Romans 9 - Yak'usda Ooghuni

Ndai la hoonliyaz Yakꞌusda Lizwifne butsꞌú yoozi-i ꞌaw bugha lhíyikulh, Yakꞌusda hitsꞌu disni ꞌinkꞌez ooghuni ꞌaw lhuhuyóotun ꞌet huwa. ꞋInka ꞌuja Yakꞌusda ꞌudun yun kꞌut whutꞌenne duduneꞌne hooleꞌ ni

¹ Njan nohdutásnelh-un Christ oonalh ꞌúdusni. ꞋAw lhozustsꞌit wheꞌ dusni. Dája nohdutásnelh-un Ndoni oonalh syo tsꞌe oogha tꞌetsꞌoninzun-i ꞌet cha ꞌálhaꞌ hoontꞌoh.

² Sdzi únduda, ꞌinkꞌez ꞌahoolhyiz bughuni usli.

³ Lizwifne sulh húdidowh ꞌet huwa bulaꞌ tisnelh hukwaꞌ nuszun. ꞋEt whe bula ꞌeꞌ whudutánelh de, whute Yakꞌusda skꞌehooyih ꞌinkꞌez Christ chꞌa naoosjaꞌ doosniꞌ ooleꞌ daꞌ.

⁴ Israel ootsꞌu haindene Yakꞌusda ꞌutahábanla duduneꞌ hooleꞌ ha. ꞋEnne ꞌuhintꞌoh Yakꞌusda budálhtiꞌ ꞌinkꞌez butsꞌú nahizya-un, ꞌet buba nahoosdzi. ꞋEnne ꞌuhintꞌoh Moses be ꞌudustlꞌus butlꞌa ídanꞌai ꞌi be Yakꞌusda tsꞌihꞌun unꞌa hiba ꞌootꞌen ha.

⁵ Israel ooduneꞌne ꞌudaꞌ dune tso whúdilhdzulhne tsꞌu ha hánde wheꞌ hintꞌoh, ꞌinkꞌez Christ butsꞌu haínzut. ꞋEt huwa ooyustꞌe dune kꞌunꞌa ꞌuchainya inleꞌ. ꞋEn ꞌuntꞌoh tsꞌiyantsuk whuYakꞌusda unli. ꞋEt huwa ꞌilhiz wheni whe hidílhtiꞌ. ꞋEt ndo honeh.

⁶ ꞋOh daꞌ Israel khuni ye butsꞌu nahizya-i, tsꞌiyawh lhaoodutatneh wheꞌ hoontꞌoh. Mbene la Israel ootsꞌu haindene, ꞌaw tsꞌiyawh iloh Israel whuduneꞌne hinli.

⁷ ꞋInkꞌez Abraham ye kédinzutne ꞌaw tsꞌiyawh iloh Israel whuduneꞌne hinli. Yakꞌusda Abraham yudániꞌ, “Isaac ꞌen gha nyukédindene hootádzilh.”

⁸ Njan ꞌet ꞌudúsni-un, Yakꞌusda ooduneꞌne ꞌaw dune yustꞌe tsꞌu haíndene, ꞌenne íloh ꞌuhintꞌoh. Mbene la khuni ye butsꞌu nahizya-i, buba ꞌalhaꞌ yintꞌohne, ꞌenne Yakꞌusda ooduneꞌne ꞌuhintꞌoh.

⁹ Yakꞌusda Abraham yutsꞌu náhizya, “Ndet la hoozúsi-un ꞌet whusanátisdalh ꞌinkꞌez nꞌat Sarah dune ooyaz tileh,” yúlhni.

¹⁰ ꞋAw njan ꞌet za íloh, Rebecca buzkeh lhtꞌudánkeꞌne, ꞌenne bubá, netsodaꞌ-un Isaac, ꞌen ꞌúntꞌoh.

^11-12 ꞋAw lhahuwhusdle whutsodaꞌ whutsꞌun ꞌaw hoontsiꞌ kꞌus hoonzoo-un lheꞌwhuhusle daꞌ Yakꞌusda Rebecca yudániꞌ, “ꞋUdechoo-un, ꞌen dukꞌoh-un yukꞌúneꞌtitꞌen.” ꞋEt whe Yakꞌusda hukwaꞌ ninzun-un, ꞌet whuz unꞌa ꞌuhóoja.

¹³ ꞋEt Yakꞌusda be ꞌudustlꞌus kꞌut ꞌukꞌú whusguz, ndutni, “Jacob ꞌinkꞌez bulhutsin cha Esau huyúlhni, ꞌen ookwꞌesiꞌ, ꞌet hoontsꞌi Esau ꞌen ꞌantsꞌi sba unli.”

Mbene la yukaꞌ ninzunne, ꞌenne Yakꞌusda bugha téꞌuntazeh

¹⁴ ꞋEt huwa dája uzdutinelh nuhzun? Yakꞌusda ꞌaw tsꞌihꞌun lhiꞌítꞌoh uzdutinélh eh? ꞋAw whuz unꞌa ꞌuhótꞌeꞌ ꞌaítꞌoh!

¹⁵ ꞋInka Yakꞌusda Moses yudániꞌ-un, “Mbe la oogha téꞌuntaszeh huba ꞌutahásti-un, ꞌen oogha téꞌuntaszeh, ꞌinkꞌez mbe la ooghu sdzi dúntidaꞌ-un, ꞌen ooghu sdzi dúntidaꞌ.”

¹⁶ ꞋEt huwa Yakꞌusda ye ꞌugha téꞌnizeh-i, ꞌi gha, mbene bukaꞌ ninzunne, ꞌenne ꞌutahábanla. ꞋAw dune dichꞌoh hukwaꞌ huninzun iloh huwa ꞌuhooja, ꞌinkꞌez ꞌaw hukwꞌelha ꞌuhootꞌen cha ꞌaítꞌoh.

¹⁷ Yakꞌusda ooghuni ꞌukꞌu nusgúz-i kꞌut Pharoah njan ndúyulhni, “Njan ꞌet huwa Egypt whulerwe nyuzúsi, nyun ungha ndet la whéstus-un dune whúntistun. ꞋEt huwa sooziꞌ ndi yun kꞌut ndulcho whe tꞌentádzin,” yúlhni.

¹⁸ ꞋEt huwa tꞌeoonóhzin hukwaꞌ nuszun, mbene la Yakꞌusda ꞌutahábanlane, ꞌenne bugha teꞌuntazilh. ꞋEt mbene la ꞌutsꞌun úninzunne, ꞌenne cha whuz unꞌa ꞌuhintꞌoh ubilhꞌi.

¹⁹ Whulohne nohtoh ꞌet tilah sudóhniꞌ, “Ntsꞌenꞌa la Yakꞌusda neꞌústꞌen-un ꞌaw whudulhyoh ꞌutsꞌootꞌeꞌ ꞌaítꞌoh de, ꞌinkꞌez lubeshi ꞌutsꞌulhꞌen te, ꞌet di ha Yakꞌusda nekꞌéhootaꞌalh?”

²⁰ Mbe ulhi whe Yakꞌusda oodulhyoh ꞌudutíhnelh? ꞋEt dune ꞌuyínla-i ndi ꞌuyínla-i ntsꞌenꞌa ꞌudutinelh, “Di ha ꞌinja whuz unꞌa ꞌusínla dutinelh?”

²¹ Nja whunilhꞌen, dune whutlꞌus be oosaꞌ ꞌinla de, ꞌilho unzoo yulhtsi de yeꞌ dudutáltiꞌ huba, ꞌinkꞌez ꞌilho yéꞌ titꞌelh wheni ꞌuyinla. ꞋEt whuz unꞌa ꞌuyínla de, didutchꞌoh za oobaꞌ hoontꞌoh.

²² ꞋEt whuz unꞌa Yakꞌusda lhelhyoone whe lhelhtsꞌun unꞌa buba ꞌuhóonla. Whulohne bulubeshi gha Yakꞌusda kwuncho yo tsꞌe whébule, dichꞌoh khaná huwhutꞌalh huwaꞌ bulhꞌih. Saꞌ buba sulhꞌi ꞌet hoontsꞌi dzoh nubutilhdzut. ꞋEnne bugha Yakꞌusda dáltus tsꞌiyanne tꞌéhontázin, ꞌinkꞌez dalcho-i be lubeshi yutsꞌu dutni, ꞌet cha tsꞌiyawh tꞌehontázin.

²³ ꞋInkꞌez whutsodaꞌ ꞌutahanéanla negha teꞌuntazilh ha. ꞋEt whuz unꞌa wheni cha uzdutátiꞌ. Wheni negha tsꞌiyanne tꞌehontázin Yakꞌusda yé diztiꞌ-i dáldzooꞌ whe ꞌuntꞌoh.

²⁴ Wheni Yakꞌusda dutijih ha nekaꞌ daniꞌne tsꞌinli hoontsꞌi, ꞌaw Lizwif butoh za íloh, ꞌudun yun kꞌut whutꞌenne cha.

²⁵ Yakꞌusda ꞌet ꞌutni nus hóoꞌen-un Hosea be ꞌudustlꞌus kꞌut ꞌutni, whuz unꞌa ꞌuwhutánelh whe ꞌutni, “ꞋAw sduneꞌne iloh ꞌenne sduneꞌne budutásnelh, ꞌinkꞌez bukꞌelhúsiꞌne, ꞌenne bukꞌetisiꞌ.

²⁶ Ntsꞌoh la yun kꞌut whuduneꞌne, ꞌaw sduneꞌne iloh ꞌahtꞌoh hubudániꞌne, ꞌenne hoontsꞌi Yakꞌusda khuná-un duduneꞌne bubudutánelh.”

²⁷ ꞋEt nus hóoꞌen-un Isaiah Israel ooduneꞌne bughu yalhduk whe ꞌet khuni ulhtus-i be ndutni, “Israel ooduneꞌne taba sai nduhuniltsuk hoontsꞌ, whulohneyaz za hudutijih.

²⁸ ꞋInkꞌez ntsꞌoh la hudilhtsꞌí-un ndet la Yakꞌusda ubudániꞌ-un khuntsul ꞌet ndutínelh, ꞌinkꞌez ꞌilhiz wheni buba nahutiyeh,” ubúlhni.

²⁹ Ntsꞌenꞌa la nus hóoꞌen-un Isaiah ndutni, “Mbe la tsꞌiyaitsuk whuMoodih unlí-un, Lizwifne oolóhne lhubílhyiz de, ꞌet de Sodom ꞌinkꞌez Gomorrah whutꞌenne ꞌet daꞌ bubulh dahooja la, wheni cha ꞌet daꞌ ndutsꞌooneh.”

Israel ooduneꞌne Yakꞌusda ꞌaw highuni lhuhuyilhchoot ꞌet huwa bula ditni

³⁰ Daja uzdooniꞌ suba? ꞋUdun yun kꞌut whutꞌenne ꞌudaꞌ Yakꞌusda nalh ꞌaw tsꞌihꞌun unꞌa ꞌuhootꞌeꞌ hukwa lheꞌhustꞌen, ꞌenne ꞌuhintꞌoh ꞌandit Yakꞌusda nalh tsꞌihꞌun ꞌuhintꞌoh, be ꞌalhaꞌ nudzun hutꞌi, ꞌi gha ꞌuhuja.

³¹ ꞋEt hoontsꞌi Israel ooduneꞌne ꞌaw Yakꞌusda ookꞌoh tsꞌe tsꞌihꞌun unꞌa hukwaꞌ hitꞌen, ꞌet hoontsꞌi ꞌaw lheꞌhuhóolel.

³² ꞋEt di ha nduhóoja? Yakꞌusda ooghuni ꞌaw buba ꞌalhaꞌ lheꞌyítꞌoh, ꞌet huwa ꞌaw tsꞌihꞌun lheꞌhítꞌel. Moses be ꞌudustlꞌus, ꞌi za hikꞌúneꞌ hootꞌen hukwaꞌ hitꞌen.

³³ ꞋEt soo whuz unꞌa ꞌuhóoja nus hóoꞌen-un Isaiah whutsodaꞌ Yakꞌusda dája bubúlhni la whe ꞌutni, “Whunulhꞌen, keyoh Zion tsꞌuwhútni-un, ꞌet tse ꞌet nedúntasꞌalh, ꞌi la dune hinedúntidaih. ꞋEt mbene la Yakꞌusda ooghuni lhuyúlhchootne, ndi tse buba lheꞌyízooꞌ. ꞋEt hoontsꞌi mbene la ooba ꞌalha ꞌuhoontꞌohne, ꞌenne ꞌaw hukwaya hooleꞌ ꞌaítꞌoh.”