1 Korintu 8 - MUKANDA USANDU WA ZAMBI 1975

¹ Achi, ha kutwala ku yuma yize hanayilamtula yitapo ku mahamba: tunanyingika yetu eswe yinyingi tuli nayo. Yinyingi kuyakufuza, alioze zango kuliakukolesa.

² Kachi umwe manyonga ngwe kananyingika chuma chimwe, kachi kanda achinyingika nichimwe ngwe chamutamba kunyingika;

³ alioze kachi umwe mazanga Zambi, iye kanamunyingika kuli Zambi.

⁴ Kashika ha kutwala ku kulia cha yuma yize hanayitambula yitapo ku mahamba, tunanyingika hamba hi chimwe ko hano hashi, ni Zambi mukwo wakuhi niumwe, shina umuwika.

⁵ Mumu chipwe kwali waze anaavuluka ngwo mazambi, chipwe mwilu, chipwe hano hashi; ngwe kwali mazambi anji ni ene anji.

⁶ Hindu kuli yetu, kwali Zambi umuwika, mwe Tata, yuma yeswe yinakatuka kuli iye, ni yetu tuli hali iye; ni Mwene umuwika, Yesu Kristu, kuli iye yuma yeswe yinakatuka, ni yetu kuli iye.

⁷ Alioze yinying; yize amwe keshi nayo; alioze amwe ku mbunge jo ha kutwala ku hamba, ndo haliapwila kakulia ngwe chuma chize hanachitambula chitapo ku hamba; ni mbunge jo se jilelu mujilichisa.

⁸ Alioze kulia kuchishi kutuneha kumeso ja Zambi: chipwe kutushi kulia, kutushi kuhona; chipwe kachi mutulia kutushi kuhiana.

⁹ Alioze kanyamenu kuchina hanji chino chiyulo chenu cha kulia muchipwa chitalingiso kuli alelu.

¹⁰ Mumu kachi umwe makumona, yena uli ni yinyingi, unatwama nikulia mu tembele ya hamba, mbunge yenyi, kachi mapwa mulelu, muyalumuka kulia yuma yize hanayitambula ku mahamba, nyi?

¹¹ Mumu ku yinyingi ye yoze mulelu malumbuka, ndumbu yoze Kristu wamufwilile.

¹² Chocho ha kuvulumuna mandumbu, ha kulemeka mbunge jo jilelu, munuvulumuna Kristu.

¹³ Kashika kachi kulia muchitalingisa ndumbwami, chichi kalia nawa yifwo niyimwe ndo ku miaka ya mutolo, hanga chichi katalingisa ndumbwami.