1 Korintu 6 - MUKANDA USANDU WA ZAMBI 1975

¹ Nyi umwe kali ni chuma cha kusopa ni mukwo, mahamuka kuchisopa kumeso ja yihenge, hi kumeso ja asandu ko, nyi?

² Hanji kunwanyingikine asandu makapatwila akwa hashi? Mba kachi munukapatwila akwa hashi, kunwatelele kupatula yikuma yikepekepe, nyi?

³ Kunwanyingikine mutukapatwila angelo? Shinaho chikolo yuma ya kutwala ku mwono uno?

⁴ Kashika kachi munupwa ni yuma ya kupatula ha kutwala ku mwono uno, munwasela kupatula waze anapu amokomoko mu chikungulwila, nyi?

⁵ Ngunahanjika chino kunukolesa sonyi. Kumanyi, mukwa mana wakuhi hakachi kenu, nyi? Chipwe umuwika, yoze mahasa kupatula hakachi ka mandumbu jenyi, nyi?

⁶ Alioze ndumbu masopesa ndumbu, ni chize kumeso ja waze keshi kufuliela.

⁷ Ka, hichinapu kapalia muli yenu, nwakulisopesa umwe ni mukwo ni mukwo. Kuchi te ngwe Shinaho kunushi kuliecha akanulinge chipi? Kuchi te ngwe Shinaho kunushi kuliecha akanulake?

⁸ Alioze yenwene nwakulinga yipi, nwakulaka, ni kuli mandumbu jenu.

⁹ Hanji kunwanyingikine yihenge kechi kahinga wanangana wa Zambi. Kanda nulionga: chipwe mapangala, chipwe akwa kukombelela mahamba, chipwe yitanji, chipwe akwa luchisa, chipwe akwa utumwa,

¹⁰ chipwe eji, chipwe akwa kwivwa kuzo, chipwe akwa kuzengewa, chipwe akwa kutukana, chipwe akwa kuhianyisa ndando, kechi kahinga wanangana wa Zambi.

¹¹ Ngwe wano amwe a kuli yenu nwapwile: alioze hananusanyisa, alioze hananusela ku usandu, alioze hananusambisa mu jina lia Mwene Yesu Kristu, muli Spiritu ya Zambi yetu.

¹² Yuma yeswe yinalite ni shimbi hali yami kulinga; alioze yuma yeswe kuyishi kufumbula; yuma yeswe yinalite ni shimbi hali yami kulinga; alioze chichi kuliecha akanguzeyese ku nichimwe.

¹³ Kulia ha jimo, ni jimo ha kulia: alioze Zambi kumakahwisa yeswe yiali. Alioze mujimba hi ha utanji ko, alioze hali Mwene, ni Mwene ha mujimba:

¹⁴ ni Zambi yoze wahindwishile Mwene, kumakatuhindwisa nawa ku tachi jenyi.

¹⁵ Kunwanyingikine mijimba yenu yinapu yihanda ya Kristu? Kevwe munguchiza yihanda ya Kristu nguyipwise yihanda ya chikoi, nyi? Ka, pundu!

¹⁶ Kuma, kunwanyingikine nyi, yoze malinunga ni chikoi mapwa mujimba umuwika? Mumu kanambe ngwenyi, E aali kumakapwa musunya umuwika.

¹⁷ Alioze yoze malinunga ni Mwene mapwa Spiritu umuwika.

¹⁸ Chinenu utanji. Milonga yize yeswe mutu mavulumuna yili haze lia mujimba; alioze yoze malinga utanji mavulumuna mujimba wenyi mwene.

¹⁹ Kuma, kunwanyingikine nyi, mujimba wenu unapu tembele ya Spiritu Musandu, yoze uli muli yenu, yoze nuli nenyi wa kuli Zambi? Hi nuli a yenwene ko;

²⁰ mumu hananulande ni ndando: kashika Chichimiekenu Zambi mu mijimba yenu ni mu maspiritu jenu, mumu ya Zambi.