1 Korintu 11 - MUKANDA USANDU WA ZAMBI 1975

¹ Pwenu akwa kungwimbulula, chizechene ngwe ni yami nawa nguli mukwa kwimbulula Kristu.

² Achi, ngunanuhalisa, mandumbu, nwakungwiwuluka ha yuma yeswe; nwakukakaminya ku je ndongo, chizechene ngwe nanukunjikilejo.

³ Alioze ngunazange yenu nunyingike we mutwe wa lunga ni lunga, Kristu; ni we mutwe wa pwo, lunga; ni mutwe wa Kristu, Zambi.

⁴ Lunga ni lunga malemba, hanji maprofeteza, kali ni chuma chimwe ha mutwe wenyi malelesa mutwe wenyi.

⁵ Alioze pwo ni pwo malemba, hanji maprofeteza ni mutwe wenyi kaufukile, malelesa mutwe wenyi: mumu chinapu chuma chimuwika ngwe iye wapwa wa kutewula.

⁶ Alioze kachi pwo keshi kufuka mutwe, kachi akamukambejo, mumu kachi sonyi hali pwo kumukambajo chipwe kumutewula, kachi akafuke mutwe.

⁷ Mumu lunga chamwenemwene kuchamutambile kufuka mutwe, se iye Chizulie ni uhenya wa Zambi; alioze pwo kanapu uhenya wa lunga.

⁸ Mumu lunga hi wa kuli pwo ko, alioze pwo wa kuli lunga:

⁹ mumu chipwe lunga kamutangile hali pwo; alioze atangile pwo hali lunga.

¹⁰ Ha chikuma chino chatamba pwo kupwa ni chinyingi cha kuzeyela ha mutwe wenyi, mumu hali angelo.

¹¹ Hindu chipwe chocho, muli Mwene chipwe pwo keshi kupwa ukawenyi lunga keshiko, chipwe lunga keshi kupwa ukawenyi pwo keshiko.

¹² Mumu chizechene ngwe pwo wa kuli lunga, chocho nawa lunga wa kuli pwo; alioze yeswe ya kuli Zambi.

¹³ Chipatulenu hakachi kenu ngwami, Chinate hali pwo kulemba kuli Zambi ni mutwe kaufukile, nyi?

¹⁴ Chipwe chisemewa chene kuchanulongesele nyi, kachi lunga mapwa ni kambu jisuku jinapu kaleleso kuli iye?

¹⁵ Alioze kachi pwo mapwa ni kambu jisuku jinapu uhenya kuli iye: mumu kambu jenyi hanamwehejo ha kulifuka.

¹⁶ Alioze kachi umwe masoloka ngwe mukwa pami, yetu kutushi ndako niyimwe ngwe yino, chipwe yikungulwila ya Zambi.

¹⁷ Achi, ha kunwaha shimbi yino, chanuhalishile. Kukunguluka chenu hi chipema ko, chipi.

¹⁸ Mumu chitangu, muze munukunguluka, ngunevu ngwo, Kulihandununa kuchili hakachi kenu; mba ngunachifuliela hakehe.

¹⁹ Mumu chatamba kupwa kulihandununa nawa hakachi kenu, hanga waze maasela Shindakenyo yipema akasoloke hakachi kenu.

²⁰ Muze kashika munukunguluka muma mumuwika, hi mukulia ko seya ya Mwene:

²¹ mumu ha kulia chenu, mutu ni mutu matambula kulia chenyi mwene Shimbu-kanda; mba umwe mevwa zala, ni mukwo mazengewa.

²² Kuma, kunushi mazuwo a kulitamo, a kunwinamo, nyi? Shina nunalelesa chikungulwila cha Zambi, nikukolesa sonyi waze keshi nacho? Kuchi mungwamba kuli yenu? Mungunuhalisa, nyi? Ka, ha chino chanuhalishile.

²³ Mumu natambwile kuli Mwene, chize yami nawa nanukunjikilecho, ngwe Mwene Yesu ha ufuku uze amukunjikile, wanjile mbolo;

²⁴ ni muze te hasakwila, wayipalwile, wambile ngwenyi, Yino, mujimba wami hali yenu: chino lingenu nikungwiwuluka.

²⁵ Chizechene nawa musenge kulutwe lia kulia, ngwenyi, Musenge uno we usendo waha mu manyinga jami: chino lingenu yisuho yeswe munuunwa nikungwiwuluka.

²⁶ Mumu yisuho yeswe munulia mbolo yino, mununwa musenge uno, munwambujola kufwa cha Mwene ndo meza.

²⁷ Kashika mweswe malia mbolo, hanji manwa musenge wa Mwene ngwe kuchatele, kumahila mujimba ni manyinga ja Mwene.

²⁸ Alioze mutu akalieseke, chocho akalie mbolo, akanwe musenge.

²⁹ Mumu yoze malia hanji manwa, malia hanji manwa uhiso hali iye mwene se kamwene mujimba wa Mwene.

³⁰ Ha chikuma chino anji a kuli yenu nunalele, nunasalwoka, ni hi akehe ko mu tulo ali.

³¹ Alioze kachi mutulipatwila yetwene, kachi keshi kutupatwila.

³² Alioze muze matupatwila matulamba ha kufumba kuli Mwene, hanga kechi katuhisa hamwe ni akwa hashi.

³³ Kashika, mandumbu jami, muze munukungama mukulia, litatenu umwe ni mukwo ni mukwo.

³⁴ Kachi umwe mevwa zala, kachi akalie ku zuwo lienyi: hanga kunuchi kukunguluka ha uhiso. Ni yuma yikwo mungululika muze mungwiza.