1 Korintu 4 - MUKANDA USANDU WA ZAMBI 1975

¹ Mutu mweswe atumone ngwe tuvumbi twa Kristu, ni tuselo twa yijimbikilo ya Zambi.

² Mba hali tuselo chatamba kwawana amwenemwene.

³ Hindu kuli yami, koma kakepekepe nyi mangupatwila kuli yenu, hanji ku ungaji wa atu; ewa, chishi kulipatwila yami mwene.

⁴ Mumu Chanyingikine nichimwe cha kulihisa nacho; hindu chishi kusamba ni chino: alioze yoze wakungupatwila, mwe Mwene.

⁵ Kashika kanda nukapatula nichimwe shimbu te mwaka kanda uheta, ndo Mwene meza, iye makaneha ku pangu yuma ya kuhengama ya milima, makasolola manyonga ja mbunge; hohene mutu ni mutu makapwa ni uhaliso wenyi wa kuli Zambi.

⁶ Achi, yino yuma mandumbu, hinatwala kuli yami mwene ni kuli Apolu mumu hali venu; hanga muli yetu, nukalilongese kanda mikecha manyonga jenu kuhiana yuma yize yinasonewa; niumwe wa kuli yenu kanda alifuza umwe kuli mukwo ni mukwo.

⁷ Kulipwila chino, iya wakuhelecho? Chika uli nacho chize kwachitambwile? Alioze kachi wachitambwile kuchi te unalisambe ngwe kwachitambwile?

⁸ Kulu nwayuka, kulu kunwapwa pichi, yetu kutushiko mba nwapwa mianangana; ewa, ngunazange nukayule, ni yetu nawa tukayule hamwe ni yenu.

⁹ Mumu ngunashinginyeka ngwami, Zambi hanatusela apostolo ha kusula eswe, ngwe atu aahishile ku kufwa; mumu tunapu chitala kuli akwa hashi, ni kuli angelo, ni kuli atu.

¹⁰ Yetu tuli yihepuke mumu hali Kristu, alioze yenu kunwakanyama muli Kristu; yetu tuli alelu, alioze yenu kunwatakama; yenu nuli ni ulemu, alioze yetu tunasauka.

¹¹ Chipwe ndo ku ola yino, twakwivwa zala ni pwila, tuli ni uvu, kakutumbufula, tunendangana, kutushi zuwo;

¹² twakukilikita, nikulinga milimo ni moko ja yetwene; kakututuka, etu twakuwahisa; kakutuhungumiona, etu twakulihumikiza;

¹³ kakutukowela, etu twakuliumba: kakutupwisa ngwe yiswaswa ya hano hashi, yikongwakongwa ya yuma yeswe, chipwe ndo haliapwila.

¹⁴ Chasonekene yino yuma mukunukolesa sonyi, alioze mukunukanyamisa ngwe ana jami ngunanuzange chikolo.

¹⁵ Mumu chipwe munupwa ni kumi lia tununu twa yifumbe muli Kristu, hindu kunushi atatenu anji; mumu muli Kristu Yesu nanusemene ku sango lipema.

¹⁶ Ngunaliumbu kuli yenu kashika, nukapwe akwa kungwimbulula.

¹⁷ Ha chikuma chino natumine kuli yenu Timoteu, yoze wapwa mwanami ngunamuzange chikolo ni wamwenemwene muli Mwene, iye makanwiwulula majila jami aze ali muli Kristu, chizechene ngwe nakulongesa kweswe mu yikungulwila yeswe.

¹⁸ Achi, amwe kanalifuzu, ngwe chichi keza kuli yenu.

¹⁹ Alioze kumungukeza kuli yenu kulutwe lia shimbu likepe kachi Mwene mapala, mba mungukanyingika tachi ja waze akulifuza, hi liji ko.

²⁰ Mumu wanangana wa Zambi hi ni liji ko, alioze ni tachi.

²¹ Chika nunazange? Ngukeze kuli yenu ni mbwechi, nyi? Shina ni zango ni spiritu ya kushimbika?