Romans 5 - Yak'usda Ooghuni

Yakꞌusda ookꞌeke natsꞌusliꞌ

¹ Yakꞌusda daja nedániꞌ ꞌet neba ꞌalha ꞌuhoontꞌoh. ꞋEt whe la nintaꞌtsꞌutꞌíh-un Yakꞌusda neba gak whulhtsi. ꞋEt whula gha tsꞌe Jesus Christ neMoodihti ꞌen gha Yakꞌusda tsꞌun nedzi dizghel.

² Jesus Christ neba ꞌalhaꞌ ꞌuntꞌoh, ꞌet huwa Yakꞌusda ye únzoo-i nechꞌeꞌ unli wheꞌ ꞌuntꞌoh, ꞌinkꞌez ꞌi be ꞌilhiz wheni ꞌet néznindil. ꞋEt tsꞌuhóontꞌiꞌ whe huba tsꞌilhꞌi ndet la whusawhútiltsꞌulh-un Yakꞌusda dádiztiꞌ la tꞌetsꞌontizeh.

³ ꞋInkꞌez ꞌaw ꞌet za iloh, ꞌet huwa dzoh nutsꞌudeh hoontsꞌi, tsꞌuhóontꞌiꞌ, ꞌinkꞌez whulh tsꞌúzyin-un whunénilhtan.

⁴ ꞋInkꞌez tsꞌiyanne tꞌehonózin dantꞌóhne dune tsꞌinli. ꞋEt whuz unꞌa dune tsꞌinli huwa, huba tsꞌilhꞌi ndet la whusawhútiltsꞌulh-un Yakꞌusda dádiztiꞌ la tꞌetsꞌontizeh.

⁵ Yakꞌusda Ndoni netsꞌó tlꞌaidanꞌai ꞌinkꞌez neyudíltsꞌut. ꞋEn gha Yakꞌusda dalcho ꞌi be nekꞌensiꞌ tꞌetsꞌonínzun. ꞋEt huwa ꞌet dzin whusawhútiltsꞌulh-un whe huba tsꞌilhꞌi.

⁶ Whutsodaꞌ ꞌaw be tsꞌílhtus-i lhtsꞌítꞌih inleꞌ, Yakꞌusda tsꞌihꞌun unꞌa ooba yinka uzdutáltsꞌilh huba. ꞋEt hoontsꞌi ndet dzin Yakꞌusda ꞌudun néwhuninꞌai-un, ꞌet dzin Christ tsꞌiyanne lubeshi ꞌulhꞌenne buba dazsai.

⁷ Howu nuní nuhzut, ꞌaw dune tsꞌihꞌun ꞌuntꞌoh-un ba daóotsah hukwaꞌ ninzunne hooloh. Nohtoh ꞌilhoghun tilah hoonli oodzi hóonli-un, ꞌen dune unzoo-un ba datítsah huba.

⁸ ꞋEt hoontsꞌi wheni ꞌawhuz lubeshi ꞌulhꞌenne tsꞌinli inleꞌ whe Christ neba dazsai. ꞋEt whe Yakꞌusda whunénilhtan dalcho-i be nekꞌensiꞌ.

⁹ ꞋAw ꞌet za íloh, Jesus Christ buzkaiꞌ be Yakꞌusda nintaꞌtsꞌuntꞌen-un neba gak whulhtsi. ꞋEt huwa Yakꞌusda lubeshi ꞌulhꞌenne whe whunujut-un whe buba nahutiyeh. Jesus Christ ꞌen be Yakꞌusda ye húnilchꞌoh-i, ꞌi chꞌaz ꞌuzdutijih.

¹⁰ ꞋAwhuz Yakꞌusda oochꞌaz úzditni inleꞌ whe ooYeꞌ neba dazsai. ꞋEt huwa ꞌaw Yakꞌusda ꞌawhuz nebulh lhónulhchꞌeh. ꞋEt ꞌon ꞌun cha, Jesus ye khúna-i, ꞌi be uzdutijih ꞌet huwa.

¹¹ ꞋAw ꞌet za íloh, Jesus Christ neMoodihti ꞌen gha Yakꞌusda bulh tsꞌuhóontꞌiꞌ, ꞌaw ꞌon ꞌun nebulh lhuntalhchꞌoh ꞌet huwa.

Adam ꞌen la gha tsꞌe lubeshi ꞌutsꞌulhꞌen, ꞌinkꞌez Jesus Christ ꞌen gha Yakꞌusda nelubeshi neba gak yulhtsi

¹² Huwú nuní nuhzut, Adam lubeshi ílhchoot, ꞌi la gha tsꞌe tsꞌiyanne ndi yun kꞌut lubeshi ꞌulhꞌenne huzdliꞌ. Lubeshi ꞌutsꞌinla de, dáztitsah. Tsꞌiyawh lubeshi ꞌutsꞌinla, ꞌet huwa tsꞌiyawh yatsꞌadlah.

¹³ Yakꞌusda Moses dughuni yutlꞌa ídanꞌai. ꞋEt whutsꞌun dune lubeshi ꞌuhulhꞌen. Dunene Moses be ꞌudustlꞌus ꞌaw lhahuyítꞌih, ꞌet huwa bulubeshi ba nahutideh-un kꞌat le wheni ꞌet néwhuninꞌai.

¹⁴ ꞋEt hoontsꞌi Adam yinka indaꞌ daꞌ Moses yinka nenínya ꞌet whutsꞌun, dune lubeshi ꞌuhulhꞌen, ꞌet huwa yahadlah. Adam Yakꞌusda ooghuni tꞌeinínzun, ꞌet hoontsꞌi kꞌeinínyuz, ꞌet whe lubeshi ílhchoot. ꞋEt tsꞌiyanne lubeshi ꞌuhulhꞌen. Ndunne dune ꞌaw Adam kꞌunꞌa lubeshi lheꞌhílel, ꞌet hoontsꞌi lubeshi ꞌuhulhꞌenne hinli inleꞌ ꞌet huwa yahadlah. Adam ꞌen whusatíyalh-un ndultꞌoh.

¹⁵ ꞋEt hoontsꞌi Yakꞌusda ndun whusayalhꞌaꞌ-un, ꞌen gha nelubeshi neba yunawhudilhnoh. ꞋI ꞌantsꞌi negha íninꞌai. Ndi ꞌantsꞌi negha íninꞌai-i ꞌaw Adam la gha tsꞌe ꞌutsꞌúja-un whundúlhiltꞌoh. Adam lubeshi ílhchoot ꞌet huwa tsꞌiyanne yahadlah suliꞌ. ꞋEt hoontsꞌi Yakꞌusda ye únzoo-i gha nelubeshi yunawhudilhnoh. ꞋEt huwa Yakꞌusda ye únzoo-i Jesus Christ gha ꞌi lhane ghaltsꞌut.

¹⁶ ꞋEt Adam lubeshi ílhchoot whe dáhooja, Yakꞌusda ndi negha íninꞌai-i, ꞌi ꞌaw ꞌet whundúlhiltꞌoh. ꞋAlhaꞌ hoontꞌoh whe ndi ꞌilhoh lubeshi ꞌulya ꞌi gha Yakꞌusda ye náhutiyeh ꞌinla-i tsꞌiyanne dune dahútitsah. Lubeshi lhai ꞌutsꞌinla hoontsꞌi, Yakꞌusda ꞌantsꞌi negha íninꞌai-i, ꞌi be nintaꞌtsꞌuntꞌen-un neba gak whulhtsi.

¹⁷ Adam oolubeshi ꞌi gha tsꞌiyanne dune yahitádlah. Ndi dune yé datsah-i ꞌaw hila gha óoyaꞌ ꞌaítꞌoh. ꞋEt hoontsꞌi Yakꞌusda ye nétsꞌun unzoo-i, ꞌi ꞌon nus unzoo. Mbene la yílhchootne, ꞌenne ꞌi gha, ꞌantsꞌi negha íninꞌai-i ndultꞌoh, whe Yakꞌusda neúlhni, tsꞌihꞌun dune tsꞌinli. ꞋInkꞌez nedutálhtiꞌ cha whe ꞌilhiz wheni huztinalh. ꞋEt Jesus Christ whuz unꞌa neba hóonla.

¹⁸ ꞋEt huwa Adam lubeshi ílhchoot, ꞌen gha tsꞌiyanne dune yahitádlah kꞌunꞌa buba nahisda. ꞋEt Jesus Christ whuz unꞌa za tsꞌihꞌun ꞌuhoontꞌoh kꞌunꞌa neba ꞌuja. Njan hukwa ꞌuzninzun de nintaꞌtsꞌuntꞌen-un Yakꞌusda neba gak whulhtsi, ꞌinkꞌez ꞌilhiz wheni huztinalh wheꞌ hoontꞌoh.

¹⁹ Adam ꞌaw khuni kꞌúnulheꞌitꞌel, ꞌet huwa ꞌen ooghaꞌ hooja tsꞌiyanne dune lubeshi ꞌulhꞌenne huzdliꞌ. ꞋEt hoontsꞌi Jesus Christ ꞌúkꞌuneꞌ ꞌustꞌen-un huwa lhane dune tsꞌihꞌun ꞌuhintꞌoh tileh.

²⁰ ꞋEt ꞌon ꞌun cha Yakꞌusda dughuni Moses tlꞌa ídanꞌai, ꞌet whe la whunenulhtun dáhooltsuk whe Yakꞌusda ooghuni kꞌúzninyuz. Ndet la tꞌetsꞌonínzun lubeshi ꞌulhꞌen ntsiꞌne tsꞌinli de, ꞌet de natsꞌuhooꞌaih Yakꞌusda ye nétsꞌun únzoo-i, ꞌi ꞌon nus ulhtus whe nelubeshi yuchꞌaꞌ nilhde.

²¹ ꞋOh daꞌ lubeshi gha dune ye dátsah-i ꞌaw yula gha óoyaꞌ ꞌaítꞌoh. ꞋEt hoontsꞌi ꞌandit Yakꞌusda ye únzoo-i, dune huyílhchoot de, ꞌi gha ꞌilhiz huhutinalh. NeMoodihti Jesus Christ ꞌen gha whuz unꞌa nebaꞌ hóonla.