Romans 6 - Yak'usda Ooghuni

Netsudule oochꞌaz nátsꞌoolyeh ꞌinkꞌez Jesus Christ ookꞌúneꞌ tsꞌootꞌen

¹ Tꞌewhunúhzun eh dája nohdásniꞌ? Lubeshi ꞌutsꞌulhꞌen za eh ꞌuztitꞌelh, Yakꞌusda dalcho-i be netsꞌun únzoo tꞌetsꞌontázin huba?

² Ntsꞌenꞌa ꞌuwhutátꞌelh? Ntsꞌenꞌa lubeshi ꞌutsꞌulhꞌen-un whulazditni, ꞌinkꞌez doo cha za lubeshi ꞌuztilhꞌelh? ꞋAw ꞌuhótꞌeꞌ ꞌaitꞌoh!

³ ꞋAwhuz eh tꞌewhunuzúhzun? Mbene la Jesus Christ gha too beꞌ hulya de, ꞌet de dune tꞌehontázin Jesus Christ ooduneꞌne hinli. ꞋEt dutsꞌúja de ꞌantsꞌi ꞌen bulh datsꞌúzsai léꞌtsꞌintꞌoh.

⁴ ꞋEt huwa too beꞌ tsꞌulya ꞌi gha ꞌantsꞌi Christ bulh datsꞌúzsai, ꞌinkꞌez hiyulh ánealhti leꞌ tsꞌintꞌoh. ꞋInkꞌez neBá ye ulhtus-i be yaidláne toh dunaidilhti daꞌ, ꞌet whuz unꞌa za wheni ꞌuyoon natsꞌusliꞌ kꞌunꞌa yinka ꞌuzdóltsꞌiꞌ hubaꞌ hoontꞌoh.

⁵ ꞋAntsꞌi Jesus Christ hiyulh ánealhti bulh ꞌilhoghun ndutsꞌúltꞌoh de, ꞌet whuz unꞌa dunadija daꞌ bulh ꞌilhoghun tsꞌinli léꞌuztitꞌelh.

⁶ Tꞌetsꞌonínzun, ꞌudaꞌ datsꞌintꞌoh la, ꞌet Jesus Christ tulalhgus kꞌut whulh dazsai. ꞋEt whe lubeshi ꞌuztilhꞌelh hukwa ꞌuzninzun-un gak neba whutaleh. ꞋEt huwa niz de néꞌtsꞌustꞌen-un, ꞌaw ꞌon ꞌun hukwꞌú neꞌtsꞌootꞌen ꞌaítꞌoh. ꞋAw ꞌon ꞌun netsudúle be ꞌulhna lhtsꞌutisle, ꞌinkꞌez ꞌaw ꞌon ꞌun lubeshi ꞌuztilhꞌelh-un hukwa lheꞌtsꞌuntiszil.

⁷ Mbe la Jesus Christ yúlh dazsai leꞌ ꞌuja-un, ꞌen oolubeshi tsꞌu ha nálti whe ꞌuntꞌoh.

⁸ ꞋEt huwa wheni Christ bulh datsꞌúzsai de, ꞌet de ꞌen bulh huztinalh, ꞌet neba ꞌalha ꞌuhoontꞌoh.

⁹ ꞋEt tꞌetsꞌonínzun, Christ yaidlane toh danadija ꞌinkꞌez ꞌilhiz hutinalh. ꞋAw whulh nat daóotsa ꞌaítꞌoh wheꞌ hoontꞌoh.

¹⁰ ꞋIlhoh za tsꞌiyanne ba dazsai. ꞋEt hoontsꞌi ꞌandit khuna ꞌinkꞌez Yakꞌusda bulh khuna.

¹¹ Nohni cha lubeshi be yaihdla nuhzun, ꞌet hoontsꞌi Yakꞌusda, Jesus Christ neMoodihti ꞌen bulh, khuhna whe ꞌahtꞌoh.

¹² ꞋEt huwa lubeshi nohmoodih ooleꞌ junih, ꞌinkꞌez kꞌuneꞌ nohoolꞌen junih!

¹³ ꞋAw ꞌon ꞌat nohyustꞌe tankꞌus unꞌa ꞌutitꞌelh wheni ootlꞌáꞌ dudoolhyelh junih, ꞌet kꞌus khahna hukwꞌunꞌa ootlꞌaꞌ dudulhye ꞌinkꞌez Yakꞌusda ba nohyustꞌe tsꞌihꞌun unꞌa ꞌutꞌen oolhꞌen.

¹⁴ Moses ooghuni nohtlꞌa ídanꞌai-i inleꞌ, ꞌi ootꞌa nínohtan junih. Yakꞌusda ye únzoo-i, ꞌi za ootꞌa nínoohtan. ꞋEt de lubeshi nohmoodih ooleꞌ ꞌaitꞌoh.

¹⁵ Daja nuhzun? Niz de khuni netlꞌa ídanꞌai-i, ꞌi ꞌaw ꞌon ꞌun ootꞌa níznootan huba lheꞌhóotꞌoh. ꞋEt Yakꞌusda ye únzoo-i, ꞌi za tꞌaníznintan de, lubeshi ꞌuztilelh-un netlꞌa hóotꞌai nahzun eh? ꞋAw ꞌuhótꞌeꞌ ꞌaítꞌoh.

¹⁶ ꞋAw tꞌewhunuzúhzun? ꞋEt ꞌilhoghun dune ootlꞌáꞌ dudilhya de, ndet hukwaꞌ ninzun-un ꞌoh teneꞌ tihtꞌen, ꞌet de ꞌen be ꞌulhna ꞌahtꞌoh. ꞋEt whuz unꞌa za lubeshi ootlꞌáꞌ dudilhya de, lubeshi be úlhna ꞌahtꞌoh, ꞌinkꞌez ꞌilhiz wheni kwuncho yo ꞌet tsꞌu tihdulh, ꞌi nohba kꞌelha tileh. ꞋEt hoontsꞌi Yakꞌusda ootlꞌáꞌ dudilhya de, Yakꞌusda be ꞌulhna tihleh, ꞌinkꞌez Yakꞌusda nohdutánelh tsꞌihꞌun ꞌahtꞌoh, ꞌet whuz unꞌa nohba kꞌelha whutáleh.

¹⁷ ꞋInkꞌez sulhutsinke tube nohba hoonústꞌiꞌ ꞌet huwa Yakꞌusda, “Musi,” dusni. Niz de lubeshi be ꞌulhna ulhi ínleꞌ, ꞌet hoontsꞌi nohdzi ndulcho-i be ndet la whunoh hodalhꞌeꞌ-un hukwꞌúneꞌ zuhtꞌen.

¹⁸ ꞋEt ꞌandit lubeshi chꞌa duhjih, ꞌinkꞌez Yakꞌusda be ꞌulhna suhliꞌ.

¹⁹ Tetsun whe ꞌahtꞌoh, ꞌet huwa whuz unꞌa nohbulh yásduk. ꞋEt huwa daja nohdutásnelh-un ꞌaw nohba huwa lhúhoolnaꞌ whe sudutáhtsꞌo. Niz de nohyustꞌe lubeshi be ꞌulhna tihleh huba ootlꞌaꞌ dudilhya ínleꞌ. ꞋInkꞌez hoontsiꞌ-un ꞌuhoolhꞌen-un nus za lhéꞌhooltsiꞌ whulhꞌi. ꞋAndit Jesus Christ ooduneꞌ uhli ꞌinka whuz unꞌa za Yakꞌusda nohyustꞌe ootlꞌa ítihlelh be ꞌulhna tihleh huba. Whuz unꞌa ꞌuhtꞌen de, tsꞌihꞌun ꞌutihtꞌelh, ꞌinkꞌez tsꞌiyanne tꞌewhutázin Yakꞌusda ba ꞌudun nebuninlane suhliꞌ.

²⁰ Lubeshi be ꞌulhna ulhi daꞌ, ꞌaw tsꞌihꞌun unꞌa ꞌutihtꞌelh lhnúhzil ínleꞌ.

²¹ ꞋEt hukwayá hoonli tuneꞌ zuhtꞌen ínleꞌ. ꞋAw whe soo lheꞌuhtꞌel ꞌinkꞌez ꞌet hukwꞌelha ꞌilhiz wheni kwuncho yo tsꞌe tíhdulh wheꞌ hoontꞌoh. ꞋEt whuz unꞌa dune ulhi ínleꞌ.

²² ꞋEt ꞌandit Yakꞌusda be ꞌulhna uhli. Whuz unꞌa ꞌuhtꞌén-un ꞌet hukwꞌelha Yakꞌusda ba ꞌudun nebuninlane suhliꞌ, ꞌinkꞌez hukwꞌelhꞌaz ꞌilhiz wheni yakꞌuz tsꞌe tíhdulh.

²³ Lubeshi ꞌutsꞌalhꞌen-un, ꞌi kꞌelha daztitsah. ꞋEt hoontsꞌi neMoodihti Jesus Christ, ꞌen gha Yakꞌusda ꞌilhiz be tsꞌuhutinalh-un, ꞌet ꞌantsꞌi negha óoninꞌai.