Romans 8 - Yak'usda Ooghuni

Jesus Christ Ndoni gha ꞌilhiz tsꞌuhutinalh-un ꞌet neghá whuninꞌai

¹ ꞋAwet ꞌandit, mbene la Christ ooduneꞌ unlíne, ꞌaw kwuncho yo tsꞌe wheni buba nalhuhídil. ꞋEt nduntꞌohne ꞌaw buyustꞌe nintꞌi tsꞌe hukwꞌu nulheꞌhustꞌen, ꞌet kꞌus Ndoni ookꞌoh tsꞌe za hukwꞌu neꞌhutꞌen.

² Ndoni gha ꞌilhiz hutisnalh whe Christ bulh ꞌilho usli, ꞌinkꞌez Ndoni ookꞌoh tsꞌe ookꞌuneꞌ ꞌustꞌen-un ꞌi be lubeshi chꞌa nasulhti. ꞋEt huwa ꞌaw dalhtuzisa.

³ Neyustꞌe lubeshi tsꞌu níntꞌi, ꞌet huwa Moses be ꞌudustlꞌus ꞌaw nela ꞌooneh ꞌaítꞌoh. ꞋEt hukwꞌelhꞌaz Yakꞌusda duYeꞌ netsꞌítilhꞌaꞌ. ꞋEn ooyustꞌe neyustꞌe ndultꞌoh, ꞌet hoontsꞌi neyustꞌe ꞌi lubeshi bulh ꞌúntꞌoh. ꞋInkꞌez datítsah-un whutlꞌaꞌ dudilti ndi yun kꞌut dune bulubeshi kꞌelha whutilhtselh ꞌet wheni.

⁴ ꞋEt whe ndai la Moses be ꞌudustlꞌus netsꞌu húkwaꞌ ꞌutni-un, tsꞌiyawh neba lhaóodinla. Wheni ꞌutsꞌintꞌoh, ꞌaw neyustꞌe nintꞌi tsꞌe hukwꞌu nulheꞌtsꞌustꞌen, ꞌet kꞌus Ndoni ookꞌoh tsꞌe za hukwꞌu neꞌtsꞌustꞌen.

⁵ Mbene la lubeshi za ghu nuní nuzutne ꞌahoolhyiz lubeshi ꞌuhulhꞌen. ꞋInkꞌez mbene la Ndoni kꞌoh tsꞌe za nuní nuzutne, ꞌenne Ndoni kꞌoh tsꞌe za hukwꞌú neꞌhutꞌen.

⁶ ꞋEt mbene la lubeshi tsꞌu níntꞌine, ꞌenne kwuncho yo tsꞌe hutidulh, ꞌinkꞌez mbene la Ndoni kꞌoh tsꞌe dune unline, ꞌenne Yakꞌusda whudizghel-un buchꞌeꞌ whutaleh ꞌinkꞌez ꞌilhiz huhutinalh.

⁷ Njan huwaꞌ dusni, mbene la ꞌahoolhyiz lubeshi ghu nuní nuzutne, ꞌenne Yakꞌusda chꞌaz ditnine hinli ꞌinkꞌez Yakꞌusda ookꞌoh tsꞌe kꞌúneꞌ hootꞌen-un whutlꞌa lhéꞌhududulhti, Yakꞌusda kꞌúneꞌ hutitꞌen ꞌaw ꞌúhóoneh ꞌaítꞌoh ꞌet huwa.

⁸ ꞋEt huwa buyustꞌe lubeshi tsꞌu níntꞌine, ꞌaw Yakꞌusda ba lheꞌhízooꞌ.

⁹ ꞋEt Yakꞌusda ooyughi nohyudínda de, Ndoni ooduneꞌne ulhi ꞌinkꞌez nohyustꞌe lubeshi tsꞌu níntꞌi-un ꞌaw ookꞌú nulheꞌzuhtꞌen. ꞋEt hoontsꞌi mbene la Christ ooyughi lhitꞌihne, ꞌenne ꞌaw ooduneꞌne lhuhíloh.

¹⁰ Nohyustꞌe lubeshi gha datítsah, ꞌet hoontsꞌi Christ nohyudínda de, ꞌet de nohyughi ꞌilhiz hutinalh Yakꞌusda ba tsꞌihꞌun ꞌuhtꞌoh suliꞌ ꞌet huwa.

¹¹ Christ dazsai whe ndun ꞌen gha Yakꞌusda dunaidilhti, ꞌen ooyughi nohyudínda de, ꞌen gha nohyustꞌe doo cha hutinalh-un yughá ootaꞌalh.

¹² Sulhutsinke, njan dúhoontꞌoh wheꞌ hoontꞌoh, nohyustꞌe lubeshi haꞌ ninzun de, ꞌaw whuz unꞌa oohneh huba lheꞌhóotꞌoh.

¹³ ꞋEt whuz unꞌa dune ulhi de, ꞌet ꞌalha ꞌuhoontꞌoh whe kwuncho yo tsꞌu tíhdulh. ꞋEt hoontsꞌi Ndoni ꞌen gha nohyustꞌe lubeshi haꞌ ninzun-un ꞌetsul ꞌuhla de, ꞌet de ꞌilhiz wheni hutihnalh.

¹⁴ Kꞌus mbene la Ndoni butsꞌu húkwaꞌ ninzun hukwꞌunꞌa ꞌuhutꞌenne, ꞌenne Yakꞌusda ooduneꞌ hinli.

¹⁵ ꞋEt Ndoni nohyudíltsꞌut whe ꞌaw Yakꞌusda be ntilhjut wheni ꞌulhna lhunohílhtsel. ꞋEt nohyudíltsꞌut whe Yakꞌusda ooduneꞌ nohulhtsi. ꞋEt huwa whélhtsꞌuniljut whe bulh yátsꞌulhduk ꞌinkꞌez, “Abba, ꞌuBá,” tsꞌutni.

¹⁶ Ndoni ꞌen ꞌuntꞌoh neyughi whubunulhtun, wheni Yakꞌusda buzkeh tsꞌinli.

¹⁷ ꞋInkꞌez Yakꞌusda buzkeh unlíne, ndai la Yakꞌusda butsꞌú yoozi-i, ꞌi buchꞌeꞌ whutaleh. ꞋEt whuz unꞌa Christ bulh ꞌúztitꞌelh, Christ bulh dzoh nutsꞌuzut de, ꞌen bulh uzdutátiꞌ ꞌet huwa.

Kꞌat le Yakꞌusda nedutálhtiꞌ

¹⁸ ꞋEt njan ndunuszun, Yakꞌusda ye diztiꞌ-i whuneuntilhtun-un hooncha kꞌet njan ꞌandit Jesus Christ ooba dzoh nutsꞌuzut-un, ꞌet ꞌantsꞌi ꞌuhoontꞌoh.

¹⁹ Ndai la Yakꞌusda ꞌuyinla-i, tsꞌiyawh duduneꞌne whubuntilhtun-un, ꞌet soo hukwa tse húhoolih.

²⁰ Ndi yun kꞌut ꞌulya-i, ꞌi ꞌatsul wheni ꞌuyínla, ꞌaw dichꞌoh ꞌutahalhúhooꞌal, Yakꞌusda dichꞌoh ꞌutahahónꞌai whuz unꞌa ꞌuhótꞌeꞌ ha. ꞋEt huwa ndi yun kꞌut ꞌulya-i hukwa tse húhoolih ꞌutsꞌun unꞌa naꞌwhutátnelh.

²¹ Ndi yun kꞌut ꞌulya-i, njan whusahóoltsꞌut de, ꞌet nuján-un ꞌetsul ꞌuwhutánelh. Tube la whudíztiꞌ hóleꞌ. ꞋEt Yakꞌusda buzkeh kꞌunꞌa bukꞌunahutinelh.

²² Tꞌetsꞌonínzun, ndai la Yakꞌusda ꞌuyinla-i, ꞌohwhi ꞌandit whutsꞌun khun dutso, ntsꞌenꞌa la tsꞌekoo buyaz whutále whuz unꞌa dzoh nuzut.

²³ ꞋAw ꞌi za íloh, whenichꞌoh cha tsꞌukhun dutso Yakꞌusda buzkeh gaih za uztileh ꞌet whutsꞌun. ꞋEt ꞌoh de de, neyustꞌe ꞌantsꞌi kwꞌu naꞌitꞌoh léꞌtinelh. ꞋEt Ndoni netsꞌú whusayalhꞌaꞌ inleꞌ, ꞌet whe tꞌetsꞌonínzun Yakꞌusda nedáníꞌ-un whuz unꞌa ꞌet nduwhútanelh.

²⁴ ꞋEt ndi Yakꞌusda ootsꞌu húkwa tse tsꞌúhooli, whuz unꞌa uzdijiz. ꞋEt hukwꞌu nuní nulhzut, ndet la hukwa tse tsꞌúhooli-un ꞌuhóoja de, ꞌaw ꞌon ꞌat hukwa tse tsꞌúholeꞌ ꞌaítꞌoh. Ndet la dune honalhꞌen-un, ꞌaw ꞌon ꞌat hukwa tse húholeꞌ ꞌaítꞌoh ꞌet huwa.

²⁵ ꞋEt hoontsꞌi Yakꞌusda ndi netsꞌú hoozi-un ꞌawhuz lhtsꞌúhoosꞌen de, ꞌalhaꞌ hukwa tse tsꞌúholeꞌ zaꞌ tsꞌootꞌeꞌ.

²⁶ Lhawh hukwꞌunꞌa ꞌaw lhtsꞌílhtus. Ndoni nela ꞌutꞌen. ꞋAw whuloh te ndet huba tenazdutidlí-un ꞌaw tꞌétsꞌonúszun. ꞋEt hoontsꞌi Ndoni neba tedudli, khun dutso leꞌ ꞌutni, khuni ꞌaw be yaóoduk ꞌaitꞌoh, ꞌi be neba tenadudli, ꞌet whe nela ꞌutꞌen.

²⁷ Mbe la nedzi yo nunúta-un, ꞌet Ndoni dája ninzun-un tꞌéwhunínzun. Yakꞌusda hukwaꞌ ninzun hukwꞌunꞌa. Ndoni Yakꞌusda oochꞌeꞌne, buba tedudli ꞌet huwa.

²⁸ ꞋEt huwa tꞌetsꞌonínzun mbene la Yakꞌusda kꞌensíꞌne tsꞌiyantsuk hoonzoo kꞌunꞌa za buba whulhih. ꞋEnne ꞌuhintꞌoh, Yakꞌusda dutijih ha bukaꞌ daníꞌne hinli.

²⁹ ꞋUdechoo whutsꞌun Yakꞌusda oochꞌeꞌ tilehne tsꞌiyawh tꞌebunínzun. ꞋEt huwa whutsodaꞌ buba lhawhúdinla duYeꞌ léꞌhutitꞌelh. ꞋEt whuz unꞌa Jesus Christ neulhutsinke lhanne butoh ꞌudéchoo-un buba unli.

³⁰ Mbene la whutsodaꞌ duchꞌeꞌ tilehne tꞌebunínzun ꞌenne hutijih ha bukaꞌ daniꞌ. ꞋEt tankꞌus ꞌuhutꞌen-un buba gak whulhtsi, ꞌinkꞌez ꞌenne bubudálhtiꞌ.

Jesus Christ ꞌen gha Yakꞌusda nekꞌentsiꞌ

³¹ ꞋEt njan daja ꞌuzdooniꞌ suba? Yakꞌusda netsꞌún ditni de, mbe suba nechꞌaz dotni?

³² ꞋAw Yakꞌusda duYeꞌ buchꞌa lhúyootun whe neba datítsah wheni butlꞌa yálhti. ꞋEt Yakꞌusda neba ꞌedúja de, ꞌet duYeꞌ bulh ꞌet hóontꞌiꞌ whe tsꞌiyaitsuk negha tílelh.

³³ Mbene la Yakꞌusda ꞌutahábanlane, mbe ꞌudutinelh lubeshi ꞌuhulhꞌen budutánelh? Gak! Yakꞌusda ꞌen ꞌuja tankꞌus ꞌúhutꞌen-un buba gak whulhtsi.

³⁴ Mbe ꞌudutinelh hoontsiꞌ kꞌunꞌa neba nahutiyeh? Gak! Christ ꞌen ꞌuja neba dazsai. ꞋAw ꞌet za íloh, ꞌen dunadija ꞌinkꞌez Yakꞌusda naílhni tsꞌe yughusda ꞌinkꞌez neba tenadudli.

³⁵ Mbe ꞌútinelh Christ ye nékꞌensiꞌ-i yuchꞌa nanetálhtelh? Nechꞌa húhoolhꞌi, kꞌus howa whúlnaꞌ-un neghá oohunkat-un, kꞌus dune neúzula-un, kꞌus dai tsꞌínli-un, kꞌus tube tetsꞌulꞌen, kꞌus nebulh howa ꞌóodli-un uzdilhtsꞌi, kꞌus nehutuzilhghelh tílah? ꞋAw hoonli ooneh-i hooloh!

³⁶ Ndi Yakꞌusda be ꞌudustlꞌus njan ndutni, “ꞋUsbai nahituzilghelh-i kꞌunꞌa ꞌutsꞌintꞌoh. Nyun ngha dzin totsuk nehutuzilhghelh leꞌ hoontꞌoh,” ni whe ꞌutni.

³⁷ Hoontsiꞌ-un nebulh ꞌuwhutꞌen ꞌet hoontsꞌi, nekꞌensiꞌ-un, ꞌen gha ꞌaw nechꞌaꞌ oodeh ꞌaítꞌoh.

^38-39 Christ ꞌen gha Yakꞌusda nekꞌentsiꞌ, ꞌinka ꞌaw nekꞌentsiꞌ-i yuchꞌa náneólelh-i hooloh. ꞋEt whuz unꞌa sbaꞌ hooja. Datsꞌúzsai-un tilah kꞌus dzoh nutsꞌúzut-un tilah, lizasne kꞌus ndi yun kꞌut hiye úlhtus-i be tilah nemoodih hutileh, ꞌandit dzin ꞌuhoontꞌoh-un kꞌus nus de dawhútatꞌelh-un, ntsiꞌ-i ndi yun kꞌut nudúdeh-i tilah kꞌus ntsiꞌ-i kwuncho yo tsꞌe nudúdeh-i tilah, ndai la Yakꞌusda ꞌuyinla-i, tsꞌiyawh Yakꞌusda ye nekꞌensiꞌ-i, Jesus Christ neMoodihti bulh ꞌuntꞌoh, ꞌaw yuchꞌa náneólelh-i hooloh.