Titus 1 - Yak'usda Ooghuni

Paul, Titus hadih yulhni

¹ Si Paul Yakꞌusda be ꞌulhna-un ꞌinkꞌez Jesus Christ ba whelꞌaꞌ-un usdli. Nyoonne Yakꞌusda buba ꞌalhaꞌ yintꞌohne, ꞌet wheni ꞌutahabanla. ꞋInkꞌez khuni ꞌalhaꞌ ꞌuntꞌoh-i tꞌehonozin ha Yakꞌusda ba ndi yun kꞌut uzdoltsꞌiꞌ ha.

² ꞋIlhiz be tsꞌukhuna-i ooka tse hoodli-i, ꞌi Yakꞌusda ꞌaw lhuwhustsꞌit ꞌinkꞌez soo ꞌudechoo daꞌ whutsꞌun ꞌi netsꞌu yoozi.

³ ꞋEt ꞌawet ntsꞌoya whudizulh Yakꞌusda hukwaꞌ ninzun-un, ꞌet whusahooltsꞌut. ꞋInkꞌez ndi Yakꞌusda be ba yaduk-i, ꞌi yubunilhtan. ꞋEt Yakꞌusda, neulhyis-un, ndi khuni ꞌi stlꞌa ídanꞌai.

⁴ Titus ndi be neba ꞌalha ꞌuhoontꞌoh-i, ꞌi gha syeꞌ sinliꞌ. ꞋI ghun ntsꞌo kꞌeꞌusges. Yakꞌusda ꞌinkꞌez neMoodihti Jesus Christ, neulhyis-un, ꞌen gha ye unzoo-i, be negha teꞌ nudzun-i, ꞌinkꞌez be nedzi dizghel-i, ꞌi tsꞌiyawh nyulh ootꞌeꞌ.

Yakꞌusda ba ꞌutso whudilhdzulhne, whuz unꞌa ꞌuhootꞌeꞌ hubaꞌ hoontꞌoh

⁵ ꞋEt wheni Crete ꞌet nenyunusti, ndi khuni ntlꞌa disꞌai-i, ꞌi be ndet lhalhoditꞌoh-un tsꞌiyawh tsꞌihꞌun unꞌa lhaoodutanleh ꞌinkꞌez lhelhdun keyoh ꞌoh ꞌutso whudilhdzulhne ꞌutahabinle.

⁶ Dune ookꞌé hotꞌalh-un ooghu hooloh-un, ꞌilhoghun za ooꞌat unli. Buzkeh cha buba ꞌalha ꞌuhoontꞌohne hinli, ꞌaw nzulhuhoodilꞌih, ꞌinkꞌez khuni kꞌuneꞌ ꞌutꞌenne hinleꞌ, ꞌet nduntꞌoh-un dune ooleꞌ.

⁷ Dune huwunli-un unli de, ꞌen Yakꞌusda be ꞌutꞌen kꞌoh-un yutlꞌá whulhꞌai, ꞌet huwa ookꞌehóotalhtsꞌulh-un whuyit ꞌootꞌeꞌ. ꞋAw dichꞌoh dukꞌunꞌa za hukwaꞌ noozin huba lheꞌhóotꞌoh. ꞋAw khun lhonúlhchꞌe, tsꞌekoo tooꞌ cha ka dálhatni. ꞋEt dune ꞌeyaih-un cha lhiloh ooleꞌ, ꞌinkꞌez ꞌaw sooniya cha ha dálhatni.

⁸ ꞋEt kꞌus dune yoh dalih-un ooleꞌ. ꞋInkꞌez hoonzoo-un tsꞌiyawh hóontꞌiꞌ. Tsꞌihꞌun ni nizulh, ꞌinkꞌez tsꞌihꞌun dune unli-un cha. ꞋEt oodzi lubeshi ooghu hooloh whe ꞌinkꞌez dichꞌoh tsꞌihꞌun unꞌa khudli-un cha ooleꞌ.

⁹ Ndi khuni ꞌi be Yakꞌusda neba ꞌalhaꞌ ꞌuntꞌoh-i, ntsꞌenꞌa huyodilꞌeꞌ, ꞌi tsꞌiyawh yotun. ꞋEt whe la ndi tsꞌihꞌun unꞌa be whutsꞌodulꞌeh-i, ꞌi be ꞌuyoonne ꞌon nus budzi ulhtus hitilhtselh. ꞋInkꞌez cha mbene la ndi be whutsꞌodulꞌeh-i, ꞌi yuchꞌaz yalhdukne, ꞌenne ndi khuni ꞌi be nintaꞌhutꞌih-un ꞌet whubuntilhtun.

ꞋUtso whudilhdzulhne bube ꞌutꞌen

¹⁰ Tube lhane ndi khuni hikꞌúneꞌ titꞌen hukwa lheꞌhunizun ꞌinkꞌez ꞌantsꞌi lahóotꞌoh te nuyahalhduk. ꞋInkꞌez ꞌuyoonne nahunaꞌa, butoh Lizwif unline, ꞌenne ꞌukꞌenus hintsiꞌ.

¹¹ Nduntꞌohne yahalhduk-un whuchꞌa bontayulh. Ndutꞌenne ꞌenne tankꞌus unꞌa dune huhodulhꞌeh. ꞋEt ꞌi be ꞌuyoonne dune duyoh dilhtsꞌine nintaꞌbuhulhꞌih. ꞋEnne huduzoh hukwꞌunꞌa bugháꞌ tizulh ꞌet wheni ꞌuhutni.

¹² ꞋEt Crete whutꞌenne butoh, ꞌilhoghun dune nus hooꞌen-un ꞌen ꞌutni, “Crete whutꞌenne ꞌahoolhyiz howhutsꞌit, khuna-i untsiꞌ-i nduhultꞌoh, tsehudutni chaꞌ ꞌuhintꞌoh, ꞌinkꞌez bucha hooncha chaꞌ hinli.”

¹³ ꞋEt daja ubúlhni-un, ꞌalhaꞌ ꞌuhutni. ꞋEt huwa tube cho hukwaꞌ budini. ꞋEt de sih be neba ꞌalha ꞌuhoontꞌoh-i, ꞌi be ꞌon nus hilhtus ooleꞌ.

¹⁴ Lizwif be ꞌudadaꞌ ꞌaw buba ꞌalhaꞌ lheꞌyóosteꞌ. ꞋInkꞌez ndunne khuni ꞌalhaꞌ ꞌuntꞌoh-i chꞌaz nálhyane, ꞌenne bughuni uboozólhtsꞌaiꞌ junih.

¹⁵ ꞋEt mbene la buyo tsꞌe lhoditsunne, ꞌenne hoonli buba me lhiloh. ꞋEt hoontsꞌi mbene la budzi dutsun suliꞌne, ꞌinkꞌez buba ꞌalhaꞌ lheꞌhóotꞌohne, tsꞌiyai buba me yinli. ꞋInkꞌez bubeni ꞌinkꞌez buyo tsꞌe ꞌi gha tꞌetsꞌoninzun-i, ꞌi tsꞌiyai dutsun whe ꞌuntꞌoh.

¹⁶ Nduntꞌohne, “Yakꞌusda tꞌeznínzun,” hutni, ꞌet hoontsꞌi dude ꞌutꞌen be hichꞌaz ditni. ꞋEnne butsꞌu hoontsiꞌne hinli, ꞌinkꞌez dichꞌoh kꞌuneꞌ hutitꞌen-un ꞌet za hukwaꞌ huninzun. ꞋEt ꞌutꞌen unzoo-i ꞌuhutilhꞌelh-un, ꞌaw huba soo lheꞌhildzooꞌ wheꞌ hintꞌoh.