1 Korintu 10 - MUKANDA USANDU WA ZAMBI 1975

¹ Mumu ngunazange yenu, mandumbu, nunyingike ngwe tulamba twetu eswe apwile kushi lia lelwa, eswe apalikile ndusu mu kalunga-lwiji;

² eswe aapapachishile kuli Mose mu lelwa ni mu kalunga-lwiji.

³ Eswe alile kulia chimuwika cha uspiritu;

⁴ eswe anwine kunwa chimuwika cha uspiritu: mumu anwine ku liwe lia uspiritu lize liaakawile, ni liwe lize liapwile Kristu.

⁵ Alioze anji ahiana a kuli ayo Zambi kawahile no: mumu aanungwine mu puya.

⁶ Achi, yino yuma yapwile yilweza kuli yetu, hanga kutuchi kevwa usolo wa yuma yipi, ngwe ayo nawa evwile usolo.

⁷ Chipwe kanda nukapwa akwa kukombelela mahamba ngwe amwe a kuli ayo apwile, nikulita ngwe chinasonewa ngwo, Atu atwamine mukulia, nikunwa; akatukile mukuheha.

⁸ Chipwe kanda tulinga utanji ngwe ayo alingile, mba alimbukile ha tangwa limuwika makumi aali a tununu ni tununu atatu.

⁹ Chipwe kanda tukeseka Kristu ngwe amwe a kuli ayo esekele, mba aonwene kuli tupela.

¹⁰ Chipwe kanda nulinyenyeta ngwe amwe a kuli ayo alinyenyetene, mba aonwene kuli chenyeke.

¹¹ Achi, yino yuma yaawanyine ngwe yilweza; yasonewene mukutukanyamisa, yetu, masongo ja miaka hanatuhete.

¹² Kashika yoze malishinginyeka ngwe kanamana, akakanyame kuchina malimbuka.

¹³ Nichimwe cheseko kuchanukwachile shina chize cha kulita ni chisemewa cha atu; alioze Zambi wamwenemwene, iye kechi katayiza akanweseke kuhiana chize munuhasa; alioze hamwe ni cheseko makanumwesa jila ya kutuhukamo hanga nukahase kunyongonona.

¹⁴ Kashika, akwetu a zango, Chinenu ku kukombelela mahamba.

¹⁵ Ngunahanjika ngwe kuli akwa kukanyama; patulenu chize ngunambe.

¹⁶ Musenge wa uwape uze twakuwahisa, hi kuhangana cha manyinga ja Kristu ko, nyi? Mbolo yize twakupalula, hi kuhangana cha mujimba wa Kristu ko, nyi?

¹⁷ Se kuyili mbolo yimuwika, yetu se tuli anji tuli mujimba umuwika: mumu yetu eswe twakuliangana ha mbolo yimuwika.

¹⁸ Talenu A-Izalele nikulita ni musunya: waze akulia yitapo keshi kuhangana ha chilumbilo, nyi?

¹⁹ Kuchi kevwe ngunambe ngwami, Chize hanachitambula chitapo ku hamba chinapu chuma chimwe, hanji hamba kanapu chuma chimwe, nyi? Ka.

²⁰ Ahoze ngunambe ngwami, Yuma yize akwa mavungu akutambula yitapo, kakuyitambuta yitapo kuli andemoniu, hi kuli Zambi ko; mba chazangile yenu nuliendele ni andemoniu.

²¹ Kunwahashile kunwa musenge wa Mwene, ni musenge wa andemoniu. Kunwahashile kutambula chihanda cha ku mesa ya Mwene ni cha ku mesa ya andemoniu.

²² Shina mutwihia Mwene ku ukwa, nyi? Tunakangana kuhiana iye, nyi?

²³ Kuli yami yuma yeswe yinalite ni shimbi; alioze yuma yeswe kuyishi kufumbula; yuma yeswe yinalite ni shimbi hali yami; alioze yuma yeswe kuyishi kukolesa.

²⁴ Niumwe kanda afupa kufumbuka chenyi mwene, ahoze eswe akafupe kufumbuka cha mukwo.

²⁵ Cheswacho analanjisa mu yitanda, lienu, kanda nuhula nichimwe mumu ha shimbi ya mbunge;

²⁶ mumu hashi ha mbala ha Mwene ni kulumbama chaho.

²⁷ Kachi umwe wa kuli waze keshi kufuliela manulakenya ku chiteleka, nyi munuzanga kuya; cheswacho masa kumeso jenu, lienu, kanda nuhula nichimwe mumu ha shimbi ya mbunge.

²⁸ Ahoze kachi umwe mamba kuli yenu ngwenyi, Chino hanachilambula chitapo ku hamba, kanda nukalia mumu hali yoze hachisolola, mumu ha shimbi ya mbunge:

²⁹ shimbi ya mbunge, hi ya yena mwene ko, ahoze yize ya mbala; mumu kuchi te anapatula kutusuka chami ku shimbi ya mbunge ya mbala?

³⁰ Kachi mungutambula ni kusakwila, kuchi te anahanjika yipi hali yami ha chize nakuchisakwilila?

³¹ Chipwe kashika munulia, hanji mununwa, hanji cheswacho munulinga, lingenu yuma yeswe ha uhenya wa Zambi.

³² Kanda nukapwa chitalingiso chipwe kuli A-Yunda, chipwe kuli A-Ngresia, chipwe ku chikungulwila cha Zambi, ka:

³³ chizechene ngwe ni yami nawa nakupemena kuli atu eswe ha yuma yeswe, kuchapwile ngwe ngunafupu kufumbuka cha yami mwene, alioze kufumbuka cha anji, hanga akaalamwine.