Titus 3 - Yak'usda Ooghuni

Ye unzoo-i be ndi yun kꞌut uzdilhtsꞌi-un

¹ ꞋEt nyoonne Crete whutꞌenne bula ꞌineh njan huwu ni hotan ha. Ndunne keyoh huwunline ꞌinkꞌez bumoodih unline, ꞌenne bukꞌuneꞌ hootꞌen. ꞋAhoolhyiz ꞌutꞌen unzoo-i, ꞌuhutilhꞌelh wheni lhahúdootꞌeꞌ.

² ꞋUyoonne hoontsiꞌ kꞌunꞌa bughu yahoolhduk junih, ꞌinkꞌez ꞌaw lhdulhyoh ꞌuhudootniꞌ junih. Kꞌus tsꞌiyanne nalhtsulyaz néꞌboohoolhꞌen ꞌinkꞌez ꞌuyoonne tsꞌun yo ꞌúhududoldzin.

³ Wheni cha whuz unꞌa za tsꞌuwhusni ínleꞌ. Khuni kꞌunulheꞌtsꞌustꞌen. Naznutꞌah. Lhelhdun tsꞌuhóontꞌiꞌ whe hoontsiꞌ te neꞌtsꞌustꞌen. Tsꞌintsiꞌ whe ndi yun kꞌut ꞌuzdáltsꞌiꞌ, ꞌinkꞌez ꞌoonih bulh chaꞌ ꞌutsꞌantꞌeꞌ. ꞋUyoonne tsꞌuzdutni ꞌinkꞌez tsꞌiyawh lhtsꞌuzdutni.

⁴ ꞋEt hoontsꞌi ꞌoh daꞌ ꞌuja neYakꞌusda neulhyis-un, ꞌen netsꞌun yé nekꞌensiꞌ-i ꞌinkꞌez yé netsꞌun unzoo-i ꞌi bulh, ꞌi tsꞌiyanne nalh be hóodiltsai, ꞌet whe uzdijiz,

⁵ tsꞌihꞌun unꞌa ꞌutsꞌitꞌen-un ínleꞌ, ꞌaw ꞌet huwa íloh uzdijiz. ꞋEt hoontsꞌi ye teꞌ ninzun-i gha, ꞌi be neúlhyih. ꞋEt ꞌantsꞌi tunátsꞌusguz ꞌet whe doo cha za tsꞌuwhuzdli, ꞌinkꞌez Ndoni be ꞌandit-un natsꞌusdliꞌ,

⁶ ꞌinkꞌez Yakꞌusda netsꞌun oola hoonli whe Ndoni netsꞌitilhꞌaꞌ. Jesus Christ neulhyis-un, ꞌen be ꞌuja,

⁷ ꞌet whe ye unzoo-i gha nelubeshi tsꞌiyawh neba hooloh yulhtsi. ꞋIlhiz be tsꞌukhuna-i hukwa tse hoodli-un, ꞌet nechꞌeꞌ whutaleh ꞌet huwa.

⁸ Ndi khuni ꞌalhaꞌ ꞌuntꞌoh-i ꞌuntꞌoh. ꞋInkꞌez ꞌahoolhyiz ꞌet za ndudóniꞌ ntsꞌu hukwaꞌ nuszun. Mbene Yakꞌusda ooba ꞌalhaꞌ yintꞌohne, huwu hinli whe ꞌutꞌen unzoo-i za ꞌahoolhyiz higha oonaꞌ. Ndi khuni tsꞌiyanne ba unzoo ꞌinkꞌez dune whe sooꞌ hutitꞌelh.

Lhdulhyoh ꞌudoohniꞌ junih

⁹ ꞋEt hoontsꞌi Moses ooghuni ꞌukꞌu neyuzguz-i ghun, whusni khuni cha, ꞌinkꞌez lhenyoone whutsodaꞌne huye yailhduk-i, ꞌi cha, ꞌinkꞌez lhdulhyoh ꞌuhudutni, ꞌet tsꞌiyawh oochꞌoh ꞌontꞌeꞌ. ꞋAw tsꞌiyanne ba lheꞌhoozooꞌ ꞌinkꞌez ꞌantsꞌi hoonli wheꞌ hoontꞌoh.

¹⁰ Mbe dune lhchꞌaz nilhtꞌi-un, ꞌet whulh nat-un dah dániꞌ de, ꞌinkꞌez ꞌaw lhunyudústsꞌo de, teneóolhꞌaꞌ.

¹¹ Tꞌeoonínzun nduntꞌoh-un dune ꞌen dudeni be tankꞌus úninzun ꞌinkꞌez lubeshi ꞌulhꞌen-un ꞌet za hoontꞌiꞌ. ꞋEt huwa ꞌi be dichꞌoh nintaꞌdudulti whe ꞌuntꞌoh.

ꞋUdekꞌez khuni yé bubulh yánalduk

¹² ꞋEt Artemas kꞌus Tychicus ꞌilhoghun ntsꞌu tísꞌalh de, ꞌet ꞌaho diz tonyaꞌ, njan keyoh Nicopolis tsꞌuwhútni-un. ꞋEt khit wheni njan tisdalh-un lhaóodusdla ꞌet huwa.

¹³ ꞋEt Zenas dune ba yalhduk-un ꞌinkꞌez Apollos, ꞌenne khun nkꞌuhunꞌas de, di la hikaꞌ ninzun-i, ꞌi butlꞌa yónlelh, ꞌa cho hutooꞌas. ꞋInkꞌez khun hoonli ꞌe hundunótsꞌit junih.

¹⁴ ꞋInkꞌez netsꞌu ditnine, tꞌehonoozeh ꞌutꞌen unzoo-i za ꞌuhoolhꞌen. ꞋUyoonne hiye ndunidzit-i huye búlaꞌ hootꞌen. ꞋEt sih ndi yun kꞌut ꞌantsꞌi ꞌet lhodólhtsꞌi.

Ye unzoo-i nohbulh óotꞌeꞌ

¹⁵ Mbene la szih dilhtsꞌine, ꞌenne hadih nyuhútni. Mbene la ooba ꞌalha ꞌuhoontꞌohne nekꞌensiꞌne, ꞌenne cha tsꞌiyawh neba hadih budíni. ꞋEt Yakꞌusda ye unzoo-i nohni tsꞌiyawh nohbulh ootꞌeꞌ. ꞋEt ndo honeh.