1 Korintu 15 - MUKANDA USANDU WA ZAMBI 1975

¹ Alioze ngunanunyingikisa, mandumbu, sango lipema lize nanwambujolele, lize nawa nwatambwile, mwenamo nawa nunamana;

² ku lienalio hananulamwina, kachi munukalalaminya liji lize nanwambujolele, shina nwafulielele chamokomoko.

³ Mumu nanukunjikile hatangu chize nawa yami natambwile, ngwe Kristu wafwilile milonga yetu nikulita ni yisoneko;

⁴ amufunjile; amuhindwishile ha tangwa liamuchitatu nikulita ni yisoneko;

⁵ amonekene kuli Sefwa; mba kulutwe kuli e kumi ni aali;

⁶ kulutwe amonekene kuli mandumbu kuhiana kulakaji atano ha chisuho chimuwika, a kuli ayo anji ali ni mwono ndo haliapwila, alioze amwe hanayi tulo;

⁷ kulutwe amonekene kuli Tiangu: kulutwe kuli apostolo eswe;

⁸ ha kusula eswe, ngwe kuli mwana wa kusema shimbu kanda, wamonekene kuli yami nawa.

⁹ Mumu ami nguli mukepe Wahiana eswe a kuli apostolo, chatelele akanguvuluke ngwo, Postolo, mumu nahungumionene chikungulwila cha Zambi.

¹⁰ Alioze ku vumbi lia Zambi nguli chize nguli; ni vumbi lienyi lize anguhele kuliapwile liamokomoko; alioze nakilikichile kuhiana eswe: hindu hi yami ko, alioze vumbi lia Zambi lize liapwile hamwe ni yami.

¹¹ Chipwe yami, chipwe ayo, chocho twakwambujola, ni chocho nwafulielele.

¹² Achi, nyi anambujola Kristu, ngwe hanamuhindwisa hakachi ka afu, ngwe kuchi amwe hakachi kenu anambe ngwo, Uhindukilo wa afu wakuhi niumwe?

¹³ Alioze kachi wakuhi Uhindukilo wa afu, kachi chipwe Kristu kamuhindwishile.

¹⁴ Nyi kachi kahindwishile Kristu, kachi kwambujola chetu chamokomoko, ni Ufulielo wenu nawa wamokomoko.

¹⁵ Ewa, kanatuwane yela ja Zambi ja mahuza; mumu twashindakenyene hali Zambi ngwetu, Wahindwishile Kristu: yoze kamuhindwishileko nyi chocho chinapu keshi kuhindwisa afu.

¹⁶ Mumu kachi keshi kuhindwisa afu, chipwe Kristu kamuhindwishile:

¹⁷ nyi kachi kahindwishile Kristu, Ufulielo wenu wamokomoko; ni yenu nuchili mu milonga yenu.

¹⁸ Mba waze nawa hanayi tulo muli Kristu, hanatoko.

¹⁹ Nyi mu mwono uno wika tuli ni kutalatala muli Kristu, kachi yetu a kuli atu eswe, twahiana hunya.

²⁰ Alioze haliapwila hanahindwisa Kristu hakachi ka afu, muhuko utangu wa kuli waze hanayi tulo.

²¹ Mumu se kuli mutu kufwa chejilile, kuli mutu nawa Uhindukilo wa afu wejilile.

²² Mumu chizechene ngwe muli Alama eswe anafu, chocho nawa muli Kristu makapwisa eswe ni mwono.

²³ Alioze mutu ha mutu mu ngango yenyi: Kristu we muhuko utangu; mba kulutwe waze a Kristu ha kuheta chenyi.

²⁴ Mba kulutwe mukukapwa songo muze makakunjika wanangana kuli Zambi kanda mwe Tata, muze te hahwisa kuyula cheswe ni yiyulo yeswe ni tachi jeswe.

²⁵ Mumu chamutamba kuyula ndo masa akwa kole jenyi eswe kushi lia yiliato yenyi.

²⁶ Mukwa kole wa kusula kuhwa, iye kufwa.

²⁷ Mumu ngwenyi, Wazeyesele yuma yeswe kushi lia yiliato yenyi. Alioze muze mamba ngwenyi, Hanazeyesa yuma yeswe, chinasoloka pundu kavulukile yoze wazeyesele yuma yeswe kuli iye.

²⁸ Muze te hazeyesa yuma yeswe kuli iye, hohene mwe Mwana nawa iye mwene kumakalizeyesa kuli yoze wazeyesele yuma yeswe kuli iye, hanga Zambi akapwe yeswe muli eswe.

²⁹ Nyi chocho, kuchi malinga waze hanaapapachisa hali afu? Nyi keshi kuhindwisa afu nichimwe, kuchi te kevwe hanaapapachisa hali ayo?

³⁰ Kuchi te yetu nawa twakulisela ku Utoji ola jeswe?

³¹ Ewa, ngunashindakenya ku kulisamba chize hali yenu, mandumbu, chize nguli nacho muli Kristu Yesu Mwene wetu, nakufwa tangwa ha tangwa.

³² Nyi kachi nikulita ni atu nalitachikile ni ngongo ku Efwesu, chika ngunafumbuka? Kachi keshi kuhindwisa afu, ngwami, Tulienu, tunwenu, mumu hamene mutufwa.

³³ Kanda nulionga, Usepa upi kuwakupihisa ndako jipema.

³⁴ Lawilenu ku ululi, kanda nuvulumuna; mumu amwe keshi chinyingi cha Zambi: ngunahanjika chino hanga ngunukolese sonyi.

³⁵ Alioze umwe mamba ngwenyi, Ngwe kuchi mahindwisa afu, ni mujimba uka meza?

³⁶ Yena Chizuzuke, chize yena mwene makuwa, keshi kuchipwisa ni mwono shina muchifwa;

³⁷ ni chize mukuwa, kushi kukuwa mujimba uze muukapwa, alioze lunona wika, hanji mapwa wa tiliku, hanji wa mbuto yimwe yikwo;

³⁸ alioze Zambi mayaha mujimba chizechene ngwe apalile, ku mbuto yeswe mujimba wayo yene.

³⁹ Musunya weswe hi musunya umuwika ko: alioze kuuli musunya umwe wa atu, ni ukwo musunya wa tushitu, ni ukwo musunya wa tujila, ni ukwo wa yishi.

⁴⁰ Kuyili nawa mijimba ya mwilu, ni mijimba ya hashi; alioze uhenya wa uze wa mwilu umwe, ni uhenya wa uze wa hashi weka.

⁴¹ Kuuli uhenya umwe wa tangwa, ni uhenya ukwo wa kakweji, ni uhenya ukwo wa matongonoshi; mumu lutongonoshi umwe malipalikila ni mukwo ni uhenya.

⁴² Chocho nawa Uhindukilo wa afu. Maukuwa mu kupola; mauhindwisa mu ungunu:

⁴³ maukuwa mu sonyi; mauhindwisa mu uhenya; maukuwa mu ulelu; mauhindwisa mu tachi.

⁴⁴ Maukuwa mujimba wa chisemewa; mauhindwisa mujimba wa uspiritu. Kachi kuuli mujimba wa chisemewa, kuuli nawa mujimba wa uspiritu.

⁴⁵ Chocho nawa chinasonewa ngwo, Mutu mutangu Alama wapwile mukwa mwono. Alama wa kusula kapwa Spiritu wa kuhana mwono.

⁴⁶ Alioze cha uspiritu, kuchapwile chitangu. Cha chisemewa chaliangile; mba kulutwe kwejile cha uspiritu.

⁴⁷ Mutu mutangu wa hashi, iye mukwa mavu: mutu wamuchiali iye wa mwilu.

⁴⁸ Chizechene ngwe mukwa mavu, chocho nawa akwa mavu: chizechene ngwe mukwa mwilu, chocho nawa akwa mwilu.

⁴⁹ Chizechene ngwe twapwile mu kulifwa cha mukwa mavu, chocho nawa mutukapwa mu kulifwa cha mukwa mwilu.

⁵⁰ Achi, chino ngunambe, mandumbu, ngwami, Musunya ni manyinga kuyishi kuhasa kuhinga wanangana wa Zambi; chipwe kupola kuchichi kuhinga ungunu.

⁵¹ Talenu, ngunanwambulwila chijimbikilo; yetu eswe kutuchi kaya tulo, alioze makatwalumuna eswe.

⁵² Susumuku, ha kukamuna cha liso, ha chitavwi cha kusula: mumu chitavwi muchikahanjika, mba makahindwisa e afu ni kupola chakuhi, ni yetu makatwalumuna.

⁵³ Mumu chatamba yono mukwa kupola kuzala chize kuchishi kupola, chatamba yono mukwa kufwa kuzala chize kuchishi kufwa.

⁵⁴ Alioze muze yono mukwa kupola hazala chize kuchishi kupola, ni yono mukwa kufwa hazala chize kuchishi kufwa, hohene liji mulikamanunuka, lize linasonewa ngwo, Kukumba hichajimuna kufwa.

⁵⁵ Yena kufwa, Ulihi lumunyi we? Yena kufwa, Chilihi kukumba che?

⁵⁶ Lumunyi wa kufwa, shili; ni tachi ja shili, shimbi:

⁵⁷ alioze tusakwilenu kuli Zambi, yoze wakutwaha kukumba ku tachi ja Mwene wetu Yesu Kristu.

⁵⁸ Kashika, mandumbu jami a zango, jikizenu, kanda nukokoloka, nukahiane matangwa eswe mu milimo ya Mwene, mumu te nunanyingika, kukilikita chenu hi chamokomoko ko muli Mwene.