1 Korintu 2 - MUKANDA USANDU WA ZAMBI 1975

¹ Yami, mandumbu, muze nejile kuli yenu, chejile ni kulenga cha maliji, hanji ni mana, nikwambujola kuli yenu Shindakenyo ya Zambi.

² Mumu napatwile ngwami, chichi kunyingika nichimwe hakachi kenu shina Yesu Kristu, wa kuliachila ha kulusu.

³ Napwile hamwe ni yenu ni ulelu ni woma ni kuchikima chinji.

⁴ Liji liami ni kwambujola chami kuyapwile ni maliji a kukununa ni mana ja atu, alioze ni kukumika cha Spiritu ni tachi:

⁵ hanga Ufulielo wenu kuuchi kapwa mu mana ja atu, alioze ku tachi ja Zambi.

⁶ Alioze twakuhanjika mana hakachi ka angunu: hindu hi mana ja mwakono ko, chipwe hi mana ja miata ja mwakono ko, aze meza kuhwa:

⁷ alioze twakuhanjika mana ja Zambi mu chijimbikilo, te mana a kuhengama, aze Zambi wafunjikile shimbu kanda kushi lia miakulwila, ha uhenya wetu.

⁸ Aze niumwe wa kuli miata ja mwakono kaanyingikineko, mumu kachi aanyingikine, kachi kahachilile ha kulusu Mwene wa uhenya.

⁹ Alioze nikulita ngwe chinasonewa ngwo, Yuma yize meso kayimwene, ni matwi kayivwile, kuyanjilile mu mbunge ya mutu, yuma yize hanalulika Zambi hali waze akumuzanga.

¹⁰ Alioze Zambi hanayisolola kuli yetu ku tachi ja Spiritu: mumu Spiritu kakuhengula ha yuma yeswe, ewa, yuma yikalu ya Zambi.

¹¹ Mumu iya hakachi ka atu manyingika yuma ya mutu shina spiritu ya mutu, yize yili muli iye? Chizechene yuma ya Zambi niumwe manyingika shina Spiritu ya Zambi.

¹² Alioze kutwatambwile Spiritu ya hano hashi, alioze Spiritu yoze wa kuli Zambi; hanga tukanyingike yuma yize hanatwehe ni vumbi kuli Zambi.

¹³ Ye yize twakuyihanjika, hi ni maliji aze ko mana ja atu akulongesa; alioze aze Spiritu kakulongesa; nikupalakenya yuma ya uspiritu ni uspiritu.

¹⁴ Achi, mutu wa musunya keshi kutambula yuma ya Spiritu ya Zambi: mumu yinapu uhepuke kuli iye; iye kahashile kuyinyingika, mumu kakuyisa chinyingi ni Spiritu.

¹⁵ Alioze mukwa uspiritu mapatula yuma yeswe, iye mwene keshi kumupatwila kuli niumwe.

¹⁶ Mumu iya hananyingika kunyonga cha Mwene hanga akamufumbe? Alioze kunyonga cha Kristu tuli nacho yetu.