Romans 7 - Yak'usda Ooghuni

Jesus Christ kꞌúneꞌ ꞌutꞌenne ꞌaw Moses be ꞌudustlꞌus ꞌi gha iloh buba nahutideh

¹ Sulhutsinke, Yakꞌusda dughuni Moses tlꞌa ídanꞌai-i soo tsꞌihꞌun tꞌenuhzun, ꞌet huwaꞌ dusni be nohbulh yasduk. Dune khuna whutoh ndi khuni Yakꞌusda butlꞌa ídanꞌai hikꞌúneꞌ ꞌootꞌen huba ꞌuntꞌoh.

² Njan whunulhꞌen, tsꞌeke dune ghusda de, yinka usda whutoh, yulh ꞌilhoghun lhih. ꞋEt ooki dátsaih te, ꞌet ꞌaw yulh ꞌilhoghun lhíloh nawhudlih. ꞋEt whuz unꞌa Moses be ꞌudustlꞌus ni wheꞌ ꞌutni.

³ ꞋEt ooki dazsai de, ꞌet Moses be ꞌudustlꞌus gha ndun tsꞌeke soh natisja whe ꞌuntꞌoh. Hukwaꞌ ninzun de, ꞌuyoon dune ghu natidalh ꞌinkꞌez ꞌaw lubeshi ooba lhuhóoloh. ꞋEt hoontsꞌi ooki ꞌawhuz khuna whe ꞌuyoon dune zih usda de, lubeshi ꞌulhꞌen-un ꞌuntꞌoh.

⁴ Sulhutsinke ndet la whunoh hodisꞌeꞌ-un ꞌet huwa tꞌeoonáhzun ntsꞌenꞌa la Jesus Christ kꞌúneꞌ ꞌuhtꞌenne ulhi. Nohni ꞌantsꞌi Christ bulh dasáhtsai léꞌuhtꞌoh ínleꞌ. ꞋEt huwa ꞌaw ꞌon ꞌun Moses be ꞌudustlꞌus ootꞌa nínoohtan-un huba lheꞌhóotꞌoh. Christ bulh datsꞌuzsai, ꞌet huwa Moses be ꞌudustlꞌus yuchꞌa naneuzdla. ꞋEt ꞌalhaꞌ ꞌandit mbe la dazsai ꞌinkꞌez dunadija-un, ꞌen bulh ꞌilhoghun tihleh.

⁵ Niz de Moses be ꞌudustlꞌus lubeshi yechꞌa nenizyoot ꞌet hoontsꞌi nedzi hukwaꞌ ninzun kꞌunꞌa yinka uzdilhtsꞌi. Neyustꞌe lubeshi ootlꞌa tsꞌíyalhti leꞌ tsꞌinla, ꞌet ndutsꞌúja huwa kwuncho ꞌi neba kꞌelha tileh.

⁶ Niz de Moses be ꞌudustlꞌus ootꞌa níznintan ínleꞌ. ꞋI gha ꞌantsꞌi tsꞌúlhghel léꞌtsꞌintꞌoh ínleꞌ. ꞋEt hoontsꞌi Jesus Christ bulh datsꞌúzsai daꞌ nela nawhuditni léꞌtsꞌuja. ꞋEt ꞌandit Ndoni ooghuni ꞌandidi-i, ꞌi be ꞌulhna tsꞌinli whe ookꞌúneꞌ tsꞌootꞌen hubaꞌ hoontꞌoh, ꞌaw ꞌon ꞌun Moses be ꞌudustlꞌus ootꞌa niznootan ꞌaitꞌoh.

Moses be ꞌudustlꞌus unzoo eh?

⁷ Moses be ꞌudustlꞌus ooghu dája ꞌuznoozin súba? Moses be ꞌudustlꞌus ꞌi ghá eh lubeshi ꞌutsꞌulhꞌen? ꞋAwundooh! ꞋAw ꞌuhótꞌeꞌ ꞌaítꞌoh. ꞋI gha lubeshi ꞌulhꞌen-un usli tꞌéwhunúszun. Moses be ꞌudustlꞌus kꞌuyasduk whe ꞌutni. “ꞋUyoonne chꞌeꞌ haꞌ nonzin junih,” ꞌi gha nawhusꞌai lubeshi ꞌulhꞌen-un usli.

⁸ ꞋEt whutsodaꞌ Moses be ꞌudustlꞌus ooyit lubeshi ꞌusꞌen-un inleꞌ ꞌaw tꞌeóonuzúszun. ꞋEt hoontsꞌi Yakꞌusda khuni netlꞌa ídanꞌai-i tꞌeniszin whe, ꞌet dalcho-i be syustꞌe lubeshi tsꞌu níntꞌi-un ꞌet nawhusꞌai.

⁹ ꞋEt whutsodaꞌ Moses be ꞌudustlꞌus ooyit kwuncho yo tsꞌe tísyalh tꞌeóonuzúszun. ꞋEt hoontsꞌi Yakꞌusda khuni netlꞌa ídanꞌai-i tꞌeniszin whe lubeshi ꞌulhꞌen-un usli, ꞌinkꞌez kwuncho yo tsꞌe tisyalh ꞌet nawhusꞌai.

¹⁰ Yakꞌusda khuni netlꞌa ídanꞌai-i, ꞌi ꞌilhiz tsꞌuhutinalh-un whunénilhtan, ꞌet hoontsꞌi ookꞌu yasduk huwa kwuncho yo tsꞌe tisyalh-un nawhusꞌai.

¹¹ ꞋEt Yakꞌusda khuni netlꞌa ídanꞌai-i tꞌeniszin whe syustꞌe lubeshi tsꞌu níntꞌi ꞌi khasúnintꞌa whe nanistꞌa ꞌet huwa kwuncho yo tsꞌe tisyalh tꞌeooniszin.

¹² ꞋEt huwa Moses be ꞌudustlꞌus lubeshi ooghu hooloh, ꞌinkꞌez nankiltꞌoh ꞌuyoo khuni netlꞌa ídanꞌai-i, ꞌi cha lubeshi ooghu hooloh tsꞌihꞌun unꞌa ꞌinkꞌez unzoo whe ꞌuntꞌoh.

¹³ Dája tsꞌuntizilh ꞌet huwun? Ndai sba unzoo-i, ꞌi gha kwuncho yo tsꞌe tísyalh tóleh? ꞋAw ꞌuhótꞌeꞌ ꞌaítꞌoh! Ndi Yakꞌusda khuni netlꞌa ídanꞌai-i nela ꞌootꞌen ha negha íninla. ꞋI gha lubeshi dáltsiꞌ tꞌeniszin. Sichꞌoh lubeshi tsꞌu nústꞌi ꞌet huwa lubeshi ꞌulhꞌen-un usli ꞌet nawhusꞌai, ꞌinkꞌez whula gha tsꞌe kwuncho yo tsꞌe tísyalh inleꞌ.

Neyustꞌe ꞌahoolhyiz lubeshi tsꞌu níntꞌi, ꞌet huwa neba huwa whulnaꞌ ꞌaw Moses be ꞌudustlꞌus ookꞌúneꞌ tsꞌootꞌen ꞌaítꞌoh

¹⁴ Ndoni gha Moses be ꞌudustlꞌus neghá yunle, ꞌet hoontsꞌi syustꞌe lubeshi tsꞌu níntꞌi, ꞌinkꞌez lubeshi eꞌulhna tisleh ꞌet tꞌeoonuszun.

¹⁵ ꞋInkꞌez syustꞌe lubeshi tsꞌu níntꞌi te, si sba ꞌaw lheꞌhóozooꞌ wheꞌ hoontꞌoh. Ndai la ꞌóosꞌen hukwa lheꞌnúszun ꞌi za ꞌusꞌen, ꞌinkꞌez ndai la ꞌukꞌenus whutsꞌu dusní-un, ꞌoh te za neꞌustꞌen.

¹⁶ ꞋEt ndet la hukwa lheꞌnuszun-un ꞌustꞌen te, ꞌet Moses be ꞌudustlꞌus sba tsꞌihꞌun ꞌuntꞌoh tꞌewhunúszun.

¹⁷ ꞋEt hoontsꞌi, ꞌaw si hukwaꞌ nuszun íloh whe ꞌustꞌen, ndi lubeshi syustꞌe tsꞌu níntꞌi-un, ꞌi gha ꞌustꞌen.

¹⁸ ꞋAw syustꞌe hoonzoo-un whutsꞌúlhnitꞌi. Hoonzoo te néꞌtistꞌen hukwaꞌ nuszun ꞌet hoontsꞌi ꞌaw oosneh ꞌaitꞌoh.

¹⁹ ꞋEt hoonzoo te néꞌtistꞌen hukwaꞌ nuszun te, ꞌaw ꞌuhóosle ꞌaítꞌoh. ꞋInkꞌez hoontsiꞌ ꞌuwhutisꞌelh hukwa lheꞌnúszun hoontsꞌi, ꞌaw huwa lhúhoolnaꞌ whe ꞌoh te neꞌústꞌen.

²⁰ Hoontsiꞌ te neꞌústꞌen de, ꞌaw hukwa lheꞌnúszun, ꞌet hoontsꞌi ꞌaw si hukwaꞌ nuszun íloh whe ꞌustꞌen, ndi lubeshi syustꞌe tsꞌu níntꞌi, ꞌi gha ꞌustꞌen.

²¹ ꞋEt ndet tsꞌihꞌun ꞌutistꞌelh hukwaꞌ nuszun totsuk, ndi lubeshi tsꞌu nústꞌi ꞌi whuchꞌaz súnilhtꞌi. ꞋEt nduwhútꞌen-un nawhusꞌai.

²² Sdzi be Yakꞌusda ookꞌoh tsꞌe hoonústꞌiꞌ.

²³ ꞋEt hoontsꞌi ꞌutsꞌun unꞌa cha tꞌeóonúszun. ꞋEt syustꞌe seni dulhyo néꞌtitꞌen whutsꞌu níntꞌi. ꞋI be lubeshi soontun ꞌet ndustꞌoh, ꞌinkꞌez syustꞌe whuz za nintꞌi.

²⁴ Tube tezꞌen. Ndi syustꞌe lubeshi za tsꞌu níntꞌi. ꞋI gha kwuncho yo tsꞌe tísyalh. Mbe ꞌet whuchꞌa sútilhyih?

²⁵ Jesus Christ ꞌen za ꞌutinelh. ꞋEt huwa tube cho Yakꞌusda, “Musi,” dusni. ꞋEt ndiz unꞌa ꞌustꞌoh, seni be Yakꞌusda ookꞌoh tsꞌe za ookꞌúneꞌ ꞌustꞌen, ꞌet hoontsꞌi syustꞌe ꞌawhuz lubeshi tsꞌu níntꞌi za ꞌuntꞌoh.