulia ni cha kunwa, nyi?

⁵ Kutushi chiyulo cha kutwala hamwe ni yetu, umwe pangi muli Mwene, mukwetu-pwo, chizechene ngwe apostolo akwo ni anaakwo ja Mwene, ni Sefwa, nyi?

⁶ Shina yami wika ni Mbarnavwe kutushi chiyulo cha kulitwamina milimo, nyi?

⁷ Swalale muka malingila ha kulifweta mwene? Iya matumba munda mba kechi kalia mihuko yawo? Hanji iya mafunga chendo cha yimuna mba keshi kunwa yamwa ya chendo?

⁸ Ngunahanjika yuma ngwe nikulita ni atu, nyi? Shina ye shimbi nawa kuyishi kwamba chimuwika, nyi?

⁹ Mumu chinasonewa mu shimbi ya Mose ngwo, Kanda ukasa kata ku kanwa lia ngombe yoze mazungula mbuto. Shina Zambi kanafungu ngombe, nyi?

¹⁰ Shina kanachambe mumu hali yetu? Ewa, mumu hali yetu chasonewene: mumu yoze machipa chamutamba kuchipa nikutalatala, ni yoze meta mbuto, meta nikutalatala kutambula chihanda chayo.

¹¹ Kachi twakuwile kuli yenu yuma ya uspiritu, chuma chinene kachi mutukacha yuma yenu ya kutwala ku mujimba, nyi?

¹² Kachi akwo matambula chihanda cha chiyulo chino hali yenu, Shinaho yetu, nyi? Hindu kutwalingile ni chiyulo chino; alioze twakunyongonona ha yuma yeswe, hanga kutuchi kasa chilinda nichimwe mu jila ya sango lipema lia Kristu.

¹³ Kunwanyingikine, nyi? Waze akulingila yuma yisandu kakulia yuma ya ku tembele, ni waze akulingila ku chilumbilo, kakupwa ni chihanda cha ku chilumbilo?

¹⁴ Chizechene Mwene hanasela hali waze akwambujola sango lipema akalie ya ku sango lipema.

¹⁵ Alioze chalingile ni yino yuma niyimwe: chasonekene yino yuma hanga akachilinge chocho kuli yami; mumu chinanguwahila kufwa shina umwe mapwisa chamokomoko kulisambisa chami.

¹⁶ Mumu kachi mungwambujola sango lipema, kachi chishi nacho nichimwe cha kulisamba nacho; mumu hanase chiteli hali yami; mumu lamba kuli yami, kachi chishi kwambujola sango lipema.

¹⁷ Mumu kachi mungulinga chino ku upale wa yami mwene, kachi mungupwa ni fweto: alioze kachi hi ku upale wa yami mwene ko, kanangukunjika uselo.

¹⁸ Fweto yami kevwe yika? Yino, muze mungwambujola sango lipema, mungupwisa sango lipema Hawana, hanga chichi kalinga ni chiyulo chami cheswe mu sango lipema.

¹⁹ Mumu chipwe natusukile kuli atu eswe, nalipwishile ndungo kuli eswe, hanga ngukazuke anji ahiana.

²⁰ Kuli A-Yunda, nalipwishile ngwe Ka-Yunda, hanga ngukazuke A-Yunda; kuli waze atwama kushi lia shimbi, nalipwishile ngwe kushi lia shimbi, hi nikupwa yami mwene kushi lia shimbi ko, hanga ngukazuke waze ali kushi lia shimbi.

²¹ Kuli waze keshi shimbi nalipwishile ngwe chishi shimbi, kuchapwile ngwe chishi shimbi kuli Zambi, alioze mu shimbi kuli Kristu, hanga ngukazuke waze keshi shimbi.

²² Kuli alelu, nalipwishile mulelu, hanga ngukazuke alelu; nalipwishile yuma yeswe kuli atu eswe, hanga ni yuma yeswe ngukalamwine amwe.

²³ Nakulinga yuma yeswe mumu ha sango lipema, hanga nalio ngukapwe mukwa kuliangana-ni-mukwo.

²⁴ Kunwanyingikine, nyi? Ngwo, Waze mazomboka muma mwa kuzomboka, mazomboka eswe, alioze umuwika matambula kwononona? Chocho zombokenu, hanga nukazuke.

²⁵ Waze malitachika ha kuheha, masúla ku yuma yeswe. Achi, o machilinga mukutambula chipangula cha kupola, alioze yetu chize kuchishi kupola.

²⁶ Kashika ni yami, chocho nakuzomboka, hi ngwe mu ujilijili ko; chocho nakulimbufula, hi kufufula ko mu tetela;

²⁷ alioze nakumbwezula mujimba wami, nakuutwala ku undungo: kuchina hanji, muze te hinambujola sango lipema kuli akwo, yami mwene mungwalumuka chisashili.