1 Korintu 3 - MUKANDA USANDU WA ZAMBI 1975

¹ Yami, mandumbu, Chahashile kuhanjika kuli yenu ngwe kuli akwa uspiritu, alioze ngwe kuli akwa musunya, ngwe kuli anaakemba muli Kristu.

² Nanunwishine yamwa, hi kulia ko, mumu kunwahashile kuchitambula, chipwe haliapwila kanda nuchihasa kuchitambula, ka.

³ Mumu nuchili akwa musunya: mumu se kuyili hakachi kenu, ni ukwa, ni vunda, ni kuhangujola, hi nuli akwa musunya ko, nyi? Kunwendele nikulita ni atu, nyi?

⁴ Mumu muze umwe mamba ngwenyi, Ami nguli wa Paulu; ni mukwo ngwenyi, Ami nguli wa Apolu; hi nuli akwa musunya ko, nyi?

⁵ Paulu kuchi apwa? Ni Apolu kuchi apwa? Tuvumbi waze ku liji lio nwafulielele kuli Mwene; ni eswe nikulita ngwe amuhele Mwene.

⁶ Ami natumbile, Apolu wahinjilile; alioze Zambi watatwishile.

⁷ Chocho, chipwe yoze wakutumba hi chimwe ko, chipwe yoze Wakuhinjila, ka; alioze Zambi yoze wakutatwisa.

⁸ Achi, yoze wakutumba ni yoze Wakuhinjila kanapu umuwika, alioze mutu ni mutu kumakatambula fweto yenyi mwene, nikulita ni kukilikita chenyi mwene.

⁹ Mumu tuli akwa milimo-ni-akwo ja Zambi, yenu nuli ulime wa Zambi, chitunga cha Zambi.

¹⁰ Nikulita ni vumbi lia Zambi lize anguhele, ngwe chilangaji wa lutwe wa mana, yami nasele fundamentu, mukwo matungaho. Alioze mutu ni mutu akakanyame ngwe chize matungaho.

¹¹ Mumu fundamentu yikwo niumwe mahasa kusa shina yize hanase, yenayo Yesu Kristu.

¹² Alioze kachi umwe matunga ha fundamentu yino, oru, prata, mawe alemu, mutondo, mwambu, yiswaswa:

¹³ kumakasolola chitanga cha mutu ni mutu mumu lie tangwa mulikachilweza, mumu makachisolola ni kahia; kahia kumukakeseka chitanga cha mutu ni mutu chize muchipwa.

¹⁴ Kachi chitanga cha umwe muchisala, chize atungileho, kachi makatambula kwononona.

¹⁵ Kachi chitanga cha umwe muchiwema, kachi makafulwa; alioze iye mwene makamulamwina, hindu ngwe wapalika mu kahia.

¹⁶ Te kunwanyingikine, yenu nuli tembele ya Zambi, ni Spiritu ya Zambi katwama muli yenu.

¹⁷ Kachi umwe malumbula tembele ya Zambi, kachi Zambi makamulumbula; mumu tembele ya Zambi yisandu, yenayo nunapu yenu.

¹⁸ Niumwe kanda ahonga nichimwe. Kachi umwe malishinginyeka kupwa mukwa mana hakachi kenu ha mwakono, apwe chihepuke, hanga akapwe mukwa mana.

¹⁹ Mumu mana ja hano hashi kanapu uhepuke kuli Zambi. Mumu chinasonewa ngwo, Kakukwata akwa mana ni kalimbavuli ko ene.

²⁰ Ni cheka nawa ngwo, Mwene kananyingika kutaka cha akwa mana kuchaseka.

²¹ Kashika niumwe kanda alisamba muli atu, mumu yuma yeswe niyenu;

²² chipwe Paulu, hanji Apolu, hanji Sefwa, hanji hano hashi, hanji mwono, hanji kufwa, hanji yuma ya haliapwila, hanji yuma yize muyizaho; yeswe niyenu;

²³ ni yenu nuli a Kristu; ni Kristu wa Zambi.