1 Korintu 1 - MUKANDA USANDU WA ZAMBI 1975

¹ Yetu, Paulu amutambikile postolo wa Yesu Kristu ku upale wa Zambi, ni ndumbu Sosetene,

² Ku chikungulwila cha Zambi chize chili mu Korindu, kuli waze hanaasela ku usandu muli Kristu Yesu, aatambikile asandu, hamwe ni waze eswe kweswe akutambika ha jina lia Mwene wetu Yesu Kristu, niwo kanda niwetu:

³ Vumbi kuli yenu ni sambukila ya kuli Zambi Tata ni kuli Mwene Yesu Kristu.

⁴ Nakusakwila kuli Zambi yami matangwa eswe, ha kutwala kuli yenu, ha vumbi lia Zambi lize anuhele muli Kristu Yesu;

⁵ muli iye anupichishile yuma yeswe, ni maliji eswe, ni yinyingi yeswe;

⁶ chizechene ngwe Shindakenyo ya Kristu ayikolesele muli yenu:

⁷ chocho kunwahonene nichimwe chawana cha vumbi; nikulawoka usolwelo wa Mwene wetu Yesu Kristu.

⁸ Yoze nawa kumakanukolesa ndo ku songo, hanga nukasambe ha tangwa lia Mwene wetu Yesu Kristu.

⁹ Zambi keshi kwalumuka, kuli iye hananutambika ku kuliendela cha Mwanenyi Yesu Kristu Mwene wetu.

¹⁰ Achi, ngunaliumbu kuli yenu, mandumbu, ku jina lia Mwene wetu Yesu Kristu, nukahanjike chuma chimuwika, kanda nulihandunyona hakachi kenu; alioze nukalinunge hamuwika ni kunyonga chimuwika ni upatwilo umuwika.

¹¹ Mumu hanangulwezecho ha kutwala kuli yenu, mandumbu jami, kuli akwa zuwo lia Choe, ngwo, Kuchili kulihangujola hakachi kenu.

¹² Achi, chino ngunambe ngwami, Mweswe wa kuli yenu kanambe ngwenyi, Ami nguli wa Paulu; ni mukwo ngwenyi, Ni yami nguli wa Apolu; ni mukwo ngwenyi, Ni yami nguli wa Sefwa; ni mukwo ngwenyi, Ni yami nguli wa Kristu.

¹³ Kristu kanahandunuka, nyi? Ahachilile Paulu ha kulusu hali yenu, nyi? Hanji anupapachishile mu jina lia Paulu, nyi?

¹⁴ Ngunasakwila kuli Zambi chapapachishile niumwe wa kuli yenu, shina Krispu ni Ngayu;

¹⁵ kuchina umwe mamba ngwenyi, Hangupapachisa mu jina lia Paulu.

¹⁶ Napapachishile akwa zuwo lia Eshetefwana nawa: mba Chanyingikine kachi napapachishile umwe mukwo nawa.

¹⁷ Mumu Kristu kangutumineko mukupapachisa, alioze mukwambujola sango lipema: hi ni mana ja maliji ko, kuchina hanji kulusu ya Kristu mayipwisa yamokomoko.

¹⁸ Mumu liji lia kulusu linapu uhepuke kuli waze anatoko; alioze kuli yetu, hanatulamwina, linapu je tachi ja Zambi.

¹⁹ Mumu chinasonewa ngwo, Kumungukonwona mana ja akwa mana, kumungukalituna malinjekela ja akwa malinjekela.

²⁰ Ulihi mukwa mana? Ulihi mukwa kusonyeka? Ulihi mukwa kuhangujola wa mwakono? Zambi kahepwishileko mana ja mwakono, nyi?

²¹ Se nikulita ni mana ja Zambi, akwa hashi ni mana jo kanyingikineko Zambi, chawahilile Zambi ni uhepuke wa kwambujola kulamwina waze anafuliela.

²² Se A-Yunda kakwita yilayi, A-Ngresia kakufupa mana.

²³ Alioze yetu twakwambujola Kristu wa kuliachila ha kulusu, kuli A-Yunda chitalingiso, ni kuli akwa mavungu uhepuke;

²⁴ alioze kuli waze hanaatambika, ni A-Yunda ni A-Ngresia, Kristu je tachi ja Zambi ni e mana ja Zambi.

²⁵ Mumu uhepuke wa Zambi kuunahiana mana ja atu; ni ulelu wa Zambi kuunakangana atu.

²⁶ Mumu nyongenu mandumbu, chize anutambikile, hi akwa mana anji ko nikulita ni we musunya, hi akwa tachi anji ko, hi yilolo anji ko, hanaatambika.

²⁷ Alioze Zambi hanatongola yuma ya uhepuke ya hano hashi, hanga akakolese sonyi akwa mana, Zambi hanatongola yuma yilelu ya hano hashi, hanga akakolese sonyi yuma ya tachi;

²⁸ ni yuma yilelu ya hano hashi, ni yuma yamokomoko, Zambi hanatongola, ewa, ni yuma yize yakuhi, hanga akahwise yuma yize kuyili:

²⁹ hanga musunya niumwe kuuchi kalisamba kumeso ja Zambi.

³⁰ Alioze yenu nuli muli Kristu Yesu nikulita ni kulinga cha Zambi, yoze amupwishile kuli yetu, mana a kuli Zambi, ni ululi, ni usandu, ni ukule:

³¹ hanga, nikulita ngwe chinasonewa ngwo, Yoze malisamba, akalisambe muli Mwene.