1 Korintu 14 - MUKANDA USANDU WA ZAMBI 1975

¹ Kaulenu zango; hindu fupenu chikolo ha yawana ya uspiritu, alioze Shinaho nukaprofeteze.

² Mumu yoze mahanjika mu limi, keshi kuhanjika kuli atu alioze kuli Zambi; mumu niumwe mevwa; alioze muli Spiritu mahanjika yijimbikilo.

³ Alioze yoze maprofeteza, mahanjika kuli atu maliji a kukolesa, a kushinjila, a kusangulwisa.

⁴ Yoze mahanjika mu limi malikolesa mwene; alioze yoze maprofeteza makolesa chikungulwila.

⁵ Achi, ngunazange yenu eswe nukahanjike mu malimi, alioze Shinaho nukaprofeteze: yoze maprofeteza iye munene wahiana yoze mahanjika mu malimi shina malumbununa, hanga chikungulwila akatambule maliji a kukolesa.

⁶ Alioze haliapwila, mandumbu, kachi mungwiza kuli yenu nikuhanjika mu malimi, kuchi munufumbuka? Shina munguhanjika kuli yenu chipwe ni usolwelo, hanji ni yinyingi, hanji ni uprofeto, hanji ni longeso?

⁷ Chipwe yuma yize kuyishi mwono, nyi yinahanjika, chipwe lundembo, hanji kalialia, nyi kuyishi kuhana kulipwila cha maliji, ngwe kuchi manyingika chize memba ha lundembo hanji ha kalialia?

⁸ Mumu kachi chitavwi muchihana liji lize kulialumbunukine, iya malulika ha jita?

⁹ Chocho ni yenu nawa, ngwe kuchi manyingika chize munuhanjika shina munuhanjika ni maliji ashi kulumbunuka? Mumu munuhanjika mu tetela.

¹⁰ Kwali hanji maliji eka ni eka, mba eswe ni ulumbunwiso wo.

¹¹ Kachi Chanyingikine ulumbunwiso wa liji mungupwa kuli yoze mahanjika ngwe kandaka, ni yoze mahanjika mapwa ngwe kandaka kuli yami.

¹² Chocho ni yenu nawa, se nwakufupa chikolo ha yawana ya uspiritu, fupenu hanga nukahiane kukolesa chikungulwila.

¹³ Kashika yoze mahanjika mu limi, alembe hanga akahase kulilumbununa.

¹⁴ Mumu kachi mungulemba mu limi, Spiritu yami muyilemba, alioze kunyonga chami muchiseka.

¹⁵ Mba kuchi? Mungulemba ni Spiritu, mungulemba ni kunyonga nawa: mungwimba uhaliso ni Spiritu, mungwimba uhaliso ni kunyonga nawa.

¹⁶ Nyi ka, kachi mufumanyisa ni Spiritu, ngwe kuchi yoze kanyingikine mamba ngwenyi, Amene, ha kusakwila che? Se kanyingikineko chize unambe.

¹⁷ Mumu musakwila kanawa chamwenemwene, alioze mukwo kwamukoleseleko.

¹⁸ Ngunasakwila kuli Zambi, nakuhanjika mu malimi kuhiana yenu eswe:

¹⁹ chipwe chocho, mu chikungulwila ngunazange Shinaho kuhanjika maliji atano ni mana jami, hanga ngufumbe akwo nawa, hi kuhanjika ko kumi lia tununu twa maliji mu limi lia kandaka.

²⁰ Mandumbu, kanda nupwa ana mu kunyonga chenu: hindu mu uhuka pwenu ana-akemba, alioze mu kunyonga pwenu makulwana.

²¹ Mu shimbi chinasonewa ngwo, Mungukahanjika kuli atu ano ni akwa malimi eka ni mivumbo ya atu eka; chipwe chocho kechi kapanjika kuli yami, chocho anambe Mwene.

²² Kashika malimi kanapu chilayi, hi kuli akwa kufuliela ko, alioze kuli waze keshi kufuliela; alioze uprofeto kuushi kutwala kuli waze keshi kufuliela alioze kuli waze akufuliela.

²³ Kashika nyi chikungulwila cheswe muchikunguluka muma mumuwika ni eswe mahanjika mu malimi, nyi manjila atu aze kanyingikine, waze keshi kufuliela, kechi kwamba ngwo, Nunazaluka, nyi?

²⁴ Alioze kachi eswe maprofeteza, nyi manjila yoze keshi kufuliela, hanji yoze kanyingikine, mamukumisa kuli eswe, mamupatwila kuli eswe.

²⁵ Yuma ya kuhengama ya mu mbunge yenyi muyisoloka: chocho makafulamana ha meso jenyi, makawayila Zambi, mambulula ngwenyi, Zambi hwali hakachi kenu pundu.

²⁶ Mba kuchi, mandumbu? Muze munukunguluka, mweswe wa kuli yenu mwaso ali nawo, longeso ali nalio, usolwelo ali nawo, limi ali nalio, ulumbunwiso ali nawo. Alinge yuma yeswe mukukolesa.

²⁷ Kachi umwe mahanjika mu limi, akapwe aali, hanji atatu, ahanjike umwe ni umwe; mba umwe alumbunune.

²⁸ Alioze kachi mukwa kulumbununa wakuhi, ahole mu chikungulwila; ahanjike kuli iye mwene ni kuli Zambi.

²⁹ Aprofeta ahanjike aali, hanji atatu; akwo apatwile.

³⁰ Nyi kachi masolola usolwelo kuli umwe unatwamako, mutangu ahole.

³¹ Mumu yenu eswe nunahase kuprofeteza umwe ni umwe, hanga eswe alilongese, hanga eswe aashinjile.

³² Maspiritu ja aprofeta kakuzeyela kuli aprofeta.

³³ Mumu Zambi hi Zambi ya Chizungozungo ko, alioze ya sambukila. Chizechene ngwe mu yikungulwila yeswe ya asandu.

³⁴ Mapwo ahole mu yikungulwila, mumu kaatayijileko kuhanjika, alioze azeyele chizechene ngwe yinambe shimbi nawa.

³⁵ Kachi mazanga kulilongesa chuma chimwe, kachi akahule akwo-malunga ku mazuwo jo: mumu sonyi hali pwo kuhanjika mu chikungulwila.

³⁶ Kuma, liji lia Zambi liakatukile kuli yenu, nyi? Shina liahetele kuli yenu wika?

³⁷ Kachi umwe malishinginyeka kupwa profeta, hanji mukwa uspiritu, akatayize yuma yize ngunasoneka kuli yenu, je shimbi ja Mwene.

³⁸ Alioze kachi umwe malajala, akalajale.

³⁹ Kashika, mandumbu jami, fupenu chikolo nukaprofeteze, kanda nukakanjisa kuhanjika mu malimi.

⁴⁰ Alioze akalinge yuma yeswe nikulita ni kululika.