1 Korintu 12 - MUKANDA USANDU WA ZAMBI 1975

¹ Achi, ha kutwala ku yawana ya uspiritu, mandumbu, chazangile yenu kwalajala.

² Nunanyingika muze nwapwile akwa mavungu, anutwalile ku mahamba tumama mu jila yeswayo anutwalile.

³ Kashika ngunanunyingikisa ngwami, Niumwe anahanjika muli Spiritu ya Zambi mamba ngwenyi, Yesu kashingiwa; mba niumwe mahasa kwamba ngwenyi, Mwene Yesu, shina muli Spiritu Musandu.

⁴ Achi, kuchili kulipalikila cha yawana ya vumbi, alioze Spiritu umuwika.

⁵ Kuchili kulipalikila cha uvumbiko, alioze Mwene umuwika.

⁶ Kuchili kulipalikila cha kulinga, alioze Zambi umuwika, yoze wakulingisa yuma yeswe muli eswe.

⁷ Alioze mahana usolwelo wa Spiritu kuli eswe mukufumbuka.

⁸ Mumu muli Spiritu mahana kuli umwe, liji lia mana; kuli mukwo, liji lia chinyingi; nikulita ni Spiritu umuwika;

⁹ kuli mukwo, Ufulielo, muli Spiritu umuwika; kuli mukwo, yawana ya vumbi ya kuhindwisa, muli Spiritu umuwika:

¹⁰ kuli mukwo, kulinga cha yipupu; kuli mukwo, uprofeto: kuli mukwo, kusa chinyingi hakachi ka maspiritu; kuli mukwo, malimi eka ni eka; kuli mukwo, ulumbunwiso wa malimi:

¹¹ alioze Spiritu umuwika kakulingisa yino yuma yeswe, nikwanyina kuli mutu ni mutu, chizechene ngwe mapala.

¹² Mumu chizechene ngwe mujimba unapu umuwika, ni yihanda yinji ukwete, ni yihanda yeswe ya mujimba nikupwa yinji yinapu mujimba umuwika; chocho nawa Kristu.

¹³ Mumu muli Spiritu umuwika hanatupapachisa yetu eswe mu mujimba umuwika, chipwe A-Yunda, chipwe A-Ngresia, chipwe ndungo, chipwe enya chifuchi, hanatunwisa muli Spiritu umuwika.

¹⁴ Mumu mujimba hi chihanda chimuwika ko, alioze yinji.

¹⁵ Kachi kulu muliamba ngwenyi, Mumu yami hi nguli kwoko ko, hi nguli chihanda cha ku mujimba ko; kashika hi lia ku mujimba ko, nyi?

¹⁶ Nyi kachi twitwi muliamba ngwenyi, Mumu yami hi nguli liso ko, hi nguli lia ku mujimba ko; kashika hi lia ku mujimba ko, nyi?

¹⁷ Kachi mujimba weswe lukombo wapwa liso, kwivwa Chilihicho? Kachi weswe lukombo wapwa kwivwa, kuhumbika Chilihicho?

¹⁸ Alioze haliapwila Zambi hanase yihanda, chimwe ni chimwe, mu mujimba, chizechene ngwe wapalile.

¹⁹ Nyi kachi yeswe yapwa chihanda chimuwika, mujimba ulihiwo?

²⁰ Haliapwila kuyili yihanda yinji hindu mujimba umuwika.

²¹ Liso kuliahashile kwamba ku kwoko ngwenyi, Chakufupile, hanji cheka nawa mutwe kuwahashile kwamba ku molu ngwenyi, Chanufupile.

²² Ka, alioze Shinaho chikolo, yihanda yize ya ku mujimba yakusoloka ngwe yilelu yahiana, kachi yakuhi, kachi kuhona pundu:

²³ ni yize ya ku mujimba twakushinginyeka kupwa ni ulemu ukepe, yino twakuyilemesa kuhiana; ni yihanda yetu yize kuyishi upeme, upeme Wahiana yikwete;

²⁴ se yihanda yetu yipema kuyishi kuhona: alioze Zambi watesele mujimba hamuwika, nikuhana ulemu Wahiana ku chihanda chize chahonene;

²⁵ hanga kukuchi kapwa kulihandununa mu mujimba; alioze hanga yihanda yikapwe nikufunga chimuwika chimwe ha chikwo ni chikwo.

²⁶ Chipwe chihanda chimwe muchivwa lamba, yihanda yeswe muyivwa lamba hamuwika nacho; hanji kachi malemesa chihanda chimwe, yihanda yeswe muyiwahilila hamuwika nacho.

²⁷ Achi, yenu nunapu mujimba wa Kristu, mutu ni mutu chihanda ni chihanda chawo.

²⁸ Zambi hanase amwe mu chikungulwila, chitangu apostolo, chamuchiali aprofeta, chamuchitatu alongeshi, kulutwe lia wano tachi ja yipupu, mba kulutwe yawana ya vumbi ya kuhindwisa, kukwasa, kutondekeza, malimi eka ni eka.

²⁹ Eswe kanapu apostolo, nyi? Eswe kanapu aprofeta, nyi? Eswe kanapu alongeshi, nyi? Eswe kali ni tachi ja yipupu, nyi?

³⁰ Eswe kali ni yawana ya vumbi ya kuhindwisa, nyi? Eswe kanahanjika mu malimi, nyi? Eswe kanalumbununa, nyi?

³¹ Alioze fupenu chikolo ha yawana ya vumbi yahiana, hindu mungunulweza jila yahiana chikolo.