Romans 3 - Yak'usda Ooghuni

¹ ꞋEt njan nohoodutaskut, di ha Lizwifne, ꞌenne ꞌon nus buba hoonzoo? ꞋInkꞌez di ha buba húztꞌus-un ꞌet huwun ꞌudun yun kꞌut whutꞌenne buba ndo ꞌuhintꞌoh?

² Lhat-un whe buba hoonzoo. Yakꞌusda dughuni butlꞌa ídanꞌai, ꞌi be tsꞌiyanne hubohodoolhꞌeh ha.

³ ꞋAlhaꞌ hoontꞌoh, whulohne Lizwifne Yakꞌusda ooghuni ꞌaw hikꞌú nulheꞌustꞌen. ꞋEt nduntꞌóhne gha Yakꞌusda ꞌonghohne Lizwifne bula dutitnih ninzun eh?

⁴ Ntsꞌenꞌa? Gak wheꞌ hoontꞌoh! Dunene tsꞌiyawh whuhutsꞌit ꞌet hoontsꞌi Yakꞌusda ꞌaw lhuwhustsꞌit wheꞌ ꞌuntꞌoh. Lerwe David Yakꞌusda ghun ꞌukꞌu náwhuzguz ndutni, “Nghuni gha ꞌuyoonne dune ꞌalhaꞌ dini tꞌehontázin. ꞋUyoonne ndulhyoh ꞌuhutni de, buchꞌaꞌ talhdoh,” ni.

⁵ Wheni Lizwifne tankꞌus ꞌútsꞌutꞌen de, ꞌet whe ꞌuyoonne dune ꞌaw huwa lhúhoolnaꞌ whe tꞌehonínzun Yakꞌusda tsꞌihꞌun ꞌuntꞌoh. Tankꞌus ꞌútsꞌutꞌen huwa Yakꞌusda neba nahutiyeh de, tsꞌihꞌun lheꞌustꞌen ninzun eh? (ꞋAntsꞌi ꞌoh dune kꞌunꞌa ꞌudusni.)

⁶ Yakꞌusda wheni Lizwifne tsꞌihꞌun unꞌa neba nalhúhusye de, ntsꞌenꞌa suba ndi yun kꞌut dune tsꞌihꞌun unꞌa buba nahooyeh? ꞋAw ꞌuhótꞌeꞌ ꞌaítꞌoh wheꞌ hoontꞌoh!

⁷ Si whustsꞌit huwa Yakꞌusda ooghuni ꞌalhaꞌ ꞌuntꞌoh-i, ꞌi ꞌon nus díztiꞌ suliꞌ de, ꞌet huwa ꞌuyoonne ꞌaw Yakꞌusda lhuwhustsꞌit ꞌet tꞌehontázin. ꞋEt di ha si lubeshi ꞌulhꞌen-un sudutáhnelh?

⁸ ꞋEt hoontsꞌi whulohne dune, nechꞌaz yáhalhduk whe hutni, “Tankꞌus ꞌúhootꞌen butsꞌútni Yakꞌusda díztiꞌ tꞌehonoozeh ha,” ꞌet whe nechꞌaz yáhalhduk. ꞋEt ꞌalha ꞌuhoontꞌoh njan hohontsꞌit-un ꞌet hukwꞌelha Yakꞌusda buba nahutiyeh, bubulh dawhútanelh-un tsꞌihꞌun ꞌuhoontꞌoh.

Ndi yun kꞌut dune ꞌaw tsꞌihꞌun unꞌa ꞌuntꞌohne hooloh

⁹ Wheni Lizwifne ꞌudun yun kꞌut whutꞌenne buba nus sóo tsꞌinzoo ninzun eh? ꞋAw whuz unꞌa lheꞌhóotꞌoh! ꞋUdaꞌ whúnyunistan nahúltꞌoh Lizwif ꞌinkꞌez ꞌudun yun kꞌut whutꞌenne lubeshi ꞌulhꞌenne ꞌuhintꞌoh. ꞋEt huwa Yakꞌusda buba nahutiyeh.

¹⁰ Daja dusni-un Yakꞌusda be ꞌudustlꞌus kꞌut cha ꞌukꞌu whusguz ꞌet ndutni, “ꞋAw ndi yun kꞌut ꞌilhoghun dune tsꞌihꞌun unꞌa ꞌuntꞌóh-un hooloh.

¹¹ ꞋAw ꞌilhoghun dune tꞌeooninzun-un hooloh. ꞋInkꞌez dune huwu dalhóditꞌoh.

¹² Tsꞌiyanne Yakꞌusda chꞌaz náhulhya. Tsꞌiyanne hintsiꞌ súliꞌ. ꞋAw ꞌilhoghun dune unzoo-un hooloh.

¹³ Bughuni untsiꞌ. Dune zi ulhjut za bunawhultsun leꞌ hintꞌoh, ni whe ꞌutni bughuni untsiꞌ ni-un. Huwhutsꞌit-un za ꞌuwhuhulhꞌen. Khuni hiye yálhduk-i ꞌantsꞌi tlꞌughus lubezo ndultꞌoh. Whuz unꞌa dughuni be dune hundílhdaih.

¹⁴ ꞋAhoolhyiz buze hoontsiꞌ ꞌinkꞌez bukꞌehuhayih.

¹⁵ ꞋAhoolhyiz dune hughan, ꞌet za huba hilhꞌi.

¹⁶ Ntsꞌoh la nuhúdilh te tsꞌiyaitsuk nintaꞌhulhꞌih, ꞌinkꞌez dune dzoh nuhulhdeh.

¹⁷ ꞋAw tsꞌihꞌun unꞌa yinka hudilhtsꞌí-un ꞌaw tꞌehonúszun.

¹⁸ ꞋAw Yakꞌusda hiyé lhniljut chaꞌ hintꞌoh,” ni whe ꞌutni.

¹⁹ ꞋAlhaꞌ tꞌetsꞌonínzun Moses be ꞌudustlꞌus hikꞌúneꞌ ꞌutꞌenne ꞌudustlꞌus daja ni la, tsꞌiyawh hikꞌúneꞌ ootꞌen hubaꞌ hoontꞌoh. ꞋEt whula gha tsꞌe tsꞌiyanne Yakꞌusda hibut neníndil de, lubeshi ꞌuhulhꞌen tꞌéhonínzun, ꞌet huwa ꞌaw hoonli ꞌuhudooniꞌ ꞌaítꞌoh.

²⁰ Mbene la Moses be ꞌudustlꞌus kꞌúneꞌ ꞌutꞌenne ꞌaw ꞌet huwa lubeshi ꞌuhulhꞌen-un huba gak hoolhtselh ꞌaítꞌoh. Moses be ꞌudustlꞌus ꞌi gha lubeshi ꞌuhulhꞌenne ꞌuhintꞌoh tꞌehonínzun.

Jesus Christ neba ꞌalhaꞌ ꞌuntꞌoh de, nintaꞌtsꞌuntꞌen-un Yakꞌusda neba gak whutilhtselh

²¹ ꞋAwet ꞌandit Moses be ꞌudustlꞌus ooyit, tsꞌiyanne Yakꞌusda nalh tsꞌihꞌun ꞌuhutitꞌelh ꞌet whúbunilhtan. Moses be ꞌudustlꞌus cha ꞌinkꞌez Yakꞌusda be nus hóoꞌenne bubeꞌ ꞌudustlꞌus cha whuz unꞌa ꞌuwhutánelh hutni.

²² Yakꞌusda nalh tsꞌihꞌun ꞌuhutitꞌelh, mbene la Jesus Christ ooba ꞌálhaꞌ ꞌuntꞌohne, ꞌenne za tsꞌihꞌun naꞌujane hinli nasdliꞌ. ꞋEt hukwaꞌ huninzun de, Yakꞌusda tsꞌiyanne tsꞌihꞌun unꞌa naꞌbutilelh, Yakꞌusda yun kꞌut dune ꞌalhgoh lhgha úbunilhꞌen ꞌet huwa.

²³ ꞋEt wheni tsꞌiyawh lubeshi ꞌutsꞌalhꞌen. ꞋEt huwa Yakꞌusda ye diztiꞌ-i ꞌet ndutsꞌóotꞌeꞌ ꞌaitꞌoh.

²⁴ Christ, ꞌen Jesus tsꞌutni, ꞌen gha lubeshi chꞌa naneonket. ꞋEt huwa nintaꞌtsꞌuntꞌen-un, Yakꞌusda ye unzoo-i, ꞌi be gak neba whulhtsi. ꞋAntsꞌi negha óoninꞌai leꞌ neinla.

²⁵ Yakꞌusda duYeꞌ ndi yun kꞌut whutꞌenne yúbunilhtan Yakꞌusda soo cho butsꞌu naitotꞌen ha. ꞋEt Jesus Christ buzkaiꞌ gha neba ꞌalha ꞌuhoontꞌoh ꞌet whe Yakꞌusda dukꞌeke naneulhtsi. ꞋEt whuz unꞌa dichꞌoh tsꞌihꞌun ꞌuntꞌoh-un, ꞌet whunenilhtan. ꞋUdaꞌ dune lubeshi ꞌuhalhꞌen-un Yakꞌusda buba ꞌun yutilhdil.

²⁶ ꞋInkꞌez ꞌaw dzoh nulhúbilhdoh, ndi yun kꞌut whutꞌenne duYeꞌ bugha ínilhti ꞌet whutsꞌun. ꞋEt whe dichꞌoh tsꞌihꞌun ꞌuntꞌoh ꞌet dunábunilhtan. ꞋEt ꞌandit Jesus yuba ꞌalhaꞌ ꞌuntꞌohne tsꞌihꞌun unꞌa Yakꞌusda nintaꞌhuntꞌen-un ꞌet buba gak whulhtsi.

²⁷ ꞋAw eh hoonliyaz ꞌóontꞌeꞌ bulh ooghu yatsꞌoolhduk-i hooloh? Soo gak! Ndet dáhoontꞌoh-un ꞌet huwa? ꞋUtꞌen gha tilah? ꞋAwundooh! ꞋEt Jesus Christ neba ꞌalhaꞌ ꞌuntꞌoh-un, ꞌi be ꞌutsꞌóontꞌeꞌ-un gak nawhusliꞌ.

²⁸ ꞋEt huwa whutsꞌodulꞌeh, Yakꞌusda buba ꞌalhaꞌ ꞌuntꞌohne, nintaꞌhutꞌih-un buba gak whulhtsi. ꞋAw ꞌon ꞌun Moses be ꞌudustlꞌus hikꞌú nulheꞌoostꞌen hubaꞌ hoontꞌoh.

²⁹ Daja nuhzun? Yakꞌusda Lizwifne za buYakꞌusda unli, kꞌus ꞌudun yun kꞌut whutꞌenne, ꞌenne cha tilah buYakꞌusda unli nuhzun eh? ꞋAlhaꞌ ꞌudun yun kꞌut whutꞌenne, ꞌenne cha buYakꞌusda ꞌuntꞌoh.

³⁰ Yakꞌusda ꞌilhoghun za unli. ꞋEt huwa Lizwifne ꞌinkꞌez ꞌudun yun kꞌut whutꞌenne buba ꞌalha ꞌuhoontꞌoh de, ꞌet de nintaꞌhuntꞌen-un buba gak whutilhtselh.

³¹ ꞋEt whula gha tsꞌe, wheni Yakꞌusda ooba ꞌalhaꞌ tsꞌintꞌoh tsꞌihꞌun unꞌa naꞌtsꞌuja, ꞌet ndutsꞌíntꞌoh de, Moses be ꞌudustlꞌus oonatsꞌodutilnoh nuhzun eh? ꞋAwundooh! ꞋAwhuz ꞌet dizꞌai. ꞋI cha Yakꞌusda ooghuni ꞌuntꞌoh.